談到在熱播劇《拳王》的演出，胡定欣說：「我自己好鍾意呢個角色，今次同以前啲角色好唔同，丁丁嘅外表好柔弱，命運好坎坷，直到佢喺偶然機會遇到唐拾一（鄭嘉穎），接觸咗打拳之後，令佢有做人嘅目標，開始改變命運。」
胡定欣與韓國藝人李承鉉於08年，在《舞動奇跡2》中奪得季軍，她的舞蹈天份令人眼前一亮。
胡定欣在娛樂圈打滾了11年，她坦言對自己有信心，希望可以朝女主角一步一步的邁進。
攝影：陳慧安
化妝： Jessica Chan
髮型： Matt Chiu of Xenter
服飾： Magenta
為了做好女拳手一角，定欣努力學打拳，果然有板有眼。
胡定欣在2001年參加周刊 cover girl選舉而晉身娛樂圈，當年由楊千嬅頒獎給她。
練拳學手語
雖然現實生活中，定欣不懂手語，亦不懂打拳，不過當接到這次演出機會時，絲毫沒有猶豫過，她笑說：「呢類角色唔係成日喺電視劇出現，所以我好珍惜呢個機會，好多謝監製嘅信任。當我收到通知，真係好興奮，跟住仲即刻去學手語同搵教練學打拳，可能到最後會有人覺得我唔識打，但係我唔係咁睇，我覺得一係唔打，一打就要令人相信真係做到呢樣嘢，冇得懶，所以戲內戲外我都係同個角色一樣由零開始同步學。」
入行11年，定欣先後演繹過不同的角色，但她不諱言這角色出現合時，她說：「因為今次演聾啞人，要靠面部表情同身體語言表達，好彩喺家先出現呢個角色，因為靠以前累積落嚟嘅經驗，令到我覺得冇嘥到呢個角色，當然可能過多幾年再睇，會覺得有啲地方可以做得更好，但係我家覺得滿意，好滿足呢個角色，睇埋大家嘅評語，知道好多觀眾睇得好投入，真係好多謝大家支持。」
定欣的確下了不少苦功學手語，亦試過向監製提出一個大膽意見：「我開頭同監製講，不如唔好加旁白，淨係感受我做手語，不過傾傾吓發覺真係冇可能，始終係電視劇，而且又唔係好多人識得手語，追得字幕嚟又睇唔到手語，所以最後只用好簡單嘅手語。家真係有人問我啲手語係咪真㗎，手語又點可能係假？聾啞人士都會睇電視，大家都知道我做緊乜，所以一定要準確，唔可以錯，仲要好純熟。」
繼續向前行
在過去的10年，定欣努力為演藝事業打好根基，從一些性格模糊的角色，慢慢變得形象鮮明，她說：「以前可以話做戲經驗唔夠成熟，家對做戲多咗啲唔同嘅感覺，拿捏角色嘅睇法又會唔同，呢啲都係以前累積嘅經驗，人係要不斷向前行，要比以前更好先叫做有進步，當然，我好開心有觀眾話我可塑性好高，好多變化，呢啲感覺真係要有人留意先會感覺到。」
朝女一進發
踏入新一個10年，定欣亦早己定下目標：「我希望可以有一套屬於自己主演嘅劇集，我唔係話唔想做配角，我覺得只要角色啱，唔使分主角定配角，不過有時我會覺得做到呢個 moment，再睇埋觀眾畀你嘅評語，都好似話緊畀我知，應該嘗試吓做女一（第一女主角），我覺得係咪有機會嘗試呢？希望將來公司畀呢個機會我去試，我對自己有信心，會向住呢個方向走，希望自己可以勝任，當然藝人係好被動，好多嘢都要一步一步嚟，但係我已經 ready，只係爭呢個機會。」
感情篇：姣精唔會做剩女
一直以來，胡定欣對感情事都低調處理，直到近期她被封為姣精，而且更有七個男人，頓時令大家再度揣測她的感情生活，她笑說：「其實入行初期都試過俾人改過呢個名，大家都識我咁多年，或者身邊嘅同事對我都有一定認識，所以再出呢啲新聞，都唔覺得好緊張，或者驚俾人再誤會，識得我嘅人都知道我唔係呢類人，佢哋反而覺得我粗魯少啲、講嘢好聽啲，都已經好多謝。」
胡定欣對戀情十分保護，聲言要結婚才會公開情事。
胡定欣與吳浩康甩拖後，曾與吳當時的女友莊思敏爆發駡戰。
與馬國明的緋聞傳了多年，但定欣依然不肯公開承認。
緋聞當笑話
所以現時定欣聽到這些新聞，只會一笑置之，她說：「都冇人打畀我問我有冇唔開心，因為大家都睇到慣咗，我仲講笑話呢啲茶餘飯後嘅話題，咪當係多一碟餸囉。呢樣可能係做藝人嘅 package，如果你完全冇嘢講，觀眾又唔會講你，又似乎唔可以喎，所以只要唔係太過份，咪由得人哋講。」
對於最近又傳定欣與馬國明復合，她笑說：「大家都係關心番我嘅事業，無論我嘅感情係乜嘢狀況，我都覺得唔需要好詳盡同大家交代，我唔想呢樣嘢 cover咗我嘅工作，亦唔想成為人哋評論嘅話題，就算係乜嘢狀況都好，都好想好好咁去保護，始終呢啲係私事，任何評論都會影響對方，所以不如唔好講。」
結婚必公佈
問到定欣是否受身邊離合太多影響？她說：「都會㗎，有時見到藝人嘅感情受到評論，都會幾影響，我自己都曾經公開過，我覺得私人事留番私人處埋，自己知道就得，直到我結婚嗰日先向大家宣佈，咁咪仲戥我開心，總之唔擔心我會做剩女。」
Orignal From: 有話兒：胡定欣打動觀眾心
沒有留言:
發佈留言