未夠衰
對於銀色旅途，就連定欣也認為自己很幸運，梗係啦！03年仍是跑龍套的二打六，於翌年得到《大唐雙龍傳》婠婠這個亦正亦邪的角色，令很多觀眾留下深刻印象，之後的《銀樓金粉》、《刑警》、《巾幗梟雄》及《法證先鋒III》個個角色都甚有發揮，「婠婠係一個起步，邪得來帶點可愛，其實我演過很多邪派的角色，就連粉絲有時也『投訴』，但講真，做演員邊個唔想做反派？如果以《溏心風暴》中的紅姨（米雪飾）比較，我都未夠衰。」定欣稱今年是「好人年」，皆因推出的幾套劇集，套套角色都很正氣，尤其是熱播中的《拳王》。「近10年來真係冇做過這種角色，連自己都覺得呢個角色好新鮮。」的確，飾演殘障的角色，這種機會實在難得，胡杏兒、郭晉安當年都是憑這種缺陷的角色奪獎。
拒做剩女
人紅自然是非多，最近定欣被冠以「姣精」稱號，指她速食7名台前幕後的猛男，就連定欣聽到這宗罪時，都忍不住狂笑。做藝人有拖拍與冇拖拍都煩，在定欣口中肯承認的感情只得兩段，一個是吳浩康，另一個則是馬國明，定欣坦言：「兩段感情中間真係冇拍過拖，的確有出現我有好感的男仔，但最後都冇開始。」可惜嗎？定欣說不，皆因事業正值搏殺期，拍拖這奢侈品還是留待有空再玩。
早陣子流行講「剩女」，定欣出席活動時都表示很抗拒這些稱號，「我好介意，因為我唔係『剩女』囉！30歲我事業才剛起步，唔好用這些名詞標籤我。」歷年來的花旦，大部分都屬遲婚一族，萱宣、張可頤還仍未有着落，定欣也坦言：「有得必有失，都希望盡力同步進行。」至於會否找人生教練幫忙？定欣笑說：「唔需要，唔會搞咁多45度角的東西，亦唔需要咁多策略存在兩個人關係之中。」暫未有對象的定欣，表明渴望結婚、生兒育女，但她說：「希望35歲前做到，如果過了這個年紀，應該唔考慮要小朋友。」對於閃婚，定欣話：「唔出奇，我性格OK。未婚懷孕又得，不過對象要好穩定。」
邊緣回望
不談感情，又再談回工作！免費電視大戰即將開鑼，面對挖角潮，對正備受力捧的定欣來講，雖仍未有離巢之意，但近月開始工作上或多或少有點影響，「我冇理挖角大戰，不過最近真係feel到好多同事離開，尤其係前輩級，會擔心那個年紀層夠唔夠演員呢？好多時真係要有經驗或者某個年紀去做，但好似突然斷層。」
面對同事離巢是一個問題，看着一批批外援加入，又是另一個問題，俗語也說「多隻香爐多隻鬼」，辛辛苦苦爬到這個「一線」邊緣，話唔怕都呃你啦！「分薄？都唔係我可以控制到，事實上公司係需要多些面孔。報道所指的外援，大部分以部頭形式合作，面對這個良性競爭，只可以做好自己，我相信有些角色只係得我做得到，要對自己有信心。」事實上定欣的可塑性很高，唔單止有演技，就連觀眾緣也很好，最重要是角色層面夠闊，曾經與她演過情侶的男演員，由吳卓羲、黎耀祥到岳華，幾個不同年齡層都有，就連出爐視后胡杏兒都冇咁誇。
Orignal From: 打不死．胡定欣
沒有留言:
發佈留言