港女大戰
鬧爆《盛女》參賽者 整容 Winnie：抵佢哋死
2012年04月11日
家陣廿五歲以上的女生，都俾人叫做「中女」，加埋其他形容詞如「港女」、「敗犬」、「剩女」，「宅女」等，當冇拖拍嘅係怪物。
剩女愈嚟愈多， TVB早在六個月前開始籌拍一個真人騷節目，本週一晚正式播出的《盛女愛作戰》，一連 10集找來 5個單身女人，幫佢哋進行大改造，而節目除有蘇玉華做旁述外，更邀得唔介意話自己整容，又常將港男掛在口邊的美容專欄作家 Winnie（梁穎妍）做「教官」培訓各參賽港女。
以為 Winnie會繼續唱衰港仔，但她竟然忍唔住鬧爆《盛女》參賽者， Winnie話：「佢哋失敗（冇男人），都係抵佢哋死！」好嚴厲啫！
《盛女愛作戰》除咗搵嚟 Winnie作星級導師團的首領，亦邀得同為中女的蘇玉華為節目作旁白。
TVB於六個月前，以真人騷的方式籌備首個關於剩女的節目，幫 5位素人參賽者改頭換面，更請嚟整容達人 Winnie做節目顧問，幫五位港女脫離剩女行列變身「盛女」，不過班剩女未成功溝到仔前， Winnie竟率先向佢哋開炮。
節目中的其中一位剩女 Suki在參加節目後亦覓得男友。
一班參賽者喺六個月內得專家協助進行大改造，除了要學化妝、儀態外，亦有兩性關係顧問傳授吸引異性秘技及男女攻略。
「固執、扮嘢、死要面」
Winnie今次以多重身份參與，佢除咗為節目的首領外，亦擔任美容及形象指導，也是 5位參賽者的訓導主任。
身為節目導師的 Winnie，其實早喺 10年的《星期二檔案》的「中女告白」中，毫無保留講盡港男而成為港男公敵，不過 Winnie未驚過，佢話：「我之前乜戀都試過，異地戀、姊弟戀、多角戀乜都有，做過人哋第三者，亦有試過被第三者介入，啱啱同拍咗幾年拖的男友分開，本來同佢有結婚打算，不過我唔想咁就一世，所以選擇分手。時下啲港男係好細膽，係一群自卑變自大的人，有時佢哋都幾不負責任，幾唔可靠，不過我都認為始終兩個人比孤獨一個好，好 local的地道港男我唔多 ok，喺外國讀完書的我會 ok。」
講得起火，不過原來對住班港女更氣頂， Winnie話：「首先我係覺得佢哋勇氣可嘉，換轉係我都未必有呢份膽量，不過佢哋有啲份人固執、扮嘢、死要面、口不對心、自以為是，參加節目打正旗號要改變自己，但佢哋有啲仍要堅持自己，咁搵唔到男人，都係抵佢哋死！」
據知本週的《盛女》節目中，亦會播出 Winnie嚴厲鬧參賽者的畫面，而當中參賽者有唔聽教，未必所有參賽者改得好，其實 Winnie都係出於一番好心，想你哋快啲搵到真愛啫！
整容烈女
38歲的 Winnie Leung梁穎妍為一雜誌寫美容專欄，一向言論大膽， 10年為無綫的《星期二檔案》的「中女告白」的主角之一，於自己的專欄及 blog中，大膽分享整容過程，現為無綫《盛女愛作戰》中擔任導師。
勇字當頭
言行大膽的 Winnie，常於自己的博客中親自試最新美容產品，早前更喺其專欄及博客中，分享佢去韓國整鼻及做吊線變眼皮手術。
向新聞部借人
TVB以全港首個真實全紀錄的真人 dating節目打響旗號，幕後的製作班底為無綫新聞及公共事務科的《港男港女》的製作班底，而節目統籌岑應（小圖），為《星期二檔案》的編輯，專長男女關係探討，岑應為節目的收視保證，由佢負責的節目都獲高收視佳績，如《港男港女》、《中女告白》均為佢的出品，今次專登向新聞部借人拍攝呢個節目實屬少有，亦因已離職的陳志雲開綠燈而促成拍攝。
今次係例外！（真實對白）
《春嬌》剩女：我冇 Brenda咁好彩！
以「盛女」為題，可謂今期熱話， TVB以節目去幫助一班剩女覓真愛，而近排人氣急升的剩女界代表一定係《春嬌與志明》中，飾演春嬌的密友 Brenda， Brenda上集因行騙不遂，而被台灣仔「彈鐘」，今次導演彭浩翔就擺明益佢，上次慘痛經歷，今次終於畀 Brenda遇到黃曉明，修成正果，羨慕死一班剩女觀眾。
飾演 Brenda的林兆霞（ June）現為劇團中擔任行政工作，亦係一位話劇演員，佢話：「我都有段時間冇拍拖，我都好欣賞 Brenda呢個角色， Brenda只係一個渴望搵到真愛的中女，而好積極進取去出擊，而我本身就比較隨緣，亦都唔係要急住結婚嘅人，我覺得港男大部分都係張志明嗰類多， Sam（暗戀千嬅的北京男）嗰類就少啲囉，不過係咪港男都冇所謂，我覺得溝通先係最重要，我就冇 Brenda咁好彩，從未遇過高帥富的男生。」
話劇出身
唔願透露年齡的林兆霞話自己係中女一名，本身係業餘舞台演員，其後認識咗詹瑞文夫婦，而跟佢哋學戲而愛上演戲。
林兆霞話其實開戲後先知同黃曉明有對手戲，第一場係拍呢場卡拉 OK熱戀戲之後，先拍餐廳怕醜邂逅。
港版「鳳姐」
早年的林兆霞與現在冇乜大分別，而「 Brenda」呢一角亦令佢喺內地被網民封為港版「鳳姐」。
Orignal From: 整容Winnie（梁穎妍）鬧爆《盛女愛作戰》參賽者
沒有留言:
發佈留言