相識了九年的區文詩（左）與唐詩詠，雖不常見，貴乎交心。
區： 區文詩
唐詩詠憧憬將來會是幸福少奶奶。
區文詩希望與老外男友有個幸福未來。
區文詩（左）今年一月29歲生日，唐詩詠（右）亦有到賀。
區文詩細心地為唐詩詠黐假眼睫毛。
唐： 唐詩詠
區：當年我哋同官恩娜幫電台做節目，其實我細個已經聽過你個名，我讀中學時你已經係好出名嘅學界model，仲記得有個師兄話好鍾意唐詩詠，佢話嘗試追你但追唔到。始終我唔熟電視人，初初都驚你會寸，因為做咗咁多年model，又轉做演員，有番咁上下啦，但識咗你就知和善到極點，你乜都冇所謂好就得人，幾容易做到朋友。
唐（真誠地）：我好難同人建立友誼，要適應期，了解咗對方就會放低戒心，你都知我保護自己好緊要。
區：我哋合作咗年幾，監製成日話我哋有共通點，就係平時唔化妝，就算去高級餐廳食飯，都可以笠頂帽着對波鞋就出街，依家大家長大咗，唔再hea。
唐：呢啲係細個做嘅嘛，OK啦。
護愛苗幸福走下去
區：我哋都經歷咗一啲嘢，好似你媽咪過身，之前我爹哋又過身，原來有呢啲嘢發生過，人係會成長，凡事都會睇淡咗。
唐（感慨地）：呢樣係好無形轉變，我諗你依家都冇以前咁任性，你以前畀我感覺好烈女，要做就做，愛恨分明，我有時都有猶豫位。
區：我真係好任性，嗰時我同男仔有曖昧關係，有次我喺佢生日party做咗件好任性嘅事，當晚打畀你同你講，你堅持唔應該搞事，你任何嘢都係顧全大局，我就好衝動，好多嘢都冇彎轉，呢個係我同你性格上最大分別。
羨慕有老外男友
唐：呢個就係你，感覺好直接，唔做就瞓唔到覺，你一直畀我感覺係女強人，雖然好愛情，但好照顧屋企人，同埋好肯定你老公應該靚仔過我老公，你揀親嗰啲都好靚仔，你依家嗰個（老外男友）人OK樣OK，畀我感覺好穩重，以前嗰個（鈴木仁）好唔穩重。
區：呢個好放我，只有支持冇反對聲音，好希望呢個係最後，姑勿論結唔結婚，我都想盡最大能力保護，好想佢同自己都幸福。
唐：我覺得愛情要經歷過，先識得去珍惜，你個timing好好。
區：咁你點睇自己？
唐（憧憬）：我都會係幸福少奶奶，雖然暫時冇任何結婚衝動或穩定關係，但好肯定以後會有，我好想去享受生活。你可以毫無保留地拍拖，但我冇乜經歷過，除咗初戀之外，所有過程都唔係好拍拖嘅嘢，感覺唔係太好，除非去旅行嗰陣時，所以結婚好想做番嗰啲嘢。
區：其實我都係，不過我揀咗唔理，我要拍拖要過生活，呢個就係成功與否因素，可能要犧牲一啲嘢，但我揀咗唔犧牲；希望你將來嘅伴侶可以畀你依賴，經常陪你食嘢，我幻想你另一半係上市公司主席，你可以經常去打躉。
唐（哈哈大笑）：我需要架，我係等放工嘅小女人，我需要大男人。
視圈發展學懂圓滑
區：你嘅事業已經上軌道，近幾年跳咗一大級，以前覺得十幾歲係黃金時期，但依家我覺得30歲或打後先係黃金時期，特別做電視，一線阿姐都有番咁上下年紀。
唐：因為需要經驗，呢樣係儲番嚟，自己嘅方向喺呢一、兩年清晰咗啲，曾經有人問我幾時唔做？我冇認真去諗呢個問題。
區：我發覺黑白分明嘅人唔係好適合喺呢行工作，因為要有灰色地帶畀大家緩衝，我太過係就係，唔係就唔係，但做呢行一定唔可以咁，所以奇迹嚟嘅，到依家仲喺度。
唐：但我覺得呢個年代啲人接受咗呢樣嘢，某啲位原則上要揸緊。
區：你做電視會唔會好多呢啲矛盾位呢，定係冇乜得選擇？
唐：你都知我除咗做嘢，其餘時間唔想用個腦，入行時同你哋相處開心，因為唔鍾意嘅嘢可以講畀你哋聽，但入TVB後難啲，大家接觸嘅嘢唔同，可能會講錯嘢囉，所以係難嘅，但亦可能因為我嘅圓滑，我接觸太多唔同類型嘅人，如果唔懂得呢樣嘢好難合作。
區：工作上有冇經歷過好唔開心？
唐：曾經好唔開心，聽到有朋友話覺得我麻麻哋，做嚟做去都係咁，嗰吓我有少少任性、反叛，唔會衰畀你睇。
區：我都覺得如果唔畀人蝦，你要變得好強。
後記
訪問這天，區文詩特地帶了自己的新碟送給唐詩詠，拍照前更細心幫對方黐好假眼睫毛，兩人的友情在細節裏滲透出來，雖然平日各有各忙見面不多，但每年生日都會相約慶祝，真正的朋友並不需要日日見，交心才重要。
唐詩詠
服裝：Gloss
區文詩
髮型：Taylor Wan@Hair Corner
化妝：Shirley Lee
Orignal From: 唐詩詠：我需要大男人
沒有留言:
發佈留言