面對面
亂世佳人 賈曉晨
2012年02月08日
「北方有佳人，絕世而獨立。一顧傾人城，再顧傾人國。寧不知傾城與傾國？佳人難再得。」從現代的角度來看，這首漢朝歌曲〈北方有佳人〉根本是一首廣告歌， sell的是北國佳人的冰姿麗妝。被山東濟南水土養大、擁回族血統的賈曉晨（ JJ），跟這首曲搭不搭，見仁見智，至少同為女人的我，也被她電倒，倒是事實了。
訪問當日，正是「反蝗」廣告出街之時，加上財政預算案公布，同日 C1又指 TVB清算叛將而冷待劇集《飛虎》。一天內，國事、網絡和電視城硝煙四起。問參演《飛虎》的 JJ有何看法，倒不如看她如何拆解同胞間的族群仇恨更有意思。
「其實我有時都好嬲，體會好深，我要努力不停在香港交稅，再等 7年先再攞到身份證，但原來可以衝過關、生個 BB，就可以搞掂，咁對我呢啲靠努力、一步一步做嘅人嚟講好唔公平。我都交咗咁多年稅啦，佢哋（雙非孕婦）分薄緊嘅資源我都有份畀，但係派錢又唔見有派畀我喎，所以自己都唔鍾意呢啲行為。但將心比己，佢哋都唔係壞人，只係為咗自己後代着想，根本出問題嘅係個政策……」
比起北大孔某、唱蝗網友，在亂世中，像這樣一個沒被傲慢與偏見蓋過理性與感情的人，其實比傾國佳人更難得。
拂了一身 還滿
"以前後生啲會有力啲，後來被人鬧得多姣，眼神已經溫柔咗。"
來港 7年、今年 29歲的 JJ，把廣東話愈說愈靈光，我聽回錄音，差點錯認作衞蘭，這全靠她去年在 TVB一劇接一劇，磨練而來。
拍劇真係幫咗我好多，迫你要講好多嘢，學得好快，我都想繼續拍多啲電視劇。就算舊年《打擂台》攞咗金像獎「最佳電影」，但因為係藝術片，又唔係超級多人會追睇，所以舊年大家都覺得我失咗蹤。其實舊年係在 TVB嘅「耕田期」，有好多人問我「你去咗邊呀？」，今年就出（劇）囉。
除了剛播畢的《缺宅男女》飾演單純自閉妹外， JJ有份演出的劇集還有《飛虎》、《怒火街頭 II》、《耀舞長安》和《名媛望族》，難怪有報道指多得老闆「殼王」陳國強帶挈，在 TVB的劇集戲分愈加吃重。
真係有眼睇嘅人係見到我做嘢係一步一步，我冇突然間變咗做女主角，又或者好多戲分，我都係每次多啲加啲咁，都係監製用完呢次覺得 ok，下次再搵我就多啲戲分，高層係從來冇參與過任何嘢。咁我都想佢哋可以參與添！但我都見唔到所謂嘅老闆啦，佢哋又點會記得我哋啫？同埋係報道講啫，都冇人證明到佢（陳國強）係我哋老闆，佢曾經可能買過我哋公司（ SNAZZ），但好似一早已經賣咗。
其實拍劇係監製想用你，你先會有戲拍，如果唔係，你喺邊度都冇用。舊年我一個騷由 300蚊加到 1,000蚊，絕對係加咗 120%，但你知唔知新人出嚟仲高過我呀？你本身過低嘅話，加咗當然覺得好多，但我加完都仲係人哋最低人工咋。
開始在 高潮之後
在濟南中醫大學讀針灸及推拿、自言「唔入行就應該做個江湖郎中」的她， 03年簽約香港經理人公司來港發展，憑在《味分高下》擔任味之天使「梳打」而廣為人識，但經典一役仍是在參加《獎門人》以高潮眼啜乒乓波。
我唔係一出道就一帆風順，我都做咗好多我唔想做嘅嘢。其實我係超級唔想做「味之天使」，經理人最清楚，當時佢仲幫我傾緊套電視劇，已經有七成得，我仲好開心話有得拍古裝添，跟住仲有一部電影想搵我做女主角。突然間因為 Wilson（監製錢國偉）搵我做「梳打」，全部都冇晒！我嚟香港係拍戲，冇想過要做呢啲！當時我一路喊住做，但估唔到呢條路會幫到我人氣。
路不轉人轉，國內同胞的優勢依然是肯搏肯捱，加上 5呎 4吋高、 33B身材， JJ不難鶴立雞群，偏偏「姣」字上身，成了註冊商號。
第一次入電視就做一個花瓶咁企喺到，啲衫性感加上我天生對眼戚戚哋，個樣望落好似好姣咁，但我同自己講就算做布景板都要做最靚，所以每次都要企到最好睇！於是開始有人留意到呢個女仔好搶眼，就搵我拍《內衣少女》呢類角色，跟住公司幫我出寫真集，啲人就覺得我賣性感。其實我只係有咩就做，從來都冇揀過嚟做。但估唔到我吹乒乓波贏晒啫！
好似之前杜琪峯搵我拍《單身男女》要性感嘅，跟住到《奪命金》又完全唔同，因為演員就係要你做咩似咩，所以冇理乜嘢形象㗎，你叫我性感我一樣做，你叫我扮妹都照扮。所以做《缺宅男女》時，啲人同我講「估唔到你咁清純！」，咁我係演員嚟嘛！我希望大家唔好只係記得我吹乒乓波囉，起碼有個角色大家記得，好似 Laughing哥咁成功。
在今年重頭劇《怒火街頭Ⅱ》， JJ取替上集已死咗嘅 陳敏之，扮演新移民揼骨妹心心，和李璨琛成一對，但 JJ話：「日日在微博都見大家留言叫阿 Sam（李璨琛）唔可以同我一齊。」
在《缺宅男女》扮清純大學妹， JJ說：「最常搵我拍戲就係張乾文（《缺宅》監製），我好感激佢第一個畀機會我拍《絕代商驕》，然後又搵番我拍《缺宅》。」《壹週刊》圖片
JJ與馬國明在《飛虎》演雌雄大盜，戲分貫穿全劇，劇集被安排在週末炮灰檔播放，佢話：「其實一開拍就已經知係電視電影嚟，放在嗰個時間好正常。」網上圖片
唔通我包到 上條頸去咩
尤其初初拍電影，唔會畀你做主角，通常小老婆、第三者都搵我做，慢慢大家都將我定咗型係姣姣哋。但係大家都只留意到性感，喺《打擂台》我都好清純㗎，但係冇人知。（金像獎）頒獎禮唔通我包到上條頸去咩？咁我天生有呢樣嘢（身材）冇辦法，咁條裙擺喺度好靚，點知一着上身就咁勁效果，自己買咗唔通唔着咩？我諗住結婚時着多次㗎！
影相、做戲都要交戲，但係大家畀我影相嘅衫有幾清純吖？冇理由個妝同件衫係性感，但你個表情就扮清純……我就一係做、一係唔做，唔會成件事做一半。我已經留直把頭髮，但眼神……唉，如果你好冇神嘅話，感覺係純但大家睇過就算，但如果你眼神加啲力，人哋都會睇多你兩眼，呢個都係一種專業。
其實我已經減咗（電力）喇，以前後生啲會有力啲，後來被人鬧得多姣，眼神已經溫柔咗。本身我對眼天生好剔，我畫眼線都改向下畫，之前黐雙眼皮膠紙我都專登黐到闊咗，等對眼望落圓啲。我自己都有諗辦法等自己望落去冇咁姣，我都好專業㗎！拍《缺宅》時我同監製講，個女仔係自閉嘅又唔敢講嘢，齊蔭會啱啲喎，咁監製又覺得都啱喎。好似「關二嫂」係好爆，當戲裏面個個都係好人，佢嘅對白又咁搶，係好容易跑出，而我個角色係唔爆又好平，但我惟有做好啲內心戲。
去年在電影《打擂台》中 JJ專登剪短頭髮扮功夫少女，唔算特別搶鏡，但在金像獎頒獎禮上，以一襲低胸裙就輕易搶盡風頭。
JJ嘅「高潮眼」已列入「獎門人」經典場面，但佢反而唔忿氣話：「我留意過其他女仔玩嘅時候，都係合埋眼，唔明點解焦點落咗我度！可能天生冇辦法。」
怕被定型為「姣」，原來 JJ更怕談年紀，比她小一歲的我，索性拋磚引玉自揭「中女」身份，已嚇得她哇哇大叫。
唔講年紀呀！反面呀！女仔過咗 25歲都唔想再講㗎啦，除非到我結婚時，就會講「我幾多歲結婚喇！」哈哈！其實我唔係介意、唔係怕老，你有得經歷老，證明你好運囉。
提到年紀自己會好緊張，係因為覺得自己事業又唔成功喇、又搵唔到另一半，好多嘢都未做到，所以唔好好似 deadline咁提住我。我應承咗爹哋媽咪話會接佢哋落嚟香港住，一講已經講咗 7年，但講咗咁多年都做唔到，有時都會覺得有壓力。其實一啲都唔容易，首先住啦，要買夠大啲屋畀咁多人住；第二證件啦，我都仲攞緊工作證。家啲樓價愈來愈貴，令我覺得成件事（置業）好遙遠。我覺得我真人應該係鍾嘉欣個角色，買唔到樓畀屋企人住嘅樓，而我唯一願望就係可以一家團圓。
JJ來港即獲《美女廚房》監製錢國偉邀請並成為「美少女廚神」，之後更在《味分高下》中以天使妹「梳打」跑出。
讀大學時， JJ已參演當地電視劇及電影，在電影《茶色生香》中有出浴鏡頭，「其實好多拍咗都冇咩人睇過㗎！」
奇勒雞堡
有關 JJ的緋聞，近年都圍繞着 TVB藝員、有「翻版古天樂」之稱的沈震軒，更有指兩人已共賦同居。「我桃花一路都有，圈外圈內人都有，但我考慮緊好多嘢。我自己一直想低調，因為好怕麻煩，又要解釋又要講，雖然呢排興公開，但自己都唔鍾意。所以呢個係我唔成功嘅原因，哈哈！」
但談到吳卓羲的「姐仔屠夫」稱號時， JJ笑得人仰馬翻並說：「佢咁靚仔，同花旦拍拖有幾奇？除非佢好醜樣，我就會鬧『你做咩溝咁多靚女呀？』卓羲咁靚仔，益咗對方添啦！假如我鍾意佢，第一都係因為佢靚仔，跟住先係覺得佢性格好。因為我初戀男友唔靚仔，所以一定要搵個靚仔，同靚仔拍過拖，『更』（今）生無憾呀！」其實我想說，你個「奇勒雞堡」都唔失禮啫！
偶像是古天樂嘅 JJ，自 10年與沈震軒因拍攝旅遊節目而傳出緋聞，更被多次拍到二人拍拖相，有指公司棒打鴛鴦， JJ話：「其實公司只係希望我哋以事業為重先，咁我都係咁諗。」
撰文：孫月華
攝影：林子賢@Popcorn Production
髮型： Kel@HH
化妝： Zoey Chin@STAGE Bridal Academy
形象： Bryan@the Flaming
服裝： Y&Y、 CANARY
場地提供： Hill oyster bar& grill
Orignal From: 亂世佳人 賈曉晨
沒有留言:
發佈留言