《金枝貳》輸《大太監》 戚其義急召佘詩曼救亡
新劇《心戰》播出僅僅一星期，通訊事務管理局及無綫共接獲一百零三宗投訴，加上廿七點收視未如理想，繼《天與地》、《4 in Love》後，連續三部劇成為收視瀉藥，金牌監製戚其義，地位危危乎。 無綫早前在「香港國際影視展」進行賣片宣傳，劇項包括戚其義監製的重頭劇《金枝慾孽貳》，黎耀祥孭飛的清裝劇《大太監》，但面目全非的《金枝貳》反應冷淡，心知不妙的戚其義立刻郁手做嘢，急向已離巢的佘詩曼求救，要對方客串幾日，希望加多幾分原汁原味，刺激賣埠力。
面目全非
無綫開拍經典劇集《金枝慾孽》續集，外界本來一致期待，但因為玉瑩（黎姿）退出娛樂圈兼再度大肚、孫大人（林保怡）同安茜（張可頤）分別過檔NOW及王維基的電視台、爾淳（佘詩曼）主攻大陸，僅餘孔武（陳豪）同如妃（鄧萃雯）兩個靈魂人物，其他演員都是新加入，吸引力即時大減。 無綫在三月舉行的香港國際影視展中，一併將本年度六部重頭劇晒冷，用以吸引外地電視台賣片；點知原預期會有好反應的《金枝貳》，竟然未能大舉吸引外地片商，相反，同屬清裝的《大太監》，反應熱烈得多。
「阿戚近呢幾年啲劇全部都玩另類，香港啲觀眾未接受到，內地就更加睇唔明，仲要唔知會唔會有敏感嘅劇情，過唔到國內審批制度，但最主要係卡士弱，得鄧萃雯、陳豪同蔡少芬三個撐，第一集嘅主角換晒，又講明今次故事發展圍繞喺愛情，唔係宮廷內鬥，所以啲片商冇乜信心，至於《大太監》講李蓮英同慈禧，歷史人物鮮明，內地觀眾又啱睇，多啲人吼好正常。」一班幕後人員說。
橫店客串
明知卡士唔夠強，戚其義要補飛，唯有搵第一集有份演出的佘詩曼幫拖，加強第一集的延續性。 「張可頤同林保怡都去咗第二間電視台，無可能再出現；阿佘同無綫仲有一個劇部頭約，加埋佢係阿戚近年御用女主角，阿戚叫到，阿佘絕對唔會托手踭。」
《金枝貳》六月份會到橫店拍外景，阿佘同時間亦身處橫店拍劇《嫁入豪門》，抽幾日時間客串，應該無問題。 「阿佘口頭OK咗，但無綫仲要同阿佘經理人公司，傾清楚啲細節嘢。」 連續幾部劇的收視都不理想，令戚其義在無綫的地位亦有所動搖，以往作品經常獲批鬆動預算，以《天與地》為例，便破例拍了接近一年，同無綫一般劇集要趕三個月起貨，戚其義確得到特別厚待。 但時移勢易，今次拍《金枝貳》，戚其義再沒有這種特權，除了要在限定時間完成，亦不可再超支，有所規限，劇集於上星期已完成香港所有戲分。
Orignal From: 戚其義急召佘詩曼客串《金枝慾孽(貳)》
沒有留言:
發佈留言