2012年4月13日星期五

新劇諷刺時弊《女警愛作戰》玩謝唐唐

忽然1周第872期

娛一叮

新劇諷刺時弊　《女警》玩謝唐唐

2012年04月13日

由謝天華、周麗淇孭飛的新劇《女警愛作戰》，近日在內地網和 Youtube「偷步」播出，頭五集免費任睇， TVB更誓言要追查內鬼。未上已是非多多，原來劇中更大玩政治諷刺時弊，當中黃子雄飾演的無良奸商「連應瑭」（連名都玩埋），跟僭建唐英年一樣愛嘆紅酒、自爆感情缺失，搞到官都冇得做。寫實橋段熟口熟面， TVB今勻快手打落水狗，大快人心。

明嘲缺失唐

由黃子雄飾演的「連應瑭」準備參加「亞太商貿主席」選舉，記者謝天華揭發他利用紅酒舖老闆兼情婦張嘉兒的美色，向市建局高層套取內幕消息，偷步進行收購舊樓獲利。

玩夠未！（設計對白）

現實中唐英年的紅顏知己愛品嚐紅酒，劇中飾演情婦的張嘉兒亦是紅酒舖老闆娘，又跟得幾足喎！

連應瑭呢頭喺相熟報章獨家宣布參選，另一邊即被謝天華的《響報》踢爆有婚外情，情節熟口熟面。

抄金句

遭踢爆有婚外情後，連應瑭即被記者追問係咪有感情缺失？連唐唐金句都抄足， TVB夠絕核！

玩埋倪震

何止玩唐唐，更辣埋倪震嗰疊。連應瑭遭謝天華以裸照交換獨家專訪。照片中他拎住隻貓遮住下體同倪震裸照如出一轍！

雙非問題

雙非孕婦霸牀位，一向是港人另一迫在眉睫的問題。接近結局時，由李綺雯飾演的本地孕婦，跟大隊上街遊行，點知途中殺出雙非孕婦，更被對方言語激到就地生仔。

雙非孕婦問題已令港人無法忍受，劇中大肚婆李綺雯更於遊行時作動。

上月中，記者到《女警》拍攝現場採訪，眼見周麗淇拖實臨記 BB又錫又，見 BB流鼻水，更用紙巾幫他抹拭，母愛氾濫。

雞蛋仔阿伯

周聰飾演的通伯，以去年雞蛋仔阿伯為藍本，講述晚年無依無靠的他，賣雞蛋仔謀生，卻遭食環署人員阻撓，更慘遭地產霸權為收購舊樓而迫遷。

飾演雞蛋仔阿伯的周聰，因為遭地產霸權淋紅油收樓，同時又遭食環署沒收謀生工具，夠晒慘情。

對於新劇在內地網站任睇，無綫外事部副總監曾醒明回應時大喊要捉內鬼，搞到幕前幕後人心惶惶。不過本刊發現，其實大馬及澳洲兩地早已取得版權，已於本月二日在當地播出。日前本刊致電該劇編審關皓月，她不諱言說出真相：「唔明點解會話係失竊，訊息咁混亂。其實我一早已知發行俾馬來西亞、英國等地。依家網絡咁發達，實會有人上載，自然就影響收視。」

曾醒明澄清屬誤會

周二（ 10日），本刊再致電曾醒明，他澄清搵內鬼純屬誤會。「可能之前放長假，好多部門未協調到，先有咁嘅誤會。套劇係賣咗俾內地 PPS同大馬電視台。（網上任睇驚唔驚影響收視？）香港落實下半年會播，其實只要套劇有水準，觀眾一定會一睇再睇。」

劇未上已成功製造話題，加上該劇題材亦涉及官商勾結、雙非孕婦等多個社會問題，港人定必有共鳴。劇中角色「連應瑭」的背景亦與剛輸掉特首選舉的唐英年相類似。編審關皓月表示：「戲裏謝天華係一名記者，佢嘅工作係反映社會現實。我嘅本意係希望為今日社會作一個紀錄。其實連應瑭個角色係包含好多人嘅影子，包括地產霸權、有過失官員同強權分子。」