麥包早在96年《西遊記》飾演「沙僧」，演繹這個傻頭傻腦的角色入木三分，已在觀眾心中留下良好印象，直到「非凡哥」出現，這份喜愛便順利發揚光大，成功奪取觀眾的心，也令他有機會連奪兩獎，得到入行25年以來最輝煌的成績。
贏人心得認同
麥包認為奪得兩個獎項有着不同意義，娘家的獎贏的是人心，海外的獎贏的是認同，「講真公司演得好過我嘅人大把，我只係好彩呢個咁好角色擺喺我手上，先有機會得到個獎，但最開心係全部同事都替我高興，好似你哋啲傳媒朋友都係，有啲攝記將當晚影到我嘅相即場送晒畀我，真係令我好感動。海外個獎就覺得真係一個認同，因為啲評審又唔識我，又有語言文化差異，但係佢哋都肯畀個獎我，唔好講演技，至少證明個角色我係做得適合，已經係好大鼓勵。」
這些正面鼓勵確實相當重要，原來得獎前大半年，麥包曾經想過放棄，離開電視圈轉行，「嗰陣時係10年初，仲有一年就約滿，但係覺得好迷惘，自己好似一潭死水咁，所以諗住唔再續約，睇吓出去搞啲咩，有次見到陳妙瑛，問佢有咩搞，佢仲叫我去幫佢搞酒樓，得獎係證明咗以往行嘅路係啱，至少方向無錯先，但係會唔會機會更多，我目前唔覺喎！」
盼做電視劇主角
麥包雖然連奪兩獎，但正如他所言，每個人的際遇都不同，他沒有像其他人一樣，即時劇接劇，去年8月拍攝完《耀舞長安》後，只客串了《怒火街頭II》，雖然其間他演出《世界衝擊影像社》等節目，但到目前都沒有新劇開拍。明明無綫鬧演員荒，所以麥包也不知何解，但就擔心入不敷支，「以往我都有喺出面幫人搞下宣傳，但係舊年5月續咗約後，想試下用今年時間，測試下淨係做電視夠唔夠使，但係有成半年冇劇開，我都擔心會養唔起頭家！所以都有託啲朋友睇下有冇工作機會囉！」
麥包是個不會強求的人，但是個有要求的人，面對目前演出機會不足，依然有他在圈中的夢想，「我希望有朝一日可以有張以我為主角嘅電視劇海報，最理想就係我係做警察角色啦！其實我當初入行最想就係做警察，係儆惡懲奸，用法律去制裁壞人嗰種幹探喎！我諗做主角任何人都想，但我唔會強求，睇吓呢三年約裏面實唔實行到啦！」
後記：導演夢
跟麥包熟識的人都知，他除了愛演戲，亦有很多諗頭，當編劇做導演，一樣有潛質，原來這也是他另一個夢，「我其實好多橋都拍咗做電視劇同電影，我有古仔好鍾意同朋友傾，睇下可唔可行，點知好多橋都俾人抄咗，但係無所謂，我一日未腦殘都會有新諗頭，做導演我都想o架，但真係要多啲經驗先得。」
Orignal From: 連奪男配角獎 竟半年無劇開 麥包︰我擔心養唔起頭家
沒有留言:
發佈留言