今次阿Mo演繹殺人狂「章世言」，不但得到fans大讚，連拍檔秋官亦公開表示認輸，得到前輩的肯定，他即時謙虛地說：「多謝佢！佢點會輸畀我呀！佢先至係真正嘅戲劇大師，佢呢個角色一定要佢啲咁有實力嘅演員，先至可以做到，我知佢事前上網搵咗好多資料，真係好令人佩服。其實我個角色唔算最難做，因為有阿戚同編劇佢哋加咗好創意落去，好似沙畫同音樂咁，感覺實在好多。」
當年梁朝偉演繹《色．戒》中的「易先生」，都曾經抽離不到角色，連劉嘉玲都覺得他眼神凶狠，今次阿Mo亦差點出現這種情況，「咁樣其實幾危險㗎！好在電視尺度有限，角色未需要去到咁深層，不過我都等緊一個好似「易先生」咁嘅角色，可以同自己心魔好好咁心戰一吓。」劇中阿Mo經常要跟幾個心魔對話，包括主宰邪惡的黃德斌、主宰情慾的簡慕華、主宰暴力的何啟南、主宰陰險的李霖恩及主宰良心的戴耀明，問他認為那個心魔最難應付，「章世言係因應邊個情緒狀態，邊個心魔就會出嚟，其實每個人都有呢幾個心魔，我都唔例外，都係因應情緒狀態，佢哋就會走出嚟，邊個惡啲就要睇心情啦！」
創110%阿Mo風格
劇迷都認為「章世言」相當難演繹，不過陳豪當日接到劇本第一個反應卻是另有所慮，「我唔擔心殺手戲份同角色啲內心戲，呢啲可以交畀監製同編劇佢哋去處理，反而擔心做魔術師，因為拍嗰時仲未興起魔術熱潮，擔心觀眾對題材唔接受，章世言唔係做大型魔術，而係喺商埸做表演嘅街頭藝術者，同埋魔術做得唔似就好假，玩啤牌呢啲掩眼法好難做得似。」
「章世言」內心戲極重，阿Mo形容「係一個好dark又同時經常受內心操縱嘅人」，這個複雜的角色，阿Mo事前卻沒有刻意做任何準備，「我想用一個最簡單直接表達方式去做，唔會做得太複雜，好似將殺手一貫嘅猙獰盡量刪減，唔係冇，可能一、兩個表情交代就算，所以冇去特別睇戲去參考，因為我想做到110％都係Moses風格，唔想有任何人或者戲嘅影子喺度。」
「劇透」未必真
劇集只播了8集，已有傳媒急不及待劇透，將大結局足本交代，此舉有劇迷大為反感，但阿Mo卻沒有不快，「每次有咁嘅情況，啲劇情都未必係真，反而會引起觀眾好奇心，睇吓究竟實情係咪咁，唔擔心會影響收視，依家27點我都覺得OK，自從《天與地》之後，咁樣已經好OK啦！」
兩年後結婚
眾所周知，《心戰》是阿Mo跟陳茵媺的定情之作，大家都心急兩人何時拉埋天窗，阿Mo即露出慣常的面紅尷尬樣說：「等事業發展穩定先啦！（你已經係視帝喎！）唔係，我想嚟緊呢年同朋友搞番間咖啡店，等生意上咗軌道先，都要一、兩年啦！（即係兩年後結婚？）到時考慮，總之我有計劃o架啦！」
Orignal From: 《心戰》殺人狂自白 陳豪險入魔 「劇透」未必真
沒有留言:
發佈留言