鄭則士見盡娛樂圈的光怪陸離，雖對無綫政策有微言，但仍對此公司有道義，暫時未諗過檔。攝影：葉君海
雖然有視帝黎耀祥和影帝鄭則士助陣，不過無綫劇集《盛世仁傑》仍逃不過被冰封的命運，事隔四年才破冰而出，成績叫好又叫座，總算為劇集畫上完美的句號。
同祥仔合作舒服
雖然外界一直盛傳黎耀祥與 Kent哥不和，原因當然是「一山不能藏二虎」，不過 Kent哥說：「我同祥仔拍過電影同電視，一直合作得好舒服，就算家佢做咗視帝，都冇改變佢自己嘅特質，我哋冇去諗點去搶對手啲戲，淨係會諗點樣演好嗰個角色。」
劇集的成功，除了有賴演員的表現外，檔期的配合亦同樣重要，不少演員聽見長假期便嘆倒楣， Kent哥淡然地說：「有啲人話復活節係炮灰檔，乜嘢叫炮灰檔？之前《情越雙白線》夠有人話係炮灰檔，結果收視咪又係好好，對於我嚟講有得播已經好開心。」 Kent哥早前曾公開斥此劇曾被某監製「參考」，因而令劇集再三被抽起， Kent哥不吐不快說：「公司政治問題係估唔到，我哋啲小演員冇得出聲。」
鄭則士曾兩奪香港電影金像獎影帝，演技一早被肯定。《忽然 1周》圖片
鄭則士的《何必有我》當年感動不少觀眾，合演的還有另一影帝周潤發。資料圖片
努力站在最前線
鄭則士與黎耀祥的另一套劇《造王者》被喻為最受觀眾期待。資料圖片
Kent哥入行 36年，先後擔任幕前和幕後不同的崗位，嘗盡娛樂圈苦與樂，但 Kent哥從不會以前輩自居，更自封「厚底新人王」，他笑說：「我哋輸嘅係青春，贏嘅係經驗，演戲世界就係要有共同語言先可以溝通，只要你一講自己係前輩，好多嘢就會停晒，呢行係要不停去行，你今日狀態好好，唔等於聽日都係，所以要不停 update自己。喺創作過程上，大家應該不停互動，今時今日我都不停睇新嘢，你要企喺時代嘅前線，做唔到就會退後，越退就越遠，脫離咗就可以收工。」
即使經驗老到，亦有老貓燒鬚的時候， Kent哥說：「我試過俾人插，嗰陣啱啱返嚟拍劇，入廠開工唔夠一個禮拜，有演員同我講，話佢都有創作空間，唔能夠聽晒你講，我惟有同佢講對唔住，我冇諗過令你唔開心，只不過想件事好。邊個？我梗係唔會講，亦唔想追究，但係我哋跟住冇再合作。」
Kent哥更有感而發地說：「以前啲前輩寫低晒啲連戲衫、情緒，好注重自己啲成績，家啲哥哥姐姐，叫做有啲人氣，就鍾意舞台嘅感覺多過拍戲。我覺得只要有感情，將生活嘅嘢擺入角色，將角色變成有血有肉嘅人，我家比較唏噓，呢啲情況真係比較少。」
深信有危便有機
對於不少無綫的資深員工相繼離巢，問 Kent哥覺得會否影響劇集質素？他說：「其實我覺得冇所謂，有危就有機，人冇運氣唔出奇，但係唔會一世冇運，機會係為有準備嘅人而設，只要有能力，可以承受到就可以有機會上位。」
至於會否轉投新電視台拍劇， Kent哥說：「我同王維基有傾過，但係我覺得未係時機，今年我會主力返內地拍劇，反正都係年幾後先拍，不如留番到時先算，況且無綫呢個地方等咗幾年先返嚟，拍咗部劇又對我好好，仲欠你乜嘢先？無謂一叫你就即刻走，人要講啲道義。」
Orignal From: 有話兒：鄭則士自封厚底新人王
沒有留言:
發佈留言