FACE週刊第240期

紅潮大檢閱

這一年，我們一起追的星

2011年12月28日

一年一度，電視台輪住倒數海峽兩地要聞大事，娛樂版爭住排名是非人物，其實年年都係嗰幾個老相識，不外乎結婚離婚生仔爭吓家產咁囉。
《 FACE》同大家一樣，望都望多幾個新面孔跑出，幫娛樂圈去舊迎新。不過，今年彈到飛起嘅陳嘉桓夠晒離奇，人人睇好最有前途影壇美少女，一個唔小心墮入橫店雙狼抽水陷阱，同時在新人王和年度十大娛樂新聞上榜，夠晒估佢唔到。反而意料中事係電視小生由煎 pang冧盡 OL師奶界；歌壇則由小巨肺林欣彤贏晒！

陳展鵬小生怕怕（視）

17歲已經係藝訓班藝員， 21歲簽約寶麗金差啲就做到偶像歌手，拍過無數爛片跑過無數龍套，再喺亞視霉足六年， 35歲陳展鵬出道第 17年，竟然因為電視劇《真相》的大律師角色一炮而紅，彈起做師奶殺手。
雖然失意台慶男主角獎，最緊要來年兩套重頭劇都有份，《回到三國》演周瑜，《 ATF反恐》更同吳卓羲平起平坐，仲有外傳同珍姐、王心慰個個高層都有交情，其他小生仲唔買佢怕？
「我最唔識就係同高層打交道！同珍姐就係見過一次面、傾過一次偈就俾影到，我喺 TVB都係由小角色開始做起，遇到王心慰呢個十年一遇嘅伯樂，成功拍出我嘅優點而已。唔好話我取代邊個邊個，娛樂圈好大，我資歷尚淺，演技仲需要好多時間去鑽研。」

被指是珍姐心腹的合照，陳展鵬解釋是今年亮燈儀式，唯一一次與珍姐面對面。

一套《真相》，陳展鵬時來運到，全城師奶讚型！

低智破格天與地

全城熱話、擺喺倉底兩年嘅年度鉅獻《天與地》，因人食人劇情，大膽又寫實，掀起話題。可惜師奶唔多 buy話睇唔明，收視一直低迷，平均只有廿幾點，連同期播放嘅《我的如意狼君》收視都好過《天》。反而連開 3度嘅《法證先鋒 III》，結局高開 43點，成全年劇集收視榜首位，第二位則係視后胡杏兒孭飛嘅台慶劇《萬凰之王》，烏龍低智劇高收，破格創新就話累收視，簡直比人食人更慘情囉！

金牌監製戚其義嘅《天與地》，搵嚟佘詩曼一后三王孭飛， Joe Junior一句：「 This city is dying, you know?」成經典對白。

《法證 III》除咗有收視保證黎耀祥外，仲有吳卓羲和徐子珊呢 pair熒幕情侶。

台慶劇《萬凰》，烏龍茶（紅圈）出現喺清朝宮殿中嘅穿崩鏡頭，成網民笑柄。

林欣彤巨聲巨星（歌）

去年 9月，眾望所歸贏《巨聲》冠軍，即被各大唱片公司力爭，還因為人氣爆強被點名主演年度賀歲片《我愛 HK開心萬歲》。今年，林欣彤以 400萬超級新人價簽約英皇，處女碟已經勁賣白金銷量，還被度身訂做主演《 DIVA》和《起勢搖滾》兩部電影， 11年度樂壇新人獎，被一致認為是鄭欣宜與林欣彤之爭。
「好開心一年之內得到咁多機會，亦都估唔到我一個啱啱畢業嘅細路女，一年之內可以搵到咁多錢。不過連續幾個月冇放假、每日瞓得三個鐘，我因為唱歌入行，呢一年就因為太多其他工作，而將唱歌排到最後，呢啲就係代價。攞獎唔重要，我最開心係拍戲告一段落，公司亦都應承我暫時唔會接戲、更加唔會拍劇，放完大假揀歌、出碟，專心唱歌令自己每次上台嘅表演更專業、更穩定先至最重要。」

靚聲贏盡掌聲，背後又有無綫、英皇兩大巨頭撐腰，林欣彤未來大把位上。

〈那誰〉玩晒

11年冇一首特別 hit爆勁歌，數來數去都係陳奕迅嘅〈苦瓜〉同容祖兒嘅〈花千樹〉。真正紅到上網、又 hit到上街嘅就只得蘇永康嘅〈那誰〉，旋律似 K歌，又多得卓韻芝聲演嘅劇場版〈那誰沒有下次〉，熱爆 YouTube，仲帶挈埋蘇康翻生紅館開個唱，嚟緊嘅叱咤頒獎禮年度播放率最高嘅都應該係佢。

全城《那些年》

九把刀執導嘅自傳式電影《那些年》，講校園純愛，造就兩位主角成萬人迷。

台片《那些年，我們一起追的女孩》喺本港掀起熱潮，上畫兩個多月，仍然強勢，截至上週五（ 23日）累積票房高達 6,079萬，差廿萬就可以打破港產片《功夫》上映 2個月累積 6,100萬票房，成本港累積票房首位。
《那些年》除瘋魔港台之外，仲帶挈片中男女主角沈佳宜（陳妍希）及柯景騰（柯震東）變大紅人。兩位當紮一哥一姐身價暴漲，密密接 job，女神以電影為主，有《愛的麵包魂》及《花漾》；而仲讀緊大學嘅柯震東則主打宣傳個人唱片，佢哋嚟緊仲會去大陸為《那些年》宣傳。長做長有喎！

28歲女神陳妍希因沈佳宜一角翻生，現專心拍電影，早前抽空來港出席聖誕活動已穩袋 50萬。

20歲學生哥柯震東拍《那些年》時片酬只有 10萬台幣，家身價暴升，傳來港出席活動都要百萬港幣。

' 12接力

回顧完 11年彈起紅潮，踏入 12年亦有唔少新人接力。小生花旦趨向國內拍劇掘人仔，造就小花冒起，當中應屆港姐「小法拉」朱晨麗剛拍完處女重頭電影《 Laughing Gor之潛罪犯》，嚟緊仲頂替法拉拍劇，誓要在劇界當頭起。
唱〈勾手指尾〉紅爆 YouTube嘅麥貝夷和鍾一憲，亦會 keep住強勢喺歌壇創出血路。至於電影新貴，非國產歌影視紅星楊冪莫屬，憑國產劇《宮》人氣大躍進，再連拍多套電影，連賀歲片《八星抱喜》都有佢份做主角，龍年當紮新人，一枝獨秀。

朱晨麗 3戲在手（視）

應屆港姐、 24歲朱晨麗好謙：「我真係好好彩，今年有份參演重頭電影《 Laughing Gor之潛罪犯》，做吳鎮宇女友，真係好開心。（有冇人眼紅你？）我諗實有嘅，不過都冇辦法！好彩冇人畀說話我聽。」好多人都話佢笑起嚟似法拉，「我同法拉有見過面，不過我哋都覺得唔似對方。法拉有病推劇，人人都話我似佢先有機會拍《名媛望族》，其實唔係㗎，係編審同監製主動搵我，話我好適合呢個角色。（有咩大計？）我會接拍《衝上雲霄 2》，而且我會學好啲廣東話。」謙虛又勤力，抵 TVB睇重你！

翻版法拉

貌似陳法拉嘅朱晨麗（右一）忙緊拍《名》劇。以往當選港姐最少要做一年親善活動先有機會接劇，但朱晨麗打破慣例，手上已有兩劇在手。

馬賽一飛衝天

08年當選港姐季軍，今年已經一口氣推出《不速之約》、《九江十二坊》同《萬凰之王》等五套劇集， 24歲馬賽順理成章成為今年上位最快小花，還以網上投票大熱姿態贏得台慶「飛躍大獎」， 12年仲有幾部大劇在手，分別係《名媛望族》、《耀舞長安》和《當旺爸爸》等，加上外形純品、氣質少有，大把位上。

「台慶嗰晚我同胡杏兒（應屆視后）慶功，佢話『呢條路係辛苦嘅，一定要堅持落去！』，我唔可以控制輸贏，但係更加唔可以放棄。」

' 12續集劇霸晒

TVB每年電視劇產量唔少，但可以贏得觀眾歡心嘅實在唔多。加上小生花旦離巢，選角重新洗牌。 12年最強係玩續集，有蔡少芬復出嘅《金枝慾孽 2》和大星聚首嘅《衝上雲霄 2》。

宮廷勾心鬥角古裝劇《金枝慾孽 2》，有原班人馬陳豪及鄧萃雯演出，亦有新加入星媽蔡少芬，至於佘詩曼就仍考慮中，不過林保怡及張可頤就未知有冇機會「翻生」。

5月先開拍嘅《衝 2》陣容由巡禮至今，不斷傳出變陣，主角 Sam哥吳鎮宇話好大機會拍，加上舊有陣容視后胡杏兒、黃宗澤、林峯、吳卓羲等，大晒冷喎。

《怒火街頭》令 Law霸翻生，胡杏兒又難得討好，出爐視帝視后再度延續《怒火》熱潮，續集中 Law霸褲都剝埋，真係搏到盡。《蘋果日報》圖片

〈勾手指尾〉單飛進攻（歌）

〈勾手指尾〉前，兩人都話覺得好沮喪，麥貝夷話：「我哋真係冇咩 job接，收入好低，完全唔覺得自己係一個歌手，唔好話頒獎禮，連 show都唔多個。唱咗〈勾手指尾〉後就好唔同，起碼有人識我哋，〈勾〉仲幫我哋攞到獎，真係好似發緊夢咁！」（會唔會再做情侶檔？）鍾一憲：「呢個真係唔知，公司都未同我哋傾，不過我哋都唔想局限喺兩個人，希望可以分開發展。如果可以拍劇或者電影就更好啦！我哋隨時 ready㗎！」乜 job都接，實大把機會啦！

左起：麥貝夷、鍾一憲

憑一首〈勾手指尾〉喺網上爆紅，累積至今點擊率達二百多萬嘅麥貝夷及鍾一憲，接力作〈拖泥帶水〉都有六十五萬點擊， WhatsApp feel MV界最 buy。

今年暑假，被公司塑造成情侶檔，推出〈勾手指尾〉，成 YouTube熱爆點擊歌，帶挈麥貝夷和鍾一憲不斷以情侶檔接 job， show價躍升至幾萬元一個，令幾乎零收入嘅他們變紅人。

《宮》女楊冪三線發展（影）

25歲內地演員楊冪， 4歲童星出身，自細已經拍慣電視劇。 09年，佢憑一部內地電視劇《仙劍奇俠傳三》，躍身與黃聖依、王珞丹及劉亦菲三人被封為內地「新四小花旦」。去年的《美人心計》和今年主演的穿越劇《宮》一劇而迅速竄紅。
《宮》劇彈起嘅楊冪，年紀輕輕就已經歌、影、視三棲發展，仲由內地撈到嚟香港。多線發展嘅佢，除有份拍住陳慧琳、吳君如，接拍黃百鳴賀歲片《八星抱喜》外，嚟緊仲有同千嬅合作嘅《春嬌與志明》及《畫皮 2》等。楊冪話：「在香港拍電影不會陌生，工作人員對我好，香港對我來講好親切。跟黃導（黃百鳴）合作好高興（來年大計？）我 1月份會出新專輯《親幂關係 Close To Me》，心情好興奮又很緊張，希望大家多多支持！」三棲確係威喎！