《心戰》或現丁蟹效應 鄭少秋捉食人犯陳豪

無綫監製戚其義同佢個絕配拍檔周旭明繼《天與地》後，再有重口味作品推出，佢哋嘅《心戰》將會接住《拳王》喺本月 21號出街，上次《天與地》玩人食人、講人性題材，口碑勁好但收視麻麻，今次陳豪、鄭少秋同陳茵媺主演嘅《心戰》，又有食人橋段，劇中陳豪表面係魔術師，實際係個變態連環殺手，試過食受害人嘅肉，而鄭少秋係個神經質嘅戲劇大師，會幫警方追緝陳豪。


陳豪（右）首次拍住鄭少秋鬥戲，唔知有玩開股票嘅佢會唔會放晒手頭啲貨？

其實近兩個月嚟無綫黃金時段嘅幾部劇集，好似《當旺爸爸》、《東西宮略》同《 On Call 36小時》都有唔錯收視，就連擺咗喺倉底四年嘅《盛世仁傑》都有捧場客，所以無綫播《心戰》，內部有唔少人都擔心近期嘅高收視可能要掉頭回落，因為個劇可能好似《天與地》咁吸引唔到師奶觀眾。

或現丁蟹效應

仲有，《心戰》一出，除咗令無綫內部擔心黃金時段收視回落，就連股民都要擔心，因為秋官又嚟喇！股民最怕嘅「丁蟹效應」再現嘅話，屆時股市、收視可能齊齊大跌。不過，無綫外事部副總監曾醒明就唔擔心收視，佢話《心戰》題材係冷門，但想畀觀眾新鮮感。

---

Orignal From: 《心戰》或現丁蟹效應 鄭少秋捉食人犯陳豪