無綫藝員朱慧敏（Queenie），自出道以來便經常要在劇集中飾演「小三」的角色，即使近年擺脫了「花瓶」之名，演技亦開始備受肯定，卻仍然經常被人質疑她是靠「嗲功」上位，Queenie對此不禁大呼冤枉！
否認靠嗲上位
「大家都誤會咗我！之前我拍處境劇《畢打自己人》嘅時候，有報道話我搭上已婚監製，先有咁多戲份，又用『姣溝』字眼，但事實上我連嗰位監製嘅電話都無，更加未試過私底下同佢傾過偈，點解要咁寫我？我最初真係好唔開心，亦都試過匿埋喊，又唔肯出街，不過最後我諗通咗，我行得正企得正，怕咩畀人寫，唯一可以證明自己就係演好啲戲！」
朱慧敏初入行時經常做小三角色，但近年開始擺脫小三形象，演技備受肯定。
04年朱慧敏參選港姐獲得旅遊大使獎，父母有到場支持愛女。
朱慧敏與陳美詩（左）在日本遇車禍後回港，二人仍猶有餘悸。
渴望組織家庭
自小父母便已離異，7年前又要面對母親患癌離世的打擊，但這些經歷沒有令Queenie對婚姻卻步，反而更想可以擁有一個真正屬於自己的家！
朱慧敏港姐出身，當年更是大熱佳麗之一。
朱慧敏每次遇到不如意事時，都能堅強面對。
朱慧敏之前被影到與EO2成員Eddie孖住行街。
「我細細個父母就已經離婚，我自細就跟媽咪生活，其實我好渴望可以有一個熱鬧嘅屋企，人哋有好多兄弟姊妹，而我就孤身一人，所以我好渴望可以組織一個完整家庭！有時同事嘅爹哋、媽咪會煲埋靚湯嚟探班，我都好想自己有屋企人來探我！我好想結婚，但係又好驚會離婚！父母離婚對我嘅打擊真係好大，但惟有提醒自己需要樂觀面對，佢哋係我嘅反面教材，所以我都會睇一啲有關夫妻之道嘅書。細個我會怪其他人，但大咗就要為自己負責，唔會再blame自己嘅過去。」
去年十一月，Queenie與陳美詩到日本拍攝旅遊特輯時，不幸遇上車禍，連人帶車衝落數百米深的山坡，經歷生死一瞬間，這次車禍除了為Queenie帶來了不少後遺症外，亦改變了她對人生的睇法。
遇車禍有啟發
「出事嗰一刻我諗『乜咁就玩完，我仲有好多嘢未做，好多地方都未去過！』人真係好渺小，我只係差一、兩秒就同大家講拜拜，今次大難不死令我更加珍惜身邊人！想做咩，就去做啦！真係唔好等！今次意外後我頸骨移位，即使醫生幫我移番正，但係只要我動作大少少嘅話，又會再移位，真係好煩，而且係傷及『大陣』，企得耐啲就會全身痠痛，所以如非必要，平時我一定唔會着高跟鞋！有時都諗如果有人喺身邊照顧我會唔會好啲？其實今次都係一次好機會去訓練自己獨立，因為我都想將來可以照顧身邊人！」
感情秘密經營
港姐出身的朱慧敏即使緋聞不多，但卻令人印象難忘，鏡頭前搏到盡，膽敢不施脂粉，以素顏「殘爆look」示人，但一談及感情事，Queenie卻完全絕口不提，害怕感情見光死，可能因為在感情路上一直跌跌碰碰的她，學懂了步步為營。
「我真係好唔想講感情事，好想低調處理，因為每次我公開講感情事之後，好多時就會被人抨擊，出席任何場合都好，又會被問及感情，我真係好想要番啲空間，過咗去嘅事同人，我唔想提！如果我結得成婚就一定會公開同大家講，我怕公開感情會影響對方，亦會影響對方家人！」
後記
拍攝當日朱慧敏（Queenie）與小記無所不談，唯獨談及感情事時卻耍手擰頭，當小記提到緋聞男友、EO2成員Eddie時，朱慧敏即尷尬甜笑，並反問小記：「點解要講佢？」看來一向重視愛情生活的Queenie真的想好好保護小愛苗。
採訪：李佩珊 服裝： I.T
Orignal From: 朱慧敏女強人搣甩姣名
沒有留言:
發佈留言