面對面
刺鳥 林欣彤
2012年04月18日
北歐傳說有一種一生只鳴叫一次的鳥，離巢之日便尋找世上最長之荊棘，當找到時就將之刺進胸膛，在痛苦中引吭高歌，而歌聲因劇痛而昇華為淒美之音。刺鳥的悲情在，比求之得苦，求之不得更苦。
在只有 21歲的林欣彤（ Mag）身上，我看到刺鳥的影子。「我不斷向公司爭取緊專注番在音樂，始終你肯 focus時間去一啲事上面，最後點都會有成正比嘅得着，你花得多就會得到更多。而我入行最想追求嘅始終都係音樂。」最近為擔正新戲《起勢搖滾》宣傳的 Mag，有氣沒力的說道。
前年她憑《超級巨聲 2》勝出並竄紅，成為名利雙收的新人王，代價是身不由己的無奈。「初入行時有好多嘢唔明，原來我認為專業嘅準則，同行裏面認為嘅專業係好唔同……我要求自己演繹到 100分，但原來公司覺得交到出嚟就算……自己會好 confuse，我覺得自己應該（付出） 100%，至少都有 80%嘅精力放喺唱歌上面，但之前拍電影又做好多其他嘢，我都唔知有冇 40%放喺練歌……家用另一個角度睇番，都係一個磨練嚟……我都要學習接受同原諒自己。」正如刺鳥的宿命，從來凡是美好、重要的事物，都需要以代價來換取。
查找不足
只要我一日未啞都可以唱嘛！
被譚校長稱讚「加持」為「香港樂壇大姐大勁敵」的 Mag，自前年勇奪《巨聲 2》冠軍一炮而紅後，即獲簽約 8年的無綫力捧，去年初再賣身英皇 3年，同年 8月推出的處女大碟《 Vocalist》達到了白金銷量，然後在樂壇四大頒獎禮上橫掃新人獎，人氣一時無兩。
去年在「娘家」演出電影《我愛 HK開心萬歲》，今年則有今週上映的《起勢搖滾》和年中上映的《 DIVA》，在電影發展算得上大豐收，但 Mag反而瞇着那雙招牌「腰果眼」跟我訴苦：「其實我每一個訪問都會講，自己真係好想專心番喺音樂，我都成日同經理人講。我已經盡量爭取休息、練好每一首歌，錄音時會打醒 200分精神，聽番上一隻碟，嘗試搵之前有咩不足。
「咁我都係一個人嚟，有時因為咁而唱得唔好，都會好唔開心。有次我上《巨聲 3》唱〈手下敗將〉（關心妍原唱），之前一晚 8點幾先收工，返咗去瞓幾個鐘就又要返去錄影，我真係好想有充足嘅狀態，但我知好難配合到囉！
電影《起勢搖滾》中 Mag與樂隊「 Mr.」主音 Alan演繹一對熱愛搖滾樂的情侶，「起初我以為『 Mr.』佢哋會好 cool，但原來全部都係傻㗎！」
「其實自己都冇打算做歌手，我見就快畢業，於是走去參加比賽。我就嚟大個女，要出嚟做嘢，咁不如去一個大啲嘅（舞）台表演啦。你在 TVB只係唱一首歌就已經有好多人聽到，係一個好大嘅烙印，對臨出社會嘅我嚟講，係一個好好嘅回憶。」 Mag諗中五時，第一次參加校際歌唱比賽奪冠；之後在《十八區歌唱大賽》也拿了第一，在 10年就讀 IVE（青衣分校）航空與客運服務高級文憑課程時，更躍躍欲試，越級挑戰《超級巨聲 2》。即使名落孫山，她亦只當是遊戲一場，沒打算爭取入行做歌星。
「其實自己都有一大班音樂同行者，本來我同三個中學嘅男同學夾開 band，叫『 MARY』。隊名求其改。因為有次我哋要出商場 show，突然前一晚商場負責人要我哋交個隊名，於是我就將我哋英文名嘅字頭拼埋一齊。其實都可以叫『 Army』嘅，但自己覺得最緊要係音樂啫，叫咩名冇乜所謂。」最後自己「無心插柳」成了職業歌手。「我係咁諗 㗎，鍾意做音樂而唔係想做歌手。自己返一份正職，然後有時出嚟表演嘅話，其實係最開心。」
身不由己
有指 Mag在電影《 DIVA》被大師姐兼第一女主角的容祖兒打壓而被減戲分，「 Joey冇必要咁做，佢冇需要在我呢個人身上爭取囉，而且佢對我好 nice，成日會同我傾偈，問我慣唔慣。」
事實上，她不單比同期的巨聲幫早出唱片、拍電視劇和電影，際遇差距遠遠拋離同儕。「其實我好幸運，自己都感受到大家都好鍾意音樂、想唱歌，我都好想佢哋可以同我一齊行呢條路，但都會戥佢哋開心嘅，可以試到唔同嘅嘢。我都希望佢哋唔好放棄。」反正早已得道成仙，若換轉自己去擔任節目主持劇集閒角等，蟄伏於電視城等待機會，真的可以處之淡然嗎？「我諗我都接受到，就算職業唔係歌手，我都可以繼續唱歌 㗎。」
Mag雖被稱為「小巨肺」，但真人說話氣若游絲，除了訪問當天抱恙在身外，自小氣管已不好，從中學起更常有耳鼻喉的小毛病。「第一次（《超級巨聲》）面試試音，自己緊張到聲帶都要『閂』埋。又記得最後一集決賽病住上台唱。」甚至去年底因工作劇增， Mag每日只有 2、 3個小時休息而暴瘦 20磅，本來身高只有 5呎 1吋、體重不足 100磅的她，更見孱弱。「因為當時唔夠瞓又好忙、又冇得休息，啱啱入行時就會搏命食好多嘢，因為驚唔夠體力，後嚟直頭 到唔想食，有時到淨係會發吽豆。」
Mag個子嬌小但聲音爆發力十足，演唱 G.E.M.的歌曲〈 A.I.N.Y（愛你）〉成《超級巨聲 2》最高得分，網上點擊率亦超過 200萬。
今天總不會還有純賣歌藝的歌手吧？難道歌影雙線發展，自己沒有預料過麼？「完全冇，當時接到（拍戲通知）都話『吓，我唔識㗎喎！』，但佢哋就話『得㗎啦！』，我自己又冇上過堂，又冇（被） brief過。」那麼，無綫有跟你商量過簽唱片公司的事嗎？「其實係完全冇 㗎，都係非常後期至知。」總不會簽約前一晚才通知你吧？「類似啦，總之係好『抿』，真係好突然，家諗番就算啦。最緊要唔係我喺邊間唱片公司。我係咪做歌手，我都會係咁樣唱。」簽錯公司如同賣錯身，總不會不聞不問吧！「我當時冇得 care、亦唔識 care，自己都冇能力，又或者自己都唔知可以點樣去諗呢啲事。因為我並唔清楚每間公司嘅運作，亦唔知佢哋（無綫）會同唱片公司商量我有咩方向。」
兩頭唔到岸
去年 2月英皇娛樂舉行春茗，宣布 Mag加盟，並將她形容為「超級高材生」，並擲千萬打造成小天后，而老闆楊受成亦與之祝酒。
「拍戲呢啲始終因為 TVB係我嘅 management，就算我冇簽唱片公司，都應該唔只淨係唱歌囉。始終凡事都有好嘅一面，我本身唔抗拒，而係唔想一切都堆埋一齊，而令我忽略咗原本應該專注嘅地方。或者你想我拍戲，又可唔可以嗰段時間只係專心拍戲呢？或者出碟嘅時候專心出碟呢？」但試問公司又怎會讓金蛋減產？「我知錢係好重要，但自己夠用就得。有好多嘢係錢比唔上、買唔到。
「我諗呢個係我其中一個有壓力嘅原因，我之前成日……覺得做得呢個行業嘅人，應該好有抱負，而唔係只為錢，但呢行始終係一門商業嘅行業。就算在商言商，我都覺得……只要我專心做一個好歌手，自然就會有口碑，亦會多人去支持，而唔係家我兩頭唔到岸！」
去年樂壇頒獎禮新人獎項，成 Mag與鄭欣宜（ Joyce）之爭，「其實我同 Joyce好 friend，大家會傾音樂、入行嘅嘢，大家都對唱歌有好高要求。」
去年她在獎項和銷量的成績，不少舊人歌手也給比下去，怎會「兩頭唔到岸」？「自己唔重視成績，成績好外在，每年頒獎禮有好多人都做得好好㗎，但獎就只得幾個，唔通就唔值得加許？冇獎就等於冇付出心血咩？我唔會覺得啲獎項係啲咩，唔會因為我攞咗呢個獎，我就開咗竅識唱嗰粒音，或者彈結他就有信心一啲。得獎可能只係在商業方面有幫助，可能賺多啲錢、多啲廣告商搵你，但在音樂上冇影響㗎。
「可能公司係重量唔重質，但我覺得應該重質唔重量。如果一個人俾你『啅』到佢嘅體力再支持唔到，又冇時間畀佢預備，就只會愈做愈差，咁樣其實係好短線囉。即係你做一件好劣質嘅 product，想賣 100件，同你做一件好嘅，賣一件就等於賣 200件。好似一套戲，有啲人會諗啲好短線嘅 gimmick嚟吸引人，可能搵一啲本來唔係唱歌嘅去唱歌，唔係跳舞嘅去跳舞。幾好吖，冇人試過喎，第一下可能會吸引到，但如果個 quality係好，就根本唔需要。」
我跟 Mag第一次接觸，是前年 8月第四屆台灣《超級偶像》冠軍曾昱嘉，來港當《超級巨聲 2》表演嘉賓，與參賽者 Mag鬥唱。那時候跟我分享合作感受的 Mag，是個沒包袱、狀甚無憂的快樂女生，然不到兩年光景，年青的軀體彷彿住了暮氣的靈魂。「有時自己都會掛住讀書時候，當時根本稱唔上咩壓力，但自己家仲身處個適應期，同埋自己唔會妥協囉，唔會降低自己嘅要求，希望搵到平衡。家自己（變得）好繃緊、深沉咗，因為真係好 呀，係 到我唔識形容！好多身邊人都同我講『你成個人好繃緊』，家自己都學緊去放鬆自己。可能自己太執着，而好多時好多人都唔會配合自己。身邊人都成日勸我，唔好只記住自己唔好嘅地方。……就算呢壇（歌唱）事業冧咗，我都唔會唔開心，只要我一日未啞都可以唱嘛！」
自《巨聲 2》比賽以來， Mag跟大兩歲的羅孝勇傳出緋聞，更被拍到進入男方住所，但 Mag卻說：「呢啲緋聞唔會影響我哋，我一樣會照同佢出街。」
Mag父任職機械公司倉務管理，而 Mag母則是全職主婦，家有一弟的 Mag，入行一年，已賺到 100萬首期買樓給家人。《壹週刊》圖片
荊棘裏的花
好歹也是身價 400萬的金蛋，我以為林欣彤必定被前呼後擁、以天之驕女之勢駕臨影樓，沒想到只有生了病的小妹妹拖着一個等身的行李箱，獨自乘車而來。比起一般明星，一人膽拖一羣助手經理人宣傳人員公司高層化妝師髮型師……；形單影隻的林欣彤，叫人生憐。
她反而說：「如果你望住人哋條路，根本就唔係行緊自己條路，而我覺得好多嘢都係隨緣。同埋點解你要跟住人行呢？點解唔活出自己條路呢？你係咪要預知咗個未來至敢行吖？我覺得我會有屬於我嘅路，屬於林欣彤嘅將來，唔需要參照人哋嘅藍本。」獨行或許很寂寞，也可能稍欠矜貴，但剛敬自強如此，有如在荊棘裏盛開的花，奮不顧身的綻放，無所畏懼。
撰文：孫月華
攝影：范仲良
化妝： Cyrus Lee@ Beauty Tech
髮型： Ron Ng@ HH Salon
形象： Bryan@ the Flaming
服裝： MARC BY MARC JACOBS
Orignal From: 刺鳥 林欣彤
沒有留言:
發佈留言