2012年4月27日星期五

拍《拳王》頻爆粗視帝鄭嘉穎遭圍插

忽然1周第874期

娛一叮

拍《拳王》頻爆粗　視帝鄭嘉穎遭圍插

2012年04月27日
去年成為雙料視帝的鄭嘉穎，片酬升呢外，原來氣燄亦逼人！

有傳在拍攝《拳王》時，鄭視帝狂擺一哥款，囂張態度，得罪晒一眾前輩。一向躁底的他，不時在片場發難，與對手上擂台對打時，對方不但要硬食他的鐵拳，更被他粗口問候，最後要黃浩然做和事老。

囂爆犯眾憎，除了劇中拳術顧問兼演員冼灝英插鄭嘉穎「格衰」，李家鼎寸爆話「冇演員道德！」外，黃澤鋒亦力證︰「拳館學員俾人 XYZ！」個個鬧爆！

拍《拳王》頻爆粗視帝鄭嘉穎遭圍插

鬼叫我紅咩！（設計對白）《壹週刊》圖片

4月 16日，李家鼎與兒子李永豪接受《今日 VIP》訪問，說到拍攝《拳王》時，鼎爺滔滔不絕：「希望做演員，接咩劇都好，揸車好、騎馬好、打拳都好，用心去演，唔好話依家上咗一哥位，求其交代兩下……」明顯意有所指。
接着鼎爺更鬧爆：「你自己喺度 fight（打），人哋唔擋你，仲要鬧人，行為好唔要得，唔好當自己係大哥，我最憎！」雖然未有指名道姓插鄭嘉穎，不過答案呼之欲出！
去年 4月開始拍攝《拳王》時，鄭嘉穎已經被傳媒指他公子病發犯眾憎，喝導演收「嗲」、要全世界呆等他埋位，及嚴禁在他面前提陳豪同林峯等。其實鄭嘉穎躁底已經唔係秘密。「拍《拳王》時，佢成日都黑口黑面，有拳手問佢識唔識打泰拳，佢半桶水都冇就扮識。佢識舉鐵（做 gym）唔代表識打拳，係兩樣嘢嚟。套劇任何一個都好打過佢，佢接手（防守）都未識呀！」知情者說。

鄭嘉穎主演嘅《拳王》，被多位武術前輩抨擊，首周高開 29點，但林國斌同盧惠光指「連泰拳基本手勢都做錯」，真係失禮！

冼灝英是《拳王》拳術顧問及演員，劇中不時與鄭嘉穎同場演出。《蘋果日報》圖片

劇集顧問冼灝英
佢格衰，永遠都好晦氣。（真實對白）

劇中評判李家鼎
佢自以為是，冇演員道德。（真實對白）

劇中教練黃澤鋒
人生總有起落，佢好自為之啦！（真實對白）

李家鼎同李永豪接受《今日 VIP》訪問時，鼎爺暗插鄭嘉穎唔用心去演，仲要無故鬧人。

打到手痛發難

2010年林子善同鄭嘉穎合作《鐵馬尋橋》，已爆鄭嘉穎在化妝間橫行霸道，曾經將他的鞋踢走。

為拍此劇，鄭嘉穎跑步做 gym狂減十磅，成功操出鋼條身形。不過，與銅皮鐵骨的真正拳館學員對打時，負責打人的鄭嘉穎，試過有次因為打到手痛發忟憎，於是粗口招呼對手。「教練都怕整親男主角，已經吩咐拳手要墊 pad。吖，佢打完人仲要粗口鬧人，對手都頂佢唔順，話︰『唔係嘛，我已經俾你打，仲要俾你鬧！』黃浩然即刻做和事老話︰『佢唔係×你，佢忟自己啫！』」知情者說。

本刊就此事求證在劇中做評判的李家鼎，他不但力斥鄭嘉穎有發爛渣，更直認早前接受訪問暗寸鄭嘉穎，他說：「佢（鄭嘉穎）個人係咁，公司寵壞佢。佢不嬲都冇乜人緣，自以為是，我哋都慣晒。佢冇專業精神、冇演員道德。蠢唔緊要，你要去學，唔可以賴忙。徐子珊夠忙啦！人哋都有時間去學，唔好怨冇機會，有機會又唔珍惜。（你會唔會提點佢？）我唔會提點呢啲人，總之『水上划龍船，海岸有人見』啦！」

飾演教練的黃澤鋒亦話：「鼎爺講嘅都幾中肯，佢係前輩唔會老作，佢有碗話碗！我拍《拳王》對得最多係黃德斌、郭少芸，佢哋冇令我半點唔開心。（咁鄭嘉穎係咪躁底？）佢血氣方剛，拳館學員好刻苦耐勞，俾人 XYZ完，轉頭就冇事。一套戲賺得最多嘅係男、女主角，其他人係陪襯，配角都係幫佢，希望佢可以體諒其他人，要有尊重。鼎爺做評判，睇唔過眼咪鬧囉。人生總有起落，佢好自為之啦！發哥都係天王，入埋荷里活都好有修養。」

負責《拳王》拳術顧問的冼灝英，早前講到鄭嘉穎亦好勞氣：「佢個人冇咩，係格衰之嘛！對人永遠都好晦氣，而且性格非常自我。每次拍攝拳腳場面時，我一定做足功夫，度好晒位，但佢永遠唔信要質疑。最後知道我講嘅位置係最好，咪跟番我囉。」

唐詩詠：佢個人係躁啲

雖然遭幕後及二線演員插爆，但劇中主角就維護鄭嘉穎。飾演他女友的李詩韻更讚他夠真夠爽：「有意見都係為件事好，我接觸過嘅嘉穎一啲都唔寸，反而性格好真好爽，我哋仲可以做到真正朋友。」唐詩詠亦幫口︰「我見到嘉穎好好，收工有請大家食飯。（佢係咪成日發忟憎？）相信佢都係忟自己，要 on duty又冇得瞓。個人係躁啲，佢躁自己啫！」
至於黃浩然就否認鄭嘉穎有同拳手口角︰「話我係和事老？冇咁嘅事，冇發生過。」本刊曾向鄭嘉穎求證，鄭嘉穎透過電話訊息表示不欲多談。
姑勿論工作太忙變得躁火定擺大哥款，搞到工作氣氛火藥味咁濃都唔係好事。鄭嘉穎貴為視帝，出自真心定係演技都好，佢都應該爭取多點「人和」！