08年香港中學會考中文科嘅題目入面，一句「見鬼勿O嘴，潛水怕屈機」，成為全城考生熱話。
09年，《學警狙擊》嘅Laughing哥（謝天華飾）成為網上風雲人物，同年拍下電影《Laughing Gor之变節》，票房勁收過千萬，確係屈機。
11年，天華夥拍黃宗澤（Bosco），拍下有「Laughing哥續集」之稱嘅《潛行狙擊》，收視最高40點。轉過頭重添食拍埋電影版《Laughing Gor之潛罪犯》，程序跟足09年千萬票房方程式，但觀眾buy唔buy，最緊要都係要睇部戲本身。
不過今次電影宣傳，天華 、Bosco齊齊封口。聽完唔使O嘴，至少我哋知道呢套戲係賣神秘嘅！
>text：企 >photo：靜儀 >hair：Kel Fung@ HH hair>make up：Cyrus Lee @ Beautytech >wardrobe：Initial >design：鄭子軒
兜圈曬幸福
筆者屬鹹底，《潛行狙擊》入面，我最喜愛場面第1位，就係徐子珊向Bosco肉償嗰場，可惜Bosco話《潛罪犯》入面零肉搏。轉觀天華嘅舊拍檔陳法拉，劇集結局死於非命，戲中難以翻生。有秀色才可餐，古今中外冇1部戲係冇女色可觀，Laughing哥點都要有個伴。
天華：「我嘅另一半係我太太（笑淫淫）！」
聽到我毛管都棟埋，準備省略呢啲本應喺閨房先聽到嘅肉麻情話之際，Bosco忍唔住開口插佢。
Bosco：「走啦你！哈哈！咪喺度晒啦（一手拍落天華大髀）！」
Bosco你咪又係啱啱同胡杏兒公開完「互頂宣言」。天華同圈外女友Tina結婚近7年，Bosco同杏兒亦剛好拍咗拖7年，冇7年之癢，反而幸福滿瀉。《潛罪犯》入面嘅邪惡主腦霍天任（吳鎮宇飾），用讀心術控制黑白兩道嘅人為佢辦事。現實中有辦你睇，謝霆鋒同張栢芝一夜反面，可見維持一段細水長流嘅關係，真係要學識讀心術先得。
天華：「如果我哋識讀心，咁就發咗達啦！我懷疑我太太識讀心術（Chok樣即刻變冧樣），但佢嘅讀心術淨係讀我㗎啫！我唔知點解有時會俾佢睇穿晒我啲嘢。」
「咁杏兒識唔識讀心術？」我追問Bosco。
Bosco：「嗯……（嗯咗好耐，筆者開始為佢計時，數到第4秒……）冇咩嘅！哈哈！不過女人嘅心思係細密啲嘅（冧笑）。」
諗咁耐先答，要諗嘅多數唔係真心話？
Chok輪林峯
Bosco出道至今都走喜劇路線為主，可能係因為喺《我的野蠻奶奶》入面，怕老婆又怕阿媽嘅甯茂春一角入晒屋，之前拍過5部電影嘅佢，有4部係喜劇。近期Bosco轉型行成熟路線，留咗鬚，形象man咗，戲路都闊埋。
Bosco：「不嬲都係做啲比較輕鬆嘅角色，冇咩《潛行狙擊》呢類戲味咁重嘅劇，所以拍得好開心，可以做啲新嘅嘢，冇咁悶，又有發揮，其實對我嚟講係好事。」
天華：「係呀！有男人味，同埋剛陽味重啲！」
喺Laughing哥上身之前，其實天華都係飾演小男人角色比較多，《真情》入面嘅羅生門，係個群腳仔；《皆大歡喜》入面嘅金月，係個老婆奴。
Laughing哥呢個角色可以話改變咗佢嘅下半生，令天華重振雄風。如今天華嘅男人味，chok暈一眾女觀眾，連林峯都甘拜下風。
《潛罪犯》無可否認係部chok戲，所謂內心戲多，其實就係對白少、用動作，用眼神交戲。曾幾何時有女士同我講過：「男人認真嘅時候，個樣就最chok喇！」咁戲入面天華同Bosco大可以名正言順鬥chok。
天華：「Chok？我哋不相伯仲。」
Bosco：「林峯chok啲！哈哈哈（全場大笑）。」
可見兩人默契，以及待人處世功力比chok功更勝一籌，實在都係高手級！
著泳褲冇睇頭
現實少少，個角色幾有發揮都係次要，拍戲最重要都係商業考慮。上次《Laughing Gor之变節》狂收過千萬，我唔信佢哋對今次《潛罪犯》嘅票房冇期望。
天華：「香港票房一向都冇得計，我哋無謂去猜測。」
Bosco：「反而我哋期望觀眾覺得我哋拍呢類型戲其實都幾適合，第時有多啲人開呢類戲俾我哋拍，咁咪重開心！」
天華：「或者期望多啲人返嚟睇香港嘅電影啦！」
一開始同大家講過，筆者係鹹底，我保證會入戲院撐《潛罪犯》，假若今次票房比《Laughing Gor之变節》重要好，我最想睇天華同Bosco着泳褲謝票。
天華：「上次都冇咁做，我覺得唔需要承諾點樣謝票，只要觀眾覺得好睇，我就承諾繼續拍啲好嘢俾佢哋睇。突然間着泳褲好似低層次咗。」
Bosco：「我着泳褲都冇說服力啦！哈哈（大爆笑）！我冇着褲都被人睇過囉（早前某週刊刊登Bosco喺屋企沖完涼，全裸通屋走嘅相片）！」
天華：「你條格仔泳褲呀（刊登時下體打咗格仔）？哈哈！」
「你啲fans嫌個格太大呀！」我補充道。
Bosco：「可以再細啲咩？哈哈！」
《Laughing Gor之潛罪犯》上映日期： 2011年12月29日
夾住Chok
天華同Bosco兩位chok得之人，埋位影時自動chok，不難想像吖！影完一大堆chok相之後，兩人以為搞掂收工，筆者話：「未得住！」兩人滿頭問號。
其實我係想講：「差張（同我）合照呀！」
唔知係攝影師識做，定係場地真係太窄，支鏡又wide，攝影師不停叫天華同Bosco企埋啲，夾喺中間嘅筆者，真係冧到暈！
最後Bosco索性笑笑口叫天華：「一齊夾住佢。」
都話佢哋功力深厚，今日又chok多咗個fans返嚟喇！
Orignal From: 謝天華 X 黃宗澤 見字勿O嘴 潛罪犯 屈機
沒有留言:
發佈留言