十年前入行的姚子羚（Elaine），憑清純外表獲安排於多套青春偶像劇中飾演妹妹仔角色，至06年於劇集《鐵血保鏢》中擔正女主角，逐漸為人認識。去年她主演的《我的如意狼君》收視麻麻，卻好評如潮，亦是她始料不及的：「身邊好多人都同我講話我做得好好，套劇有好多內心戲要表達，個劇本寫得好好，令我好容易可以投入到。」劇中她為愛黃浩然不惜一切，天蠍座的她同樣會為愛情放棄一切：「有時演戲好似人生，人生多經歷，試過情傷，到演戲時個角色有某啲位好似，就會易演出嚟，有啲對白已經好易觸動到你個感覺。」她自揭一年多前經歷過一段很深刻的感情，雙方在沒有辦法之下分手，其後她無心工作，但過了這個階段後，她覺得自己很傻，回頭一看，覺得最緊要是自己的感受。
「跳樓」謀突破
由於天生一副孩子臉，直到現在她仍多演楚楚可憐的妹妹仔角色，真不知是好是壞！今年她將在新劇《女警愛作戰》中演傻婆：「可能我個樣好楚楚可憐，以前成日做畀人蝦嘅角色，今次突然叫我做黐線婆都幾有難度，因為黐線冇一個界定，可以無窮無盡！」她的角色是一個悲劇人物，會放火、玩老鼠、跳樓、燒車……性格極端，藉以帶出社會問題，她笑言造型非常核突，跟「靚」字完全扯不上關係，但最難之處莫過於要她玩老鼠：「我最驚老鼠！拍嘅時候仲要捉住佢！拍完都仲好驚。」
認真唔再「玩」
轉眼間她已入行十年，拍過二十多套劇集，逐漸地，拍劇由興趣演化成職業，由最初覺得是一件好玩的事，到現在會努力切磋及鑽研，再也不會用「玩」的心態去對待演戲，換上專業的態度、認真的思考方式：「以前拍劇冇諗咁多，覺得好玩，依家係另一種體會，想用心去拍好每套劇，拍劇演好一個角色有好大成功感，好開心，令我更投入呢件事！」早前她跟視帝黎耀祥拍攝《造王者》，亦經常向他指教：「佢會教我做戲係點，仲有講吓人生上嘅事，做戲冇話要跟乜嘢模式去做，唔會好實質，同佢有好多對手戲，佢會幫我分析，例如有場戲我要喺情感上同節奏上表達到，可以將個情緒推高啲！」長江後浪推前浪，新進小花默默上位，憑《缺宅男女》「關二嫂」一角人氣急升的黃智雯就是個好例子，Elaine認為一切還要看天時地利人和：「例如《缺》劇同《我》劇播放嘅時段，《缺》劇本身就多咗個優勢，有嘅嘢要慢慢儲番嚟，我都想好似智雯咁有個角色令自己受歡迎，不過唔係你嘅就無法強求！」她暫時最愛自己在《我》劇的演出，最開心是家人晚晚睇電視支持，對她來說已是最大的鼓勵。
後記：想借種生仔
做「姊妹」做到麻木的Elaine希望三十五歲前可以結婚，最重要是趕生仔：「如果到時都冇對象，可能會搵個靚仔借種生仔，都要睇吓到時有冇呢個能力，同埋有冇時間照顧小朋友，真係可以一試！」
入行十年的姚子羚擺脫o靚妹可憐樣，嘗試突破演技。
姚子羚敢愛敢恨，正是天蠍座的特色。
姚子羚暫時最愛《我》劇的演出。（資料圖片）
Orignal From: 姚子羚爭一口戲
沒有留言:
發佈留言