葉翠翠冧爆激讚︰好在有家雄

 

前港姐葉翠翠與韋家雄在新劇中首度合作，更跨越身高差距共譜戀曲。現實中二人亦默契十足，家雄為「追」翠翠努力減肥，又異口同聲表示高度無礙戀情，翠翠更大讚家雄：「好在有家雄。」實行最緊要啱feel！



港姐出身的翠翠自言錯過不少機會，現希望重新出發。


高妹葉翠翠與韋家雄在新劇《4 in Love》中共譜長短腳之戀，現實生活亦因而傳出緋聞。首次拍攝金牌監製戚其義劇集的翠翠，明白每個角色均得來不易：「開頭公司叫我試造型，以為又客串，即係連名都冇嗰啲，冇諗過咁重戲份，真心多謝阿戚。（等咗好多年？）以前有咁諗，但依家唔會再計算，只怪自己以前冇把握機會。」問到是否因與黃有龍的一段情影響事業？她說：「其中啦！始終時間可以證明一切。」


翠翠與家雄搞鬼合照，默契十足。

最緊要啱feel

戲裏戲外，家雄為「追」翠翠絞盡腦汁，更瘋狂減肥迎合女方的竹竿身形：「翠翠話要減10磅襯番個角色，變相我咪又要減囉！」而翠翠亦甜爆說：「好在有家雄咋！如果唔係都冇呢個效果。」對於屢被指「高攀」翠翠，家雄笑說：「總搵到個矮過我嘅！之前衰在喺微博寫咗要keep住啲情懷先畀人炒作。」問到現實中會否介意「長短腳」？二人啱嘴形的指「最緊要啱feel」。翠翠更自爆於國外登台時曾遇上心儀男士，可惜礙於「冇guts」交換電話而告吹。

呻淋雨戲難頂

此外，談到最難忘的一幕，「高矮配」心有靈犀地大讚在石板街的浪漫談情戲，翠翠又大呻淋雨一場戲最難頂，她說：「開頭覺得炎炎夏日拍淋雨戲好好玩，點知第二次再拍嗰陣咁啱發燒，一淋水就好凍，骨頭都震散埋，Roll機嗰陣個嘴都係咁震。」

採訪：阿彭

攝影：林蔚恩

場地：柏景餐廳@皇家太平洋酒店

---

Orignal From: 葉翠翠冧爆激讚︰好在有家雄