「魔童」王維基以五十億出售其電訊王國，「賣仔」瞓身投資免費電視，施銀彈挖走大批TVB台前幕後過檔，成為行中「救星」。新免費電視牌照仍未批出，垂死掙扎的亞視及陰濕TVB相繼要求司法覆核阻政府發新牌，但賭身家豁出去的王維基仍信心爆棚，堅信政府不會因一次司法覆核就改變決定，還說：「相信上天保祐做好事嘅人。」「魔童」絕非得個講字，對發牌問題一於少理，頭炮省招牌青春偶像劇《還來得及再愛你》就落重本，安排「替身」代男角唐禹哲跑步增加就業機會。不過，死對頭愈玩愈大，政府發牌拖了又拖，倒水式投資的「魔童」咪話唔頭痕！
王維基統帥的「城市電訊電視及多媒體制作中心」撬走大批TVB藝人，並於今年二月，大張旗鼓進行動土禮，一哥黃日華、一姐張可頤舞獅助興，來勢洶洶。本月初又再舉行三劇晒冷記者會，由演員廖碧兒及蘇永康等造勢，萬事俱備，只欠東風，但牌照問題突起變數，分分鐘再拖一年半載，一日未批出牌照，城電一日都零廣告收入，卻要支付400位幕後員工及180位台前藝人的龐大支出，實在流血不止。「籌備開台初期，城電出手係好疏爽，尤其是出銀彈去挖一線演員，只要你肯開價，佢哋就會畀；幕後人員往往係無綫原有薪酬嘅兩倍半，家陣開源節流，只肯畀個合理價，近幾個月挖角行動仲急急煞停 。」知情者說。
皇帝式拍劇享受
不過「城電」正式開台遙遙無期，大批工作人員只應付三組劇集，工作量有限，故由外援唐禹哲、詩雅等主演的頭炮省招牌青春偶像劇《還來得及再愛你》明顯出現「妹仔大過主人婆」情況。上周三劇組到西貢黃猄地及南生圍拍外景時，男女角由十多位劇組人員貼身照顧，台灣人氣偶像唐禹哲更有兩位專人擔遮撥扇跟到實，外景車亦選用舒適又新淨的大巴。而唐禹哲全程由「老臨」stand by，「跑兩步」出汗等辛苦鏡頭有替身幫手，連拍一場跟詩雅拖手仔戲都要搵「臨記」度好位才請男角埋位，增加香港就業機會的確要讚，但如斯倒水式支出實在無謂。
王維基信心爆棚，為頭炮新劇落重本。
替身代男角拖手
唐禹哲由多位劇組人員貼身照顧，更有兩位專人擔遮撥扇跟到實。
替身Stand By
Orignal From: 懶理開台受阻 王維基《還來得及再愛你》
沒有留言:
發佈留言