電視有正嘢
《 On Call 36小時》食住上 「關二嫂」單挑楊怡
2012年02月10日
上期啱啱講完《衝上雲霄》第二集要四月先開拍，呢頭 TVB就推《衝》劇監製潘嘉德嘅新劇《 On Call 36小時》出嚟嘞。
咦，呢套講實習醫生嘅寫實劇好似拍完無耐咋喎！為乜又咁急要推呢？望吓個陣容先，有喺《缺宅男女》鬧人鬧出位嘅「關二嫂」黃智雯，又有楊怡同羅仲謙呢對疑似姊弟戀人（咪就係拍《 On》劇開始傳緋聞囉！），真係未播已經有晒追睇 point呀！
值得留意嘅係，劇中「關二嫂」會同楊怡鬥一番，新一代姐仔正式上位。各位阿姐級準備接招，有戲睇咯！
由怕事「鵪鶉妹」做到巴渣「關二嫂」而走紅嘅黃智雯，有「翻版楊怡」之稱，呢次挑戰正版，做第二女主角，前途無限！
老老實實，由鬼佬醫生劇《 ER》到香港製造嘅《妙手仁心》系列，講嘅嘢都離不開醫院中嘅生老病死，醫生護士間嘅情情愛愛。然後，又必定有主角身患重病，能醫不自醫，總之非常之咁發人深省！呢一套，你唔係諗住會有例外嘛？當然， TVB嘅編劇都特登將啲主線放喺一班實習醫生身上，等大家覺得同《妙手》系列有啲唔同，另外亦有專業醫生通宵留喺錄影廠教班演員點用儀器，真係辛苦晒！
上年十一月，楊怡羅仲謙被撞破去大尾督密會，其實睇探班相見楊怡繑「大隻謙」繑得咁埋，就知有啲嘢啦！《蘋果日報》圖片
急症室場景梗係唔少得，劇中馬國明同楊怡仲成日為工作爭拗㖭。
實習醫生新態度
今次由楊怡演名醫之後，一個好有熱誠嘅神經外科實習醫生，佢仲力追一心想醫好癱瘓細佬嘅平民醫生馬國明，食正依家香港女多男少，中女要突圍嘅熱潮。
不過，最吊詭嘅係，劇中同樣做實習醫生嘅羅仲謙，戀上師姐楊怡（現實中，佢哋就俾人影到鬼祟夜會 BBQ囉！）。嘩，有無咁戲如人生呀？呢段戲嘅效果，應該自然無比噃。咁「關二嫂」又點鬥呢？咪就係靠自己不斷向其他醫生請教更高超嘅做手術技巧，同劇中家姐楊怡鬥醫術。咁佢無「大隻謙」幫手，係輸蝕啲嘅，其實做姐仔同做實習醫生一樣，要捱吓囉！
劇中馬國明年幼喪父，為令雙腳癱瘓嘅細佬（魏焌皓飾）可以再行路，立志成為醫生。黃淑儀就飾演佢哋阿媽，做清潔工人養大兩個仔。
楊怡後來患上惡疾，愛人馬國明又喪弟，好慘情！反而黃智雯有飾演風流醫生嘅袁偉豪錫住。
播映日期： 2月 13日起
周一至周五晚 9:30pm
翡翠及高清翡翠台
Orignal From: 《On Call 36小時》食住上 「關二嫂」單挑楊怡
沒有留言:
發佈留言