林峯自從被潘霜霜玩完一鑊甘後，似乎真係大傷元氣，近期都無乜特別消息吸引到大家耳朵及眼球。唯有專心事業的阿峯，近日忙於為新劇《雷霆掃毒》趕戲，日前該劇在南生圍拍攝大結局，戲中飾演火爆差人的他，貫徹Chok樣行先，演技排次的準則開工，於是NG頻頻，最後令圍觀的村民，都唔耐煩走人。
林峯去年這個時間，正藉流出他跟36D性感內地模特兒潘霜霜的牀上照，事隔一年，當時眼濕濕回應事件的阿峯，雖然情傷極重，但話晒仲後生，心情早已回復過來，不過受這個極有爆炸性的話題影響，其他消息都變得唔再吸引。
為了重奪觀眾的注意力，最好方法莫過於在工作上爭取好表現，最近他除了錄製全新專輯外，還要兼新劇《雷霆掃毒》的拍攝工作。不過卻有報道指他拍該劇時，連環失場遲到令三哥苗僑偉躁爆：「佢嘅嘢唔好問我」，兩人傳出不和。
同戲演員等慣唔怕悶
雖傳不和，但身為「Chok王」的阿峯，貫徹少爺仔作風一於好少理，無論幾趕時間靚樣都一定唔可以失色，日前他為該劇的結局大場面拍攝。當日劇組租了南生圍一間士多，劇情講述身為警方線人的徐子珊被綁架，傷腳的差人阿峯要勇救佳人。點知阿峯一到場，不是攞住枝槍試住，反而係攞住樽噴髮膠，不停噴扮靚靚，雖然同本身爛身爛世的造型唔多夾，但峯哥一於好少理。
搞完一輪正式埋位，阿峯唔知係咪唔多慣，自己個靚樣未係最佳狀態，竟然頻頻NG，搞到一班原本一心來睇好戲的圍村村民大失所望，見拍來拍去都是同一個鏡頭，終於等得唔耐煩罷睇走人。反而其他演員好似三哥苗僑偉、徐子珊同官恩娜等，同「Chok王」合作得耐，都知道會有這種情況，早已識得各自搵方法解悶。
阿峯最終肯唔Chok，破口大叫，雖然浪費咗靚樣，但咁樣演戲先自然嘛！
阿峯呢個咁瀟灑的跛腳神探Look，啲少女Fans見到，相信一定尖叫死！
阿峯唔知係咪驚畀人整花塊面，親自出手攞住枝槍度位！
林峯在南生圍一間士多進行拍攝。
Chok峯掛住整個頭，都唔肯埋位。
徐子珊最醒，知道大佬有排玩，梗係搵工作人員吹水解悶！
等極都未有得埋位的官恩娜，搞到無晒精神，就快瞓着咁款！
既然Chok峯有排拍，得閒無聊的三哥，唯有揸住枝道具槍打電話吹水打發時間啦！
Orignal From: 《雷霆掃毒》大結局拍攝（林峯、苗僑偉、徐子珊、官恩娜）
沒有留言:
發佈留言