青靚白淨
留鬚講數 林峯保 chok樣「驚好污糟」
2012年02月08日
年頭林峯憑〈 Chok〉攞到《勁歌》金曲金獎，搞到全城嘩然兼成網友惡搞新目標。
不過你有你玩，峯少喺無 綫一哥地位依然不變，新劇《雷霆掃毒》 chok峯造形要學 Law霸留鬚玩頹廢，辛苦留咗兩星期，不過監製仍嫌未夠 feel，上週四（ 2日）更親到外景現場，同林峯講數，想佢鬚根加碼。點知 chok峯一句：「我驚好污糟喎！」監製即時收聲。
雖然 chok峯轉頹 look，不過 chok樣依然，上週四（二日）同官恩娜拍車戲，鏡頭一 close up，即刻 chok個殺女樣出嚟。
人哋偶像派，監製你要求高咗喇！
32歲林峯入行至今，一直行靚仔偶像路線，由《溏心風暴之家好月圓》到上年 嘅《不速之約》，林峯每次都 keep住靚樣兼白到反光，到新劇《雷霆掃毒》做差佬，林峯反傳統要留鬚扮頹廢，對峯哥已經算突破。
撻朵免場租
林峯為頹 look不惜唔剃鬚兩星期，千辛萬苦留到上唇位少少鬚根。上週四（ 2日）《雷》劇到將軍澳中心六福珠寶金行拍攝，據知今次全憑林峯身為「六福珠寶」代言人，林公子碌人情咭，《雷》劇先唔使錢租用場地，金行更停做 3小時生意配合，仲出動店內職員做老臨。幫 TVB慳足幾千蚊，難怪 chok峯即使當日遲 咗 45分鐘到現場，監製林志華及導演都唔敢詐型。
林峯咁大犧牲唔做靚仔，除留鬚外，仲要每日做 gym變粗獷，不過《雷》劇監製林志華嫌 chok峯未夠頹，鬚根未夠多，當日踩場叫林峯兩邊面頰加碼再留，可惜 chok峯身體流住靚仔血，一句話：「我驚好污糟喎！」監製即讓步：「咁由佢囉！」事後林峯亦表示：「監製想我兩邊再留多 啲，不過我兩邊鬚根唔密 㗎！冇計！（今日你出面問六福借場喎？）…… er……可能啦，哈哈，不過六福一向好支持我同 TVB㗎！」咁識做，留鬚呢啲，好閒啫！
監製林志華見到林峯，即要求佢留多 啲鬚，不過林峯就話驚望落太污糟喎，其實咁靚仔，成面鬚都唔怕啦！
上年鄭嘉穎憑《怒火街頭》 Law霸頹 look，由霉穎升做視帝，身價仲升到 25萬人仔一集。 chok峯呢次又係玩頹 look，唔知掂唔掂呢？
扮瞓鬆懈
之後峯少喺車入面扮瞓覺， chok樣一時鬆懈，雙下巴現形！少少啫！
官恩娜同林峯一樣 32歲，今次做林峯手下，之後亦有感情線，為咗做好個差婆 look，官恩娜不惜淡妝上陣，就算高清見殘樣都冇所謂，專業！
峯哥今次幫公司免場租拍劇，無 綫亦識做，搵《東張西望》 嚟探班，互相幫忙啫！
林峯上年 12月先開始成為六福珠寶代言人，雖然廣告有網友話似鬼手，不過有人講即係有人留意啦！
林峯憑〈 Chok〉得到金曲金獎，成為討論區紅人，更有不少網友將佢得獎片段惡搞，總點擊率達 300萬次。
一拖二
新劇《雷霆掃毒》除林峯，亦有苗僑偉做大反派，女主角有吳綺莉、徐子珊就同官恩娜爭林峯，卡士強勁，分分鐘今年係台慶劇。
Chok到澳洲
3月林峯會去澳洲墨爾本、悉尼開演唱會，最平 99澳幣（約 822港幣），最貴 299澳幣（約 2,484港幣），比起上年張學友澳洲巡迴演唱會最貴飛都係賣 288澳幣（約 2,388港幣），林峯仲貴過學友，真係勁呀！
小生愛貪靚
做得明星實貪靚，就算係小生，只要影響到個靚仔樣，一樣會發難，除 chok峯唔肯留到成面鬚，黎明都因為自己腳趾唔靚，連王家衞叫到都唔肯露。
黎明唔露趾 《墮落天使》
王家衞和美指張叔平在拍攝期間曾要求黎明着人字拖，可惜黎明以自己腳趾唔靚為由拒拍。
華仔拒光頭 《投名狀》
出名拍戲乜都得嘅華仔， 06年拍《投名狀》，導演陳可辛要求華仔剃光頭，不過華仔就以當年人人掛住打仗，應該無時間剃頭為由，最後剪 skin head就算。
鄭嘉穎唔黐鬚 《鐵馬尋橋》
09年鄭嘉穎拍《鐵馬尋橋》，監製李添勝曾要求鄭嘉穎黐鬚，令角色更加成熟，不過嘉穎嫌唔靚仔，最後打甩唔使黐。
Orignal From: face 246 林峯
沒有留言:
發佈留言