我是無綫藝員訓練班出身，主持《娛樂新聞眼》前，都演出過好多劇，做過路人甲路人乙，最記得是在溫碧霞主演的《火玫瑰》中做嫖客囉，我們成班訓練班同學，男的做嫖客，女的做舞女，當年我十九歲，第一次去夜總會，在尖沙咀現場實景拍攝，收工時已經天朦光，步出夜總會嗰刻，我仲心諗大家會唔會以為我做咩呢？會唔會真的以為我去嫖到咁夜？當晚感覺似同學聚會，我們男同學着晒西裝，女同學就低胸，好難得畢業後大家有機會撞番晒一齊，感覺好好，仲見識到夜總會係點？原來入面房間的間隔係咁，不過間夜總會已經執了。
古巨基回想番以前，雖然只係做「二打六」角色，但呢種經歷都幾開心同得意。
做主持前的古巨基（右）其實已演出過好多劇，曾與視帝鄭嘉穎（左）合作過。
歷盡茄哩啡生涯
除了嫖客，我又拍過宣傳片做剪影，連樣都見唔到，在鄭伊健擔正的《金蛇郎君》，我就做村民，一句對白都冇，只是口噏噏，另一套古裝劇，我就「瞓」在一隻漂浮在海中央的木艇上，可能未到我趷起身，我記得我瞓低對住個天，望住落日黃昏美景，當時對前路都幾迷茫，望住個天在心裏問：「點解我會喺度嘅？跟住我又點呢？」但今日回想起這些片段，我覺得幾開心、得意，讀了四個月訓練班，再加埋半年實習期，期間演出過好多套電視劇，但好多劇名都唔記得了，我覺得自己好幸運，算是拍了不少「作品」，做人是要有這些經歷，我覺得是好的。
挑戰高難度角色
在電視劇、電影演出過不少角色，最難演是跟趙薇、林心如、蘇有朋合作的電視劇《情深深雨濛濛》，最初真係唔知點演？係唔識演，我覺得自己未係好攞到演瓊瑤戲個種味道，在頭兩個星期我畀到自己好大壓力，每晚收工返到房我有喊過，覺得自己做唔到要做嘅「嘢」，當時好沮喪，好驚影響大家的進度，曾經閃過一個念頭，我跟助手說：「我好唔好打畀瓊瑤阿姨講我做唔到，好唔好同佢講你唔好用我喇，當然最後我冇做呢個動作，如果我做了即代表我放棄，但最後我都堅持。」
之後我唔知點形容你知嗰種神奇，突然有一日我開始唔記得我係古巨基，每一日我都做緊何書桓（劇中他演的角色），完全唔需要諗點樣去演，自自然然就演落去。
口述：古巨基 筆錄：音樂組
Orignal From: 古巨基19歲嫖客初體驗
沒有留言:
發佈留言