為迎接打到嚟的免費電視大戰，鬧小生荒的無綫唯有依賴外援搶收視兼救亡，從而造就了重頭劇《衝上雲霄2》的「靈魂人物」吳鎮宇惡晒，一把年紀仍然扭計，最後以8萬元一集兼會「累街坊」的條件接拍。據知鎮宇回娘家「幫拖」的附帶條件，就係要遷就他的檔期，好讓他跟周潤發拍完電影《杜月笙》後才歸隊，結果《衝2》由原先六月開工延至九月份，搞到一眾無綫等入劇組的小生、花旦如胡杏兒、陳法拉及林峰等工作要重新安排，檔期立立亂，TVB經理人部門怨聲載道。
無綫打算翻炒03年叫好叫座的經典劇《衝上雲霄》吸引廣告商及演員，可惜事隔九年，原班人馬買少見少，葉璇、陳慧珊out咗，當年有份做「S4」的黃宗澤要拍內地劇，陳鍵鋒跟馬德鐘已成「叛將」，雖然續集加入重量級外援張智霖（Chilam）及親生仔女陳法拉同林峯等等，但始終跟當年飾演型仔飛機師的「靈魂人物」吳鎮宇無得比，而且鎮宇自04年後便絕跡視壇，對觀眾而言，新鮮感勝一切。無綫靠呢個重頭戲「食胡」，經內部開會商討後，拍板決定今次就晒吳鎮宇，難怪當事人咁得戚，回應以八萬一集接拍《衝2》時表示︰「唔只呢個數目，TVB唔會出手低。」
攝期拍劇補鑊
據知，近年事業、運氣受阻滯的吳鎮宇經常求神拜佛，期望行好運，今次食晒電影及電視劇兩家茶禮，賺到錢外更賺埋人氣。「無綫時勢造英雄，TVB乜都就晒吳鎮宇，搞到佢自我膨脹！原先話咗唔會拍《衝上雲霄2》，見有機可乘楔到個靚位，突然轉軚，仲得一想二，要求全組遷就佢個檔期，最難得TVB又答應，開工檔期同排位都唔同晒，真係玩死原先諗住掛頭牌嘅張智霖！有份演出嘅無綫親生仔、女都唔好過，因為佢哋檔期排到密麻麻，依家陣腳大亂，六至九月吉咗個期，TVB拿拿聲安排佢哋拍一部時裝劇攝時間去補鑊，總算將件事擺平。」知情者爆料道。
《衝上雲霄》有幾威
03年以航空業為題材的《衝上雲霄》收視最高37點，成功捧紅主角吳卓羲、陳鍵鋒、黃宗澤、馬國明，當年四人更被喻為「S4」，迷倒不少女粉絲。加埋吳鎮宇及馬德鐘兩大型仔機師壓陣，大受觀眾歡迎。年底無綫將開拍《衝上雲霄》續集，重本製作，林峯將會取代陳鍵鋒一角，成為全新「S4」一員，戲分更會度身訂造。
TVB人好大方
無綫製作部助理總監梁家樹坦承：「係就吳鎮宇拍戲檔期而遲咗小小開拍，檔期係互相遷就，唔好講到全世界要就晒佢一個咁負面。」
胡杏兒：「我收到內部消息，但就唔太清楚原因，就算真係全世界遷就吳鎮宇都無問題呀，佢係影帝嚟嘛，我只怕拍唔到啫，聽聞係會先開一個時裝劇，一切由公司安排啦。」
陳法拉、馬國明則懵然不知，前者：「一直都話喺五月中開拍喎，我唔知呀！係真定假㗎？」後者反問說：「點解會咁呢？不過，拍劇向來都要度期嘅，要互相遷就。有份參與重頭劇已好開心，就下都無所謂啦。」
Orignal From: 《衝上雲霄2》延期開拍 吳鎮宇玩謝TVB
沒有留言:
發佈留言