現年48歲、入行24年的黃德斌，雖然參與過不同劇集和電影的演出，可惜早期的角色未能令他在電視圈佔一席位，於是退到電影做幕後，97年重返無綫從頭做起，令他逐漸受觀眾注意，近期的《天與地》令他進入一個新階段。
黃德斌自問並非做小生材料，但講到做男主角就自信可勝任。
在《心戰》中，黃德斌以奇幻造型與陳豪（左）做對手戲。
《天與地》這套神劇，被網民力捧，亦令黃德斌演藝事業進入另一個階段。
戚其義發掘特質
其實在過往戚其義的作品，可以看到黃德斌不同的變化，對觀眾而言，無疑有一定的新鮮感，他說：「戚其義好大膽，佢唔甘於去重複，變咗就算佢係用同一班演員，每次都想發掘唔同嘅嘢，唔係求其改咗你嘅造型，反而希望用個角色令到你有改變，同佢合作可能會比同其他人合作辛苦，但係嗰種樂趣就係喺呢度，演員希望俾人發掘到一啲自己都未必知嘅內在潛力，有時自己覺得好，原來未必係，話自己唔得又未必唔得，反而喺資深製作人嘅角度，會睇到你有乜嘢特質，令你可以發揮。」
問黃德斌被阿戚激發了甚麼特質？他笑笑口：「唱歌已經係喇！有邊個估到我唱到歌？」細談過往事業的起與落，他強調沒有灰心：「做咗咁多年，唔可以話冇收穫，只係冇人哋咁大，對我嚟講仲要繼續努力，其他等公司決定。我覺得自己去咗另一個階段，《火舞黃沙》係第一個階段，《天與地》係另一個新階段，家做嘅角色係多元化咗。」問到他是否想做小生，黃德斌大笑說：「仲細咩，我有自知之明，小生我做唔到，真係好 sorry，我真係唔敢，做主角就係另一回事。」
黃德斌在《4 In Love》中更變身官仔骨骨的體育報道員。
擁一身靚肌的黃德斌，當然要用天賦本錢拍廣告銀。
醞釀夢想做導演
或者正如黃德斌所說，人去到不同階段，自然會發生不同的事，所以他從不會給自己任何界限，他說：「做演員最緊要唔好畀自己有界限，咁就唔會有所謂嘅遲與早。當初再選擇做番幕前，只係想喺唔同階段做唔同嘅嘢，呢啲咪係演員嘅持久性，做演員最重要係要睇觀眾鍾意定唔鍾意，就算你做到天王，冇人鍾意睇都冇用。」
踏入人生的另一個新階段的黃德斌，少不免會有夢想：「我有一個夢想，其實好簡單，只不過想再試多啲嘢，入行好多年，好似接觸過好多嘢，但其實都唔係好深入，我對幕後有濃厚興趣，我想試吓做導演拍嘢，呢樣嘢喺度醞釀緊，不過都未出嚟，雖然最後未必係好大件事，但點都想嘗試。」
黃德斌06年演《火舞黃沙》，大晒靚肌，更令他獲得一座最佳男配角獎。
穿紅衫紅褲紅鞋接受訪問，黃德斌否認是要配合《心戰》的妖爆造型。
網友發帖等睇劇
因為《天與地》的出現，重燃觀眾追劇的念頭，不少網民已熱切期待明晚推出的《心戰》，更早已開定討論區，爭相討論劇情，問到黃德斌會否感到有壓力？他說：「我都有聽聞已經有人討論，《心戰》、《天與地》同《4 In Love》已經畀大家睇到唔同嘅嘢，我哋都知大家嘅要求越嚟越高，我相信《心戰》可以滿足到大家。」
談到《心戰》，黃德斌即滔滔不絕地說：「今次呢套戲真係唔難明，一開始已經知道邊個係兇手，邊個係追兇，每一步都有線索，當中嘅轉折同人物轉變嘅細節，都增加咗好多趣味，但係最緊要觀眾唔好咁快想知個結果係點，呢集唔明唔緊要，睇埋下一集就會知，如果用對白交代晒，咁就冇意思，亦唔係呢套戲嘅風格，睇睇吓你會感受到個題材又幾有趣，真係值得追。」
心戰推陳豪去死
不得不提的，當然是黃德斌在劇中的妖爆造型，正如他今次訪問一樣，罕有地穿上紅衫紅褲紅鞋，切合劇中造型的模樣，又確實令人有新感受，他哈哈笑說：「唔可以話係妖，反而係古靈精怪多啲，唔止我，仲有簡慕華、何啟南同李霖恩嘅造型都好特別，呢間酒吧嘅人個個都有奇幻色彩，我哋係陳豪嘅豬朋狗友，大家各懷鬼胎去推陳豪去死。」不過故事的發展，黃德斌笑稱要賣個關子。
場地提供：雅．高級日本料理（ The ONE）
黃德斌與拍拖10年的女友黃美恩（ Joyce），上月初被拍到踎大牌檔，認真慳家。
結婚時辰未到
近期圍繞黃德斌的話題，除了是事業上的轉變外，還有他的感情生活，與圈外女友黃美恩拍拖10年，現在事業又有成，又到適婚年齡，結婚似乎是理所當然的事，可惜眼前的黃德斌只說：「多謝關心，工作方面仲要繼續努力，就係因為未夠所以先要咁博，我唔係好慣高調講感情，如果佢係圈中人，梗係冇得低調，但佢係圈外人，唔想令到佢變成圈中人，亦唔鍾意成為話題，總之我家只係以工作先，結婚嘅時辰仲未到，如果結婚一定會講你知。」
Orignal From: 有話兒：《心戰》黃德斌激爆妖佬潛質
沒有留言:
發佈留言