畀人話係「姣佘」，問我有冇反感？其實開頭係有唔開心，啱啱入行就咁寫，好多唔係事實都寫，有時心諗，我都冇去過嗰度，冇做過，冇講過佢是非，做咩要咁講我啫！不過後來冇理咁多，咁多年嚟佢哋要寫咩我控制唔到，冇人幫到你，寫到佢爛咪唔會再寫囉！嗰幾年媽咪未返番香港住，我半夜收工4點半，返去沖個涼都5、6點，都會打長途電話畀佢傾偈。媽咪叫我唔好理，話唔寫你先驚，自己、媽咪同朋友知你係點咪得囉！使乜理咁多，你見到嗰啲人咩？
「唔係要嫁有錢人」
好多人話我緋聞多多，其實初入行時唔知咩係緋聞，死都講唔係同埋答冇，但係出來效果唔係咁，睇多兩次知道咁講係唔Work，你鍾意寫咩就寫咩啦！畀人話我係「緋聞女王」，乜原來有咁嘅稱號？我冇咩感覺喎！我都唔知有冇因為咁影響男仔追我，啲男仔都唔會同我講，話其實好鍾意你，不過你咁多緋聞就唔追你喇！唔會o架嘛！其實我都想遇到一個同我一樣嘅人，係用對眼去睇，而唔係用隻耳去聽嘅人。
咁多年經歷咗好幾段感情，都唔會Set理想對象係點，其實我要求從來唔係高，唔係要嫁個有錢人，唔係一早嫁咗啦！我要自己好鍾意，甚至我鍾意佢多過佢鍾意我。幾時結婚？都係緣分注定啦！過去嘅經歷令我領會到Timing好緊要，其實即係緣分，你遇到就點都走唔甩，之前就算係仇人都會一齊，但要分開就點挽留都挽留唔到，就算自己事業都唔可以掌握晒，更何況係兩個人嘅事！其實我愛情觀不嬲都隨意，一向都係開心行先！
「做我男友都辛苦」
以前我唔會為愛情放棄事業，但依家會！唔關經歷多咗事，因為每個人唔同階段、年紀需要唔同嘅嘢，當時係搏殺期，搵錢吖嘛！我要有目標，要做得更好，所有感情嚟到都睇唔入眼，幾好條件都唔會放個心入去，可能都會試一試嘅……但其實個心根本唔喺度，就算出十次街都冇用，不過實際上都唔會出到咁多次街啦！以前拍拖真係冇咩做，呢樣係代價，亦係自己選擇，冇得後悔，當時做我男友都辛苦o架！所以咪散囉！冇辦法！都有錯過咗唔少機會o架！（明日待續）
拉扯9年：女孤身．男有家
阿佘入行後緋聞不斷，不過要數最「長情」的，莫過於她與陳浩民的一段情。02年，他們合作電影《情緣汽水機》後被爆過從甚密，兩人皆例牌否認，但同年10月，一段疑似二人情慾對話的錄音曝光，鬧得滿城風雨，緋聞其後「流傳」多年，更一度被指在雲景道築愛巢，但他們堅持只以「好朋友」及「生死交」相稱，但有指阿佘因難忍男友花心，決定揮劍斬情絲。
06年，阿佘在電視節目中承認戀情，並指因傳媒壓力及男方經常不在港而分手。去年男方在內地娶妻生女，正式為彼此的緣分畫上句號。
Profile
姓名：佘詩曼（Charmaine）
出生日期：1975年5月28日
學歷：International Hotel Management Institute Switzerland酒店管理
入行經過：97年港姐季軍，同年簽約成無綫藝人並獲力捧，在多部電視劇中擔正，06年憑《鳳凰四重奏》成無綫雙料視后，11年離開無綫轉戰內地。
口述：佘詩曼 筆錄：影視組
阿佘坦言錯失無數良緣，現在願意為愛不顧一切。
曾為「姣佘」之名耿耿於懷的阿佘，已學會對各種攻擊一笑置之。
事業有成的阿佘，所到之處均大受歡迎。
花邊新聞浪接浪
佘詩曼樣靚、演技好且喜愛夜蒲，個性爽朗，從不拒人於千里，讓人愈嗒愈有味，緋聞男友亦有一大籮。
馬德鐘
06年，阿佘與馬德鐘合作《鳳凰四重奏》傳緋聞，宣傳劇集時隔着膠片接吻，玩到胸貼胸，令緋聞愈傳愈烈。
丁子高
07年，在阿佘32歲生日派對上，丁子高兩手空空到場，透露會再與壽星女食飯補數，看來交情非淺。
鄭嘉穎
08年，阿佘在電台節目承認與緋聞男友鄭嘉穎頻頻飯局密會，談到發展機會則大賣關子：「將來嘅事冇人知。」
舊愛護數：陳浩民讚硬淨過男人
身為阿佘入行後首位男友的陳浩民已娶妻生女，家庭幸福，但仍為遭冠「姣」名的舊愛平反：「學周星馳講句，係俗世對佢誤解！話佢係『姣佘』？我哋兩個都係受害者，阿佘喺我心目中絕對係義氣仔女，甚至係女英雄！（咁嚴重？）我見過佢撞車破相傷下巴都唔嗌痛，男人都未必得啦！」對於正在等愛的阿佘，浩民希望她盡快覓得真愛，並叮囑阿佘：「事業心強係好，但女人都要有愛情嘅平衡！」
阿佘再見亦是朋友
阿佘與浩民相戀多年，雖然未能開花結果，但阿佘仍給予舊愛不俗評價。近日阿佘像浩民般北上發展，有指她放棄乘坐劇組安排的保母車，反而着浩民包車接她出入？阿佘哈哈大笑說：「我自己都有車啦！等我話番畀佢知先，問佢點解唔包架車畀我呀！」
對於舊愛終於成家立室，還有個可愛女兒，阿佘感到高興，有指她硬要當陳浩民女兒契媽？阿佘沒好氣的說：「唔知點解佢哋咁講，大家都仲係Friend，但唔會成日聯絡啫!人哋有老婆同小朋友，又要拍嘢都忙，久唔久一句問候當然有，喺出面見到都會坐低傾兩句，話冇都難啦！尤其佢咁鍾意出嚟Social。」
作為阿佘入行後的「初戀」男友，陳浩民祝福阿佘早日找到真愛。
Orignal From: 佘詩曼感情缺失：錯過唔少機會！
沒有留言:
發佈留言