鎮宇孖法拉7月上雲霄
十年前吳鎮宇、馬德鐘、陳慧珊同胡杏兒主演嘅《衝上雲霄》掀起型仔飛機師熱潮，舊年無綫諗住今年5月拍40集嘅《衝上雲霄2》，但因為要就吳鎮宇個期而押後，聽聞家定咗7月中拍，有吳鎮宇、張智霖、胡杏兒同陳法拉雙生雙旦，首輯嘅馬德鐘同陳慧珊就被飛。
吳鎮宇當年嘅型仔機師 look迷倒唔少女觀眾。《衝上雲霄》劇照
法拉強勢加入《衝2》，仲同張智霖有唔少對手戲。《忽然1周》圖片
胡杏兒（左）同朱晨麗早排一齊為《衝2》拍節目巡禮。資料圖片
飛勻英法台
講到要就鎮宇而遲拍，無綫高層梁家樹冇否認，只係話有好多原因，總之家7月中拍，仲會去英國、法國同台灣拍外景，果然不計成本。之前話王維基嘅免費電視台都會拍類似嘅劇，梁家樹話有競爭係好，但無綫唔會理人，只會做好本份。
《衝2》新加入法拉做女主角，可謂加強陣容，因為近排法拉個勢好勁，佢喺內地個華鼎獎新銳百強排名榜排13位，榜首係楊冪，法拉係排名最高嘅香港藝人，對於有咁嘅成績，法拉喺電話度話受寵若驚，佢話都想多啲拍內地製作，不過最重要係試多啲有挑戰性嘅角色。至於加入《衝2》呢個重頭劇，法拉話好期待同鎮宇、張智霖喺電視上合作，佢之前同鎮宇合作過電影，好欣賞佢嘅演技，希望今次合作可以取經，法拉仲話希望有機會試演女機師，因為夠型喎。
Orignal From: 吳鎮宇陳法拉7月《衝上雲霄2》
沒有留言:
發佈留言