嬲死朕
失意編劇從政 黄洋達出獄大爆 TVB黑幕
2012年05月30日
被網民封為「皇上」的網台主持黃洋達，去年因衝擊替補機制被判監三星期；皇上為參選 9月立法會選舉而主動服刑，上週六（ 26日）在荔枝角收押所外獲 300多名粉絲「恭迎」出冊，架勢到震。
32歲的皇上曾任無綫及邵氏電影編劇多年，由無綫編劇變身政治犯再變政壇新星，失意無綫多時的皇上，趁在 6月兩場 Talk Show前，率先爆在舊東家任編劇之苦況。除了屢被編審打壓而坐冷板，更不時被藝員上門迫改劇本，連皇上都話編劇廢：「在 TVB創作，要同老闆、 artist交代， TVB啲編劇都係廢！」等你入 咗立法會，咪係編劇之光囉！
TVB啲編劇都係廢！（真實對白）
上週六（ 26日）中午，「皇上」 黄洋達在觀塘辦事處接受訪問，大談政治理念之餘，亦寸爆舊老闆 TVB扼殺創作，連編劇都鬧埋。
身為人民力量成員的黃洋達，去年獲蕭若元邀請於《香港人網》開咪，因其爆粗論政和抵死見解而迅速冒起。其實 02年加入無綫編劇組的皇上，已是《衝上雲霄》編劇之一，至 09年轉職邵氏電影，撰寫《 Laughing Gor之變節》、《我愛 HK開心萬歲》等。
槍打出頭鳥
今次變社運 icon，上週六出冊的皇上接受本刊訪問，表示除了將於下月 Talk Show加入獄中經歷之餘，更會分享在無綫工作的遭遇及分析無綫多爛劇的原因：「 TVB嘅劇集質素低，唔單只係編劇嘅責任，有好多審批上嘅掣肘、高層嘅要求、廣告商甚至係公司嘅方針，淨係准你做一樣嘢。我有同過編審嗌（劇本），卒之我乜都唔使做囉，亦係因為我嗌到冇嘢做囉！我又唔係張華標、周旭明嘅 level，咁我去同編審 fight嘅時候，佢哋咪唔畀嘢你做囉，我咪去咗做電影囉。」
皇上續說：「 TVB某程度都係食大鑊飯。原本佢係一個培訓中心，有啲編劇會慢慢轉向電影，有啲後進就可以上，因為電影低潮同海外市場萎縮，令到 TVB有段好長時間編劇組嘅人冇流動過。 嗰班人做得耐咗， 啲問題就出晒嚟，冇新血，晉升機會又低，搞到個創作氣氛好差。」
皇上為出選立法會決定棄保入獄，今月 7日在太太陪同下入冊，皇上說和太太由 3月商討到 5月初先達成入獄共識。《蘋果日報》圖片
上週六（ 26日） 300多位粉絲九點已在荔枝角收押所門外聚集，眾人身穿 黄衫、手持 黄玫瑰恭候皇上，其中不乏妙齡女粉絲。
藝員干預創作
週一（ 28日）皇上應大班鄭經翰邀請出席 dbc《風波裏的茶杯》任嘉賓，對於有傳大班對佢挖角，皇上話：「我哋只係初步傾過啫，我哋反而傾參選嘅事多啲。」
除了面對上層打壓，皇上仲要應付藝員踩場講數。「 TVB artist好惡 㗎﹗『點解我會在呢一場戲喊 嘅？我形象唔可以喊 㗎喎﹗』就揸住份劇本上 嚟同你講。我試過俾 artist彈劇本，成日同 artist嗌交，我費事講邊個啦！我先係專職創作，你（藝員） 嘅創作範疇都唔係呢度，好多時候都有呢啲爭拗。 TVB好似政府咁有五司十四局，推卸 嚟推卸去。因為編劇 嘅形象太低落，薪酬又太低，成個業界 嘅認同感都好低，覺得自己只係寫稿畀人。」難怪皇上劈炮啦！
爆 3臭史
畢業於浸大傳理系嘅皇上， 04年開始小說創作，出版《金錢師》、《金融刺客》等系列財金小說，創作力不容置疑，可惜加入 TVB做編劇，虎落平陽被犬欺囉。
1.麻煩姐仔唔肯拍強姦戲
自稱「好擅長應付 artist」嘅皇上，不時要同上門要求改劇本嘅 artist拆招。「我寫就寫，你（指藝員）做就做啦，你俾人強姦就俾人強姦啦！你可以在 acting度決定，但個劇本係我哋寫㗎嘛！」
2.寸周旭明拍劇又貴又冇人睇
早前《天與地》 hit爆，皇上在節目上都有講過舊同事戚其義同周旭明：「佢哋都唔係第一日『瀨』，佢哋都『瀨』過好多次，《火舞黃沙》仲『瀨』啦，又貴又冇人睇又冇回響！」
3.被迫寫師奶劇
皇上在 TVB任職編劇，前後參與至少 8套電視劇，對創作有堅持嘅佢，不時同編審就劇本創作上爭拗，「反正都 ban，我都係寫番師奶嗰啲。其實睇你肯唔肯去搏（寫其他），你可以寫一次，佢審你一次，你同佢咁樣鍊落去。」於是編審索性唔使皇上寫劇本，皇上「敗走」邵氏寫電影劇本。
電視劇作品
《壹週刊》圖片
02《衝上雲霄》
06《太極》
07《歲月風雲》
09《摘星之旅》《女人最痛》《魚躍在花見》《情人眼裡高一 D》
電影作品
09《 Laughing Gor之變節》
10《 72家租客》
11《我愛 HK開心萬歲》《勁抽福祿壽》
四圍寸
皇上乜都敢鬧，不只月旦時事鬧政府，連老闆級人士一樣唔怕得罪。
王維基
「王維基最主要賣劇集畀大陸網，佢認為內地網站買佢啲劇集，如果佢想劇集在網絡受歡迎，就要考慮請番去嗰啲 TVB人識唔識拍……佢哋訓練開拍劇嘅功架，係唔適合用在拍網劇。」
蕭若元
「我同蕭生嘅事詳細就唔講喇，套佢句話『因為我特立獨行』囉！但係當初我離開 TVB過嚟《人網》，都係因為『特立獨行』，估唔到離開都係因為『特立獨行』！」
劉家豪夫婦
「梅小青佢哋買咗個豪宅（一號銀海）住，搭的士時好鍾意同人講自己住嘅屋苑名。點解佢淨係講屋苑名吖？因為的士佬會答佢『哦，大角咀』，佢就會話『唔係大角咀呀，我嗰個係豪宅嚟㗎！』」
開騷自爆獄史
在「水飯房」（單獨囚室）度過 3星期，皇上說感受深刻，一定會將呢段入獄經歷加入《笑死朕》 Talk Show中分享：「我會說由我喺電視台到做網台，再到坐監，圍繞『自由』呢個主題嚟講。」皇上更率先分享獄中奇遇：
玩曱甴
「坐咗 3、 4日監，冇社交生活原來人係會發癲，點知有日俾我在張床上見到隻曱甴，我開心到同佢玩咗半日！」
要「白田」
「在監獄裏面有好多人塗鴉寫字，有人寫『沈佳宜，我愛你』，唔通佢以為沈佳宜會入嚟睇到？我張床上有人寫『我要白田』，我諗咗好耐先知佢應該係想寫『自由』！」
Orignal From: 失意編劇從政 黄洋達出獄大爆TVB黑幕
沒有留言:
發佈留言