放逐內地似跌墮百層樓 蕭正楠甘願從頭做起

蕭正楠（Edwin）最近在劇集《當旺爸爸》中，飾演馬來西亞華僑情癡男「葉貴」備受外界讚賞，連拍檔鍾嘉欣都大讚他夠可愛。不過，Edwin不會因此而飄飄然，只因入行十年的他，經歷實在比同年資的藝人多，出道即大紅的他，因一句話被放逐內地4年，就像急墮百層樓一樣，令人驚心動魄，今天的他寧願享受從頭做起的實在。

Edwin02年以歌星身份入行，當年跟麥浚龍及余文樂鼎足而立，一度被專稱「蕭公子」的他，紅到不得了，意氣風發的他，在奪得新人獎的台上一句「邪不能勝正」帶走了一切，之後被迫到內地拍劇，4年後捲土重來，在無綫以新人姿態做起。

為母回港發展

Edwin坦言當年被迫到內地，猶如放逐一樣，一夜間一無所有，「嗰時知道真係好震驚，就好似喺101大樓跌落嚟一樣，雖然返內地前，已經好多負面新聞，萬箭穿心，開始喺頂樓跌緊落嚟，但係都仲喺香港，要離開呢度返內地，就好似再由70、80樓再急跌落地面一樣，真係好難接受，當時真係有諗過不如轉行，但係真係唔甘心。」

在內地捱了4年，Edwin亦因不甘心及媽媽一句話，再返港從頭做起，「返嚟過年時媽咪話好想喺電視見到我，問我可唔可以返嚟做，嗰陣時我都31歲，要博都係最後一次，於是咪決定返嚟。我都預咗要好似新人咁，唔會有男主角你做，但係總好過嗰陣時，紅得太快，一切都唔實在，依家慢慢嚟感覺好真實，希望發展可以愈嚟愈好啦！」

---

Orignal From: 放逐內地似跌墮百層樓 蕭正楠甘願從頭做起