壹週刊 第1160期 豪語錄
我的志願 李添勝
2012年05月31日 小學作文，《我的志願》做清道夫。未有外判制度，未有最低工資，份工不亢不卑，是務實的鐵（雖非金）飯碗。
那些年，看着李添勝在《歡樂今宵》演「掃街茂」。布景組小工出道，進身製作，粉墨登場賺點外快，理想兼顧開飯。
四十年來家國，官至無綫戲劇科製作經理，唯一獲頒萬千星輝大獎的幕後人——藝員得此榮譽不難理解，反正一場 show；幕後呢？幕後就係枱底，枱底就係政治，先決條件，要無黨無派別。明明手握生殺大權，翻遍娛樂新聞，卻甚少見到某某星討好添哥之報導。
清道夫是最不會受賄的公僕。
明明揸住盤數，李添勝擅長慳水慳力的民初肥皂劇（自嘲），躬行節儉，讓出資源給部下開拍高話題但往往低收視的攞彩作品。徒子徒孫飛黃騰達進軍電影，他卻說：「受不了那套嘥錢文化。」
踢波，李添勝應也司職後防清道夫。
尚差幾個月，李添勝年屆六十五，退休事在必行。臨老仲講我的志願？有心唔怕遲，如果你相信，世間有種情懷叫高潔，是要經常打掃的。
後鑊
崩牙的「掃街茂」，當年故意不鑲，增加喜劇感。
客串幕前，除了「掃街茂」，尚有《袋鼠絲苗為兩餐》，懷舊 show裡甚少提及，費事益人也。李添勝說：「就唔好笑現在的植入廣告，以前成個品牌加在劇名都得。」有段日子，維港取景驚死影到對面海霓虹招牌；收咗錢，遊戲節目公然表演食巨浪薯片添呀！此一時彼一時的在商言商，李添勝經歷遍了，總操作如儀。
上期《豪語錄》訪問梁烈唯，小壞蛋一語中的：「最渴望演韋小寶，不過添哥都退休了，今後應該無金庸劇。」改編金庸要才情，王天林、蕭笙，與學歷無關，與修養有關。掃地為兩餐，李添勝也戲如人生來自草根，古裝民初拍得有板有眼，靠自睇書。
「本來做澳門電台小工，一場暴動，百業蕭條，好彩六九年入咗 TVB直到依家咋。」
謙遜的李添勝，少談感性多談現實：「難再拍金庸因資源問題，是資源不是錢——五大派高手幾十個，戲份唔多但要有氣派，有氣派的演員愈來愈少。我拍到呂頌賢版的《笑傲江湖》時，已經要把『桃谷六仙』縮為『桃谷四仙』。」
知其不可為而為，李添勝仍可以複製出兩個版本的《鹿鼎記》（八四年和九八年）。「由梁朝偉變陳小春，人腳已經差好遠，七個老婆選角仲頭痕，但公司覺得依然有利可圖，咁在商言商……」
即是，李大廚識煮魚翅亦肯煮粉絲，縮皮「無記酒樓」請到個甘心被嘲食老本的抵得諗「後鑊」，難怪長賣長有。
揸數
四十幾年一早搾乾搾盡，唯有盡量執行得好，仲袋住十條八條橋走咩？
李添勝打工哲學便如此：不邀功、顧全大局，適合擔任揸數（製作經理）。「這個位難坐，搞創作總貪大場面，應使則使吧。以我職位出埠可坐 B class，但共行的同事坐經濟，齊齊 upgrade使大佢？寧願我 downgrade囉。」
退休，因為腰患，難以親力親為跑外景。
「睇着套爛片《潛行凶間》，悶悶哋去廁所，差錯腳一仆，就搞成咁，哈，下次入戲院要自備電筒。」
認為《潛行凶間》（ Inception）爛片，李氏觀點可窺一二。的確，夢中之夢，幾鬼煩。映像不似小說方便翻來覆去咀嚼，尤其電視天職陪觀眾晚飯，太深奧，唯恐消化不良。《天與地》那種話題之作，贏了的是創作人口碑，苦了的是收視，李添勝自言拍不來。
「其實只少了三、四點（收視），拉勻無問題，電視台應該提供多元口味省招牌，係我唔識啫。聽講《心戰》仲深……」
懷念以前無咁偽善，劇中人個個煙仔擔擔出鏡。
李添勝不用搏出位跳出去，廿五年前已拍過《開心快活人》，僅此一部，嚴格而言算電視衍生產品（主角用鎮台小生梁朝偉）。
「導演費十五萬，亂足我八個月，除埋萬歲錢（片場請消夜），每月得萬幾，咪再搞我。傾劇本要去中國城，玩幾粒鐘，傾就傾一陣，片主請十次，我請番一次都唔掂啦，同老婆亦難交代。
「而且不習慣電影界擦鞋文化，好多人討好你，你又要討好人，以求埋堆下次有工作。電視台並非無（擦鞋），少啲，大家 份月薪，無咁胡思亂想。」
事事規行矩步，來到封刀的《神探哥倫布》，有何心願想突破？「想拍得抽離些，但無話最後絕招嘅，四十幾年一早搾乾搾盡，唯有盡量執行得好，仲袋住十條八條橋走咩？」
清末來華傳教士戴德生曾言：「吾若有千金英鎊，中國可全數支取；吾若有千條生命，絕不留一條不給中國。」
金手指
九十年代的李添勝。
「那麼。」我不懷好意問：「一退全退？」挖角風雲，太多出門口即向左走向右走。
李添勝話頭醒尾：「王維基請過食飯。我話：『王生，滿枱珍饈百味，你看着我食得幾多？年紀不饒人呀。』份公積金夠我食埋嗰十幾廿年。」
淡泊如斯。
從梁朝偉聯想黎耀祥，上溯周潤發、鄭裕玲，盡說李添勝具點石成金之能，但姜太公封神，姜太公自己沒位列仙班。點石成金的手指，本身是金嗎？
「未紅就小演員，紅咗就大明星，幾年內搵到我一世嘅錢，我都開心，因為總算無埋沒人才。我係掃街茂，如果有林峯樣貌，都會考慮捧自己嘅。
王生，滿枱珍饈百味，你看着我食得幾多？
「你紅了請我食飯，我話 canteen得嘞，咁 canteen無好餸，飲杯咖啡得嘞。我起用馬賽拍《哥倫布》，她送盒朱古力放我 office，班大帝未等我返已經食晒。」
換轉我，會心理唔平衡，或老虎點點自己仔女或條女，才叫金手指……
李添勝說：「我更在意起用 under show的藝員，叫部門列出名單，哪些情況危急的，盡量先安排角色給他們。」
公司制度，不夠 show的藝員可被不獲續約。我想起，應屆金像獎大放異彩的盧海鵬和蘇杏璇，何嘗不是「吊鹽水」下之棄將？還有眼前這正色立朝的老臣行將歸里，花果飄零，我吃 TVB奶水撈電視汁長大，也不禁為帝國斜陽，悲哀。
灌園叟
退休生活，李添勝說，計劃在丁屋旁種瓜種菜，弄孫為樂，頗有詩人陸游「少攜一劍行天下，晚落空村學灌園」的況味。
家園一片淨土，比什麼都重要。
黎明即起，灑掃庭除，要內外整潔；既昏便息，關鎖門戶，必親自檢點。
——《朱子治家格言》
年輕朝氣，像「掃街茂」保持環境與心境一清二白；老了日入而息，別放水讓人走你後門，別戀棧權位，午夜夢迴不怕瞓唔着。
就莫怪我經常拋書包啦，《朱子治家格言》收錄於每年銷量高企的厚裝《通勝》，簡明易懂，如添哥劇集《民間傳奇》，原該是傳統智慧。
職員證的編號沒替補機制，四十多年來無綫請過幾多人？「個位十位數字的一早走晒。」
撰文：余家強
攝影：梁炳權
協力：歐陽慧芯
整理：潘倩兒
Orignal From:
我的志願 李添勝
