誰會愛倒退人生，人人都愛向上爬，「亞視一姐」陳煒自 08年嫁給台灣商人顏志行，婚後半退出幕前，兩夫妻移居泰國，她專心做煮飯婆，今年初才回流香港。戲癮大發的陳煒密謀復出，正值無綫花旦陸續離巢北上賺人仔，陳煒今年 2月簽了無綫部頭合約，過檔做花旦。合約生效，她即時獲派演重頭劇《金枝慾孽（貳）》，戲份不多正好當熱身。
陳煒今年初簽約無綫，馬上獲派演重頭劇《金枝慾孽（貳）》，同鄧萃雯和蔡少芬鬥演技。 資料圖片
加入無綫償宿願
38歲陳煒決定再戰幕前，重新執靚自己入無綫爭做視后。 攝影：陳志嵐
96年陳煒摘下亞姐冠軍后冠後，便死忠效力亞視，雖然娘家也當她如珠如寶，不停給予機會，但畢竟身處慣性收視低的弱台，就算多努力都白費心機，陳煒深明箇中因由，她靦腆說：「我以前心願係入無綫㗎！」等了多年，終如願以償，對於演藝事業有望進入新階段，她滿懷憧憬。
難忘首日返無綫開工，陳煒如同進入大觀園，她自爆瘀事：「最初開工入到嚟迷路，要記者朋友指引。」面對新環境卻不陌生，陳煒遇見不少亞視舊同事，她說：「我成日喺化妝間撞到黃智賢同江美儀，佢哋都好關照我。無綫呢個平台好大，製作好完善，導演監製通通好有效率，因為無綫多劇開，一開劇化妝間就好熱鬧。」
野心大做場好戲
無綫近年鬧花旦荒，旗下三、四線的姐仔爭崩頭博上位，外援幫又加入混戰，陳煒日前信心爆棚指要爭視后，殺氣之大易惹是非，她直率說：「邊個唔想攞視后，不過我知道唔係家，我啱啱先加入，我需要時間。無可厚非，呢段時間啱晒 timing，但我過去時係冇預計過。」新嚟新豬肉，陳煒堅持晒實力，當實至名歸的視后，她說：「我會做好自己嘢，唔好咁多事，係又好，唔係又好，做人要守本份，多做事，少說話。」
陳煒續說：「我入去前都有隱憂，好多疑慮，我會放下身段，畀自己由頭開始，好似『小學雞』咁。入去一個新機構，我會當自己係新人，唔會企硬要做女主角，我只係想爭取有發揮嘅角色，過吓戲癮，做啲好戲畀觀眾睇，乜嘢角色，戲份幾多都唔會斤斤計較。」換句話說，孭飛固然好，但必定不可做二打六。
亞姐出身的陳煒，出道便効力娘家，及至 08年出嫁才離巢。 資料圖片
胡定欣（右）和黃智雯被陳煒視為勁敵，有望上位爭當家花旦之位。 資料圖片
下戰書誓殺花旦
陳煒並公然向無綫所有女藝人下戰書，視她們全是競爭對手，她說：「我家嘅位置似人哋開跑，我跑跑吓返去起點再重新出發，我叫自己一定要加油，跑番快啲急起直追。」陳煒大讚胡定欣和黃智雯充滿威脅性，她說：「胡定欣能歌擅舞，黃智雯之前喺《缺宅男女》嘅巴辣大肚婆演得入肉，抵死又刻薄。面對佢哋冇得怕，大家年齡層唔一樣，做得藝人就要有信心自己都有吸引力，我希望有機會同佢哋合作擦吓火花。」亞視另一花旦萬綺雯近日已低調簽約無綫，下月便加入，陳煒不擔心成比較對象，她說：「要比喺亞視都比咗，唔使等到家。」服裝、場地： IPOSH
無飯夫妻靠互信
陳煒和台灣商人老公顏志行結婚四年，非常恩愛，她過去幾年嫁雞隨雞，隨老公到泰國搞生意兼定居，期間全職煮飯婆貼身照顧夫婿，直至近日她才回流復出。陳煒近日投入無綫拍劇拍攝工作，作息時間不定，一心不能幾用的她表示夫妻這段日子將變無飯夫婦。
陳煒宣佈復出後，與老公顏志行變無飯夫妻。 資料圖片
陳煒無論樣貌和身材都甚弗，難怪休息幾年後便心野復出。
「要變冇得挽救」
陳煒直言：「我自問兼顧唔到咁多嘢，我每次只可專心做一樣嘢，好彩老公都好多應酬，佢又要周圍飛，唔係成日喺香港，嚟緊我哋會少咗家庭生活。老公好支持我復出，佢畀我好大自由度。」可擔心老公少了家庭溫暖，影響彼此關係？陳煒信心十足說：「我覺得婚姻要用信念維繫，大家已認定對方，一旦要變都冇得挽救，點箍都冇用。」陳煒慶幸科技發達，老公不在身邊時，大家也可以視訊談情。
近年不少花旦一窩蜂去生 B，陳煒卻無懼做高齡產婦，當決定復出後，她預計未來兩年都會以演藝事業為重，陳煒說：「我哋從來冇生 B計劃，邊日老公話想要，我咪配合佢，佢太忙啦，睇佢 timetable，但唔知我到時仲生唔生得出㗎！」
拿手花膠湯養顏
婚後由顏師奶重返幕前的陳煒，去年下定決心加入無綫出擊拍劇，現年 38歲的她即把自己進行 chok變，年初大膽在臉上打了 15針除皺，務求以最佳狀態示人。貪靚的她打針打上癮，更自爆近日試打美白針，拒做黃面婆。
陳煒除了注重美容外，美好身段也是賣點。 資料圖片
陳煒早前貪靚在臉上狂打去皺針。
「女人唔補好易老」
陳煒除注重後天加工扮靚，她也非常重視食療，拍照當天，陳煒坐的士到來，因沒零錢要中途下車跑入海味店買了大包花膠，她說：「我平日如非必要唔食街外嘢，女人唔補好易老，我幾唔得閒都會煲啖靚湯，煲花膠湯簡單又好味。」
Orignal From: 有話兒：陳煒小學雞爆Seed挑機
沒有留言:
發佈留言