因為《天與地》一句「 This city is dying, you know？」 65歲的 Joe Junior近日獲網民封為 Joe Senior、 Joe Master甚至 Joe Supervisor，人氣爆晒燈。這天， Joe化身《天與地》年輕版 Dr. Dylan，細味他入行多年來的「樂」與「怒」。對於自己的對白成為網民金句， Joe笑說：「我都係照稿讀，估唔到網上傳得咁快。我都好叻㗎喇，當日一、兩 takes就拍完。」
Joe Junior揸起電結他似模似樣，怎曉得夾 band夾了幾十年的他，其實不懂彈結他。攝影：葉君海
走紅後跌落谷底
在《天與地》中 Joe向佘詩曼說的一段對白，被指道盡不少港人心聲。電視圖片
Joe的對白，在譏諷香港人為了搵錢而是非不分，人人被訓練到像倒模出來一樣。對前景，一切也睇得好灰。不過，現實中的 Dr. Dylan，心中仍有一團火─就是他對音樂的熱誠、熱愛。「 Paul Anka係我第一個偶像，當年我就係因為聽到佢唱嘅《 Diana》，從此立志要做歌星。」
Joe於 67年組成 Joe Junior& The Side Effects推出唱片，並翻唱《 Here's a Heart》，結果歌曲連續七星期高踞香港樂壇流行榜冠軍，將 Joe的事業推上高峯，他說：「《 Here's a Heart》喺英國唔紅，我哋將首歌重新編曲，改用鋼琴，又將節奏慢番啲，結果一出就大受歡迎。」
可惜，隨着夾 band潮流減退， Joe的事業亦被推落谷底：「突然間喺上面跌番落嚟，生活好艱難。以前夾 band搵唔到錢，搵嘅錢 5個人分，只夠搵兩餐，惟有慳啲使，慢慢捱。我今時今日仲企得番喺度，真係托賴！多謝主耶穌。」
唱夜場不受尊重
Joe曾組成 Joe Junior& The Side Effects出碟，之後他又推出不少個人專輯。
為生活， Joe要到不同夜店唱歌，東撲西撲，收入極不穩定，後來在森森母親介紹下， Joe獲海城夜總會聘請做駐場歌手，月入 5千，生活總算穩定下來。 Joe說：「各位嘉賓，演唱會現在開始……老細叫我做埋司儀，每次人哋演唱會閂幕後，啲人走又好唔走又好，開番個幕之後，我就行出嚟唱歌。 5千蚊一個月，做咗 9年都係 7千。我唔甘心，我鍾意唱歌，唔想放棄、唔想轉行，於是離開海城出嚟再博過，希望再出唱片。」
以為可東山再起，到頭來碰到一面灰。 Joe惟有繼續到夜店唱歌搵錢，結果唱了 8個月，又因為新老闆上場玩改革被炒魷。就在感徬徨之際， Joe遇見中學同學鄧光榮，並獲邀到其卡拉 OK做駐場歌手。
在夜店，真正聽歌的人無幾，猜枚飲酒的卻多籮籮，會否越唱越失信心？ Joe說：「會㗎!記得有次有位先生點唱《 Here's a Heart》，我唱完，佢問點解仲未唱，我就好謙虛好客氣咁同佢講：『唱咗啦，你頭先猜枚太大聲聽唔到啫。』又有次，我唱完觀眾仲想點唱《 Deborah》，樂隊話冇樂譜彈唔到，我叫佢哋畀個 key我唱，佢哋冇反應，跟住執樂器走，我成個小丑咁企喺台度，冇人尊重。如果嗰個係天皇巨星，佢哋會唔會咁態度？」
夜場品流複雜，但 Joe慶幸未被江湖大佬找過麻煩：「佢哋好尊重我。佢哋鍾意聽《 Deborah》，我就唱畀佢哋聽，跟住多謝佢哋，話下次嚟再唱 10隻 8隻畀佢哋聽，要識講說話，??佢哋開心。我冇嘢叻，最叻係有禮貌、有修養、對人微笑、稱呼人多得罪人少，望人富貴唔望人閉翳。
信用卡透支度日
熱愛唱歌的 Joe即使經歷低潮也沒放棄理想。
餐搵餐食餐餐清，是當年 Joe的生活寫照，原來最艱苦日子， Joe試過要用信用卡透支過活：「我試過用信用卡透支過活，一張冚一張，欠銀行 10幾萬。要慢慢捱、慢慢還。所以平時唔捨得買衫，我做騷啲衫都係好平，幾百蚊件買番嚟自己加工。」
為生活、為理想， Joe面對逆境仍得繼續撐下去。撐了 20多年，事業終見曙光， Joe說：「 96年我識咗家經理人 Rose，佢幫我安排演唱會、登台，又幫我搭路入 TVB拍劇。自從我開番演唱會，知道仲有歌迷鍾意聽我之後，自信心返晒嚟，直頭爆晒棚㖭。我係名成利不就，際遇、運氣同人事關係又唔夠，但我都會腳踏實地做好自己，慢慢追求理想。我舉行過 41、 42、 43、 44周年演唱會，出年 45周年，最大夢想係做到 50周年，搵晒啲好朋友一齊熱鬧吓。」
曳仔堅持理想
廿多年前 Joe與 Suzanna結婚，婚後一直享受二人世界。
別看 Joe Junior文質彬彬，他在中學時期可是個打交高手。 Joe在聖若瑟書院讀初中時，便與苗可秀兄長、前無綫高層陳家蓀夾 band，由於 Joe愛唱歌之餘更愛玩打架，結果讀了幾年便被踢出校。
Joe說：「我讀書考試成日肥佬，又成日同同學仔打交，試過一次打到穿頭流晒血，結果因為成日犯校規，被人踢咗出校。之後去咗新法書院，同鄧光榮做同學。不過，我中學畢唔到業㗎，因為我除咗英文之外幾乎科科都唔及格，我唔鍾意讀書，都唔啱我，我淨係鍾意唱歌，亦都因為呢個原因，我先撐到今時今日。」
唔識彈結他
唔講唔知， Joe雖然是 band友出身，但他其實完全不懂彈結他，他說：「結他唔啱我玩，我冇天份，曾經學過幾堂，但手指頭唔聽話，所以冇學落去。」
Joe與妻子 Suzanna經常有影皆雙，年前二人曾拍拖到迪士尼玩。
近年 Joe（左三）常與同期出道的歌手們開演唱會。資料圖片
父子同名
Joe Junior原名 Jose Maria Rodrigues，乳名 Joe Boy，為中葡混血兒，香港出生，中文名羅利期。
65年組 Band
Joe（右）是中葡混血兒，所以經常在電視劇中演外國人。資料圖片
Joe的父親亦是叫 Joe，由於親友致電他家時，家人經常要問找「大 Joe」還是「細 Joe」，所以最後他索性取名 Joe Rodrigues Junior。 65年 Joe組成 Zoundcrackers樂隊加入樂壇， 67年因樂隊解散而另組 Joe Junior& The Side Effects，之後 Joe又以個人名義推出不少專輯。近年 Joe經常會與一些同期出道的歌手開演唱會，亦有演出電視劇。
Orignal From: 黃金視窗：Joe Junior人生樂與累
沒有留言:
發佈留言