靚仔小生黃浩然去年榮升爸爸，老婆莫家嘉為他誕下愛情結晶品，囝囝Kayden出生時他正忙於拍劇，錯過不少見證囝囝成長的寶貴片段，因而產生了罪咎感：「囝囝出世時我拍緊《拳王》，好難兼顧屋企，因為我喺工作上係唔會留半分力，連續工作18粒鐘之後，返到屋企都可以話係死咁滯！搞到望住個囝囝好似唔識咁！所以屋企人可以話係受害者！」
專注拍劇搵奶粉錢的浩然，每日只有3至4小時的休息時間，月前又要北上拍劇，為了維繫與家人的感情，不論工作多忙亦會與家人保持通話：「我返大陸拍劇嗰廿幾日，每日我都會同老婆囝囝視像通話！」回港後，浩然第一時間回家與囝囝「孖鋪」：「我喺囝囝身邊嘅時候，佢會安全感大增，平時佢會瞓晏覺瞓個幾鐘就醒，但我喺大陸拍完《大太監》之後返嚟，陪佢瞓嘅第一個晏覺，佢足足瞓咗三個幾鐘先醒！」
盡量留家食飯
只要難得放假，浩然便會抓緊時間與家人度過：「我都希望陪家人多啲，有時間會陪囝囝行公園、去遊樂場玩，放假會盡量留喺屋企食飯，咁我就可以睇住囝囝畀老婆休息吓！」
問到浩然會否是嚴父？他笑說：「唔知呀！因為囝囝仲細，睇吓佢嘅行徑有幾離譜，但我堅持唔會用暴力對待，都想同佢講道理先！」他表示更會對囝囝進行身教：「我同老婆都會好小心言行舉止，因為囝囝會模仿我哋。」他又笑言囝囝識恰人：「囝囝都幾聰明，識恰人，特別會恰佢媽咪，叫佢行東就會行西，專搞對抗，但佢又會買我怕！哈哈！」至於會否讓囝囝做童星或接拍廣告，他說：「唔會！一定想佢讀好書先！」
感激太太奉獻
早前浩然在劇集《我的如意狼君》中赤裸上身騷肌肉的鏡頭，成功俘虜大班女粉絲，近日他在《拳王》中，更有多幕在擂台「肉膊」場面，自然讓一眾女粉絲大飽眼福。但他最「煞食」是有「膊頭」，因為不論工作多忙，都堅持與老婆湊囝囝：「好多謝太太無私奉獻，現時佢都冇乜點做嘢而專心湊細路，我亦堅持同老婆一同湊大細路，唔會假手於工人！」
即使老婆冇詐型，他仍覺得對老婆不夠好，充滿內疚感的浩然笑說：「老婆一個人喺屋企照顧囝囝，又從來唔會假手於人，都諗到有幾忙、幾多嘢做啦！所以我真係好多謝佢！」
換轉是三年前的徐淑敏（Suki），事事從心出發，定必不會天天呆在家中，悶出個鳥來，她說：「以前我一悶，可以朝早就買機票飛去日本，因為我一早都唔悶得！」今天的Suki卻不可以自己為中心，因為生命再不只有她一人，在生命的畫紙上多了老公和兩個女兒，添上色彩絢麗的繽紛。
Suki說：「我係一個好重家庭觀念嘅人，但以前就唔會以其他人行先，自己想做乜就做乜，依家唔會再咁任性，更因為有兩個囡囡（Vianna和Renee），我知道自己乜都可以唔要，就係唔可以冇家庭。依家更感覺到媽咪以前點解會為我付出咁多，甚至可以為我犧牲，我明點解喇！因為我哋流住同一樣嘅血！」
寧代女兒受苦
就是血濃於水，彼此不能分割，寧願自己承受一切疾病與傷痛，也不願女兒受丁點痛苦，她說：「如果囡囡唔小心過馬路，我見到一定衝出去以身擋車，寧願受傷嗰個係我。兩年前大女剛出世，嗰時佢仲未識轉身，我只係行開十幾秒，Vianna就無端碌咗落床，我見佢個額頭腫晒，真係非常心痛，我一路喊，自責點解連個女都照顧得唔好，係我令囡囡受傷！」
有女萬事足，就連往日浮躁的性格，Suki也把其戒掉，她說：「以前我做事從來都唔需要同人交代，做事好唔沉得住氣，但依家知道唔可以再咁衝動，我同自己講過，一定要沉得住氣，呢個世界再唔只得我一個。」
因為改變得太快，Suki也不敢想像眼前的自己可以如此成熟，更何況身邊的朋友？她說：「好多朋友都覺得我走得太快，快到佢哋都跟唔上，由結婚到生兩個小朋友，再到我唔再係以前嗰個妹仔，有時會諗番，我都覺得快得驚人呢！」
封咪增值身教
但更令人驚訝的，定必是昔日電視台搏殺的「咪神」，今天卻火都收埋，連半點性感都不會益街坊，莫非「咪神」鳴金收「咪」，退出江湖？Suki說：「我唔會唔做嘅！老公都叫我繼續做，唔係因為自己事業心強，而係我想自己繼續學嘢，Keep住有進步，以此為身教。我想令小朋友日後知道連媽咪都去學嘢，佢哋做乜都會自動自覺。」真的改變不是為了自己，而是把所有最好的獻給兩位心肝寶貝，眼前的Suki真的大個女了！
後記：深得女粉絲青睞
黃浩然在《拳王》中所飾演的畢家成輕挑浮躁、愛認叻，更要面對感情缺失，不過現實中的浩然卻是成熟穩重、充滿男人味，更是「絕世好爸」，難怪深得一班女粉絲的青睞！在訪問當天，浩然遇上女粉絲時，亦會有求必應，合照、簽名永冇托手，親民形象深入民心！
後記：全家學習普通話
訪問是在Suki大埔別墅進行，甫入屋，以前不諳普通話的Suki，竟跟大女Vianna用普通話說：「跟哥哥打聲招呼吧！」記者問Suki平時也跟小朋友用普通話溝通？她說：「係呀！因為奶奶覺得廣東話可以成日講，普通話就需要從小學習，所以我都學埋囉！」
浩然因拍劇而錯過不少見證囝囝成長的寶貴片段，令他產生罪咎感。
Suki寧願自己受傷，也不願女兒受丁點痛苦。
浩然攬着老婆莫家嘉和囝囝合照，十分溫馨。
Suki慶幸有老公黃浩和兩個可愛女兒，令她的人生充滿姿彩！
昔日的「咪神」鳴金收「咪」，專心相夫教女。
浩然在《我的如意狼君》中赤裸騷肌，Man爆。
Suki在別墅中擺滿一家四口照片。
Orignal From: 黃浩然徐淑敏 魚與熊掌兼得
沒有留言:
發佈留言