兜兜轉轉的愛情磨煉唐詩詠的心智，細水長流的關係潤飾黃德斌的生命。藝人相愛很難，詩詠不是碰得一鼻子灰？但她盛女唔怕做；德斌不是好心經營近十年？其實是在玩拉布。凡事睇兩面，尤其愛情！
外形Man爆的黃德斌，睇得、打得、更唱得，但他甘願只被一位女友綁住！他與圈外女友拍拖多年仍熱情不減，感情昇華再昇華，幾年前更打本給女友做老闆娘開舖賣時裝，更難得的是德斌為人謙虛不已！對於如何維繫多年感情，他謙稱：「最緊要互相信任，真係冇乜秘訣，我同普通人冇分別！唔需要刻意維繫感情，既然係真感情，又何需『刻意』維繫？好似孝順媽咪，唔需要刻意等到母親節嗰日先表達心意，咁阿媽都唔會開心啦！」
娛樂圈誘惑多，到底德斌怎令女友信任自己？他說：「我年紀亦唔細，好分得清楚乜嘢先係真感情，我同圈中女藝人主要只係講工作，每次演出後，我都會好快抽離，因為我係專業演員！（女友會唔會監場？）佢從來都唔會嚟監場，佢由Day 1同我開始拍拖就已經知道我係演員！關係最重要講信任！如果唔信任對方，根本冇可能一齊！唔通佢有啱傾嘅男性朋友，我又唔畀佢哋來往？」
感情唔係買賣
堪稱絕世好男人的德斌到底何時考慮結婚？現正拍攝電視劇《金枝慾孽（貳）》並飾演術數師的他，即作狀合指一算：「仲未計掂數！現階段我只想專注喺事業上，因為我嘅事業只係算啱啱踏入第二階段！」現時盛行「剩女」一詞，女仔去到某一個年紀就標榜一定要結婚生仔，但德斌坦言不理解何謂「剩女」：「結婚係應該基於愛﹗如果話去到某一個年紀就要去婚姻介紹所，睇啱條件就結婚，咁對比正常拍拖、戀愛係好唔同，感情唔係買賣！」
眼見老友黃貫中即將成為龍爸爸，德斌又會否恨做爸爸？他說：「我想等到有好環境先生仔， 唔想佢好似我以前細個咁窮、咁苦，當然細路仔咩都會呻辛苦，但我唔想畀佢投訴。因為係我要佢出世，唔係佢自己選擇要嚟呢個世界！尤其係想最初嗰幾年可以有好多時間陪小朋友！至少都要有條件選擇自己嘅工作！」他更笑說：「若果要等到70歲先有咁嘅條件，到時生唔到最多咪領養一個！」
為人堅毅的德斌對愛情專一，其實是有迹可尋，皆因他對演藝事業同樣執着！德斌從前經歷過被無綫放棄、工作朝不保夕的日子，但仍堅持留在娛樂圈，全因迷上演戲：「我沉迷演戲甚至達到癡迷程度，如果唔係點會搵唔到錢之下，仲堅持留喺娛樂圈，就係因為我鍾意演戲！」德斌更勇於挑戰不同角色：「我喺劇集《心戰》中飾演酒吧老闆，造型奇特，波浪髮型之餘，仲係二撇雞，又成日着紅色衫，真係唔係個個好似我咁夠膽死，哈哈！」
黃德斌對愛情、演戲皆專一，全因「投入」，他笑說：「我拍《金枝慾孽（貳）》嘅時候，試過因為投入演戲，演到不停出汗，雖然嗰一場係文戲，兼且廠入面嘅冷氣勁凍，但我都可以演到成身出晒汗、濕晒！」對工作如此投入、認真的德斌，當真是負責任的好男人。
黃德斌與女友相戀多年，一切盡在不言中。
唐詩詠兜錯路
情路上撻Q再撻Q，31歲的唐詩詠撻到變成剩女，令人感到最敗北是與崔建邦之間的關係，令她無心戀戰，拖住玩拉布對唔住自己，分手又棄之可惜。既然是雞肋，詩詠把心一橫斬纜，撇脫瀟灑一次。畢竟曾深愛崔建邦，連詩詠也不禁說：「我哋仲係好朋友，冇可能Delete呢個人，過去嘅事唔想提，向前看會比較好。」兜兜轉轉的關係已令詩詠吃不消，可能是喜愛犯賤，她願從錯誤中學習，感謝每個錯愛過的男孩：「愛情路上一直未搵到Mr. Right，係跌碰過好多次，但感覺都OK，真係學到好多嘢，尤其係兩性之間嘅關係！」
過去經歷未有令詩詠嚇怕，只要喜歡，就有十萬個理由支持自己去愛，懶理抉擇是對是錯：「愛好簡單，愛情係世間最簡單一樣嘢，只要鍾意對方就冇問題，我鍾意得對方，就算做乜都開心，唔需要花巧，亦唔需要物質，開心就得！」拍拖四次即使撻Q，她仍然阿Q：「拍拖四次，總括而然都好開心，因為我唔會記住唔開心嘅嘢。就算係之前一段情（指崔建邦），我冇話唔開心，遇到每一個男友都係我嘅幸運，因為人生已冇乜病痛，第三世界嘅人都冇話慘，我冇理由將不快事無限放大，詩詠已經係好幸運嘅人，凡事要睇兩面。」
享受單身生活
可惜詩詠仍未在對的時間遇上對的人，但她享受盛女生活：「隨緣！緣分唔搵我都冇辦法。反而單身可以做到更多嘢，做自己想做嘅事，我會將剩女變成盛女，做盛女幾好吖！唔一定要同男友去旅行先開心，同班女仔去玩仲過癮，要知道豐盛人生唔單只有愛情，我依家好開心！」詩詠篤信愛情隨緣，工作亦然，她知道甚麼叫「冇咁大個頭就唔好戴咁大頂帽」：「唔知自己有冇野心，想做個好演員，唔想畀人睇死。當年入行，朋友覺得我太怕醜，一定做唔到，就係咁我更加要做落去，直到呢個圈唔需要我！」
固執金牛女
詩詠是一個喜歡研究星相命理的人，身為金牛女的她對自己有這番闡述：「唐詩詠係一個好典型嘅金牛女仔，好固執、硬頸同爛瞓。佢好樂觀，但又悲觀，係一個好矛盾嘅人！」好一句矛盾的人，說穿了為何她樂於在情路兜兜轉轉。
唐詩詠曾深愛崔建邦，可惜這段情已成過去。
唐詩詠情路多波折，但難得她未有氣餒，反而更加享受單身生活。
Orignal From: 黃德斌情長久 唐詩詠兜錯路
沒有留言:
發佈留言