2011年11月30日星期三

壹週刊版《萬千星輝頒獎典禮2011》得獎名單

壹週刊第1134期

名單預告

台慶內定　嘉穎杏兒封帝后　黃智賢江美儀做阿二

2011年12月01日

一如過往，無綫台慶頒獎禮視帝視后獎項爭崩頭，據可靠消息透露，賽果已塵埃落定，係威係勢的「Laughing Sir」謝天華，始終唔夠「流氓律師Law霸」鄭嘉穎撼，失落視帝，只執番個我最喜愛男角色獎補數，而胡杏兒亦踢走陳法拉，得逞做視后。

鄭嘉穎近日觀眾投票急升，力壓謝天華，難怪台慶夜當晚亮相時，特別風騷。

天華轉口風

十二月五日舉行的無綫《萬千星輝頒獎禮》，各大獎項幾乎都是《潛行狙擊》和《怒火街頭》之爭，尤其視帝一獎，鄭嘉穎和謝天華各自發功。

據消息指，在最近的高層會議上，《怒火》派力壓《潛行》派，如無意外，剛續約無綫的鄭嘉穎會撼低謝天華奪視帝。「幕後同高層都撐嘉穎攞獎，覺得佢今次演出有突破，至於天華雖然只分到個豬肉獎，但公司覺得一而再開戲俾佢孭飛，佢應該唔會詐型嘅。」一名無綫人說。

事實上，謝天華也收到風今年撻Q，所以最近已轉口風，話有獎攞都好滿足。搞掂視帝，至於胡杏兒、陳法拉之爭的視后，戰況同樣一面倒，恨坐正的「潛行Madam Jo」始終不敵奸王后胡杏兒，只分到我最喜愛電視女角色。

胡杏兒以奸角上位，近日趕拍《怒火2》，fans專程送蛋糕為她打氣。

嘉穎連日趕拍《怒火2》，動作戲全程親身上陣，搏到盡，連底褲都露埋亦冇所謂。

辣薑贏配角

此外，最佳男配角和女配角，則分別落在《潛行》中飾演辣薑的黃智賢和江美儀身上，飛躍進步男女演員則是林子善、馬賽和樂瞳之爭；除了視后，所有賽果幾乎由《潛行》和《怒火》兩劇瓜分。

初次有份入圍的黃智賢，捱足二十二年，終於發圍，亦正亦邪的辣薑一角亦得到觀眾和網友力撐。「佢係無綫親生仔，樂小姐嗰邊會肉緊啲，加上fans票和幕後人員的票，都係佢贏晒。」知情者說。

入行捱足22年的黃智賢，終於吐氣揚眉，首次贏男配角獎。

「最佳女配角」江美儀和未來視帝視后預早慶祝攞獎。

無綫幫拖搵贊助

上週日（十一月二十七日），無綫經理人部門安排黃智賢到尖沙咀和荃灣的珠寶店，試戴過百萬鑽飾。做慣老實人的他，對破格做奸角而被觀眾接受感到十分滿足。「今次做辣薑落咗好多功夫，死嗰場戲啲對白都重新度過，個角色好立體，但最開心，係睇到松哥（劉松仁）喺微博公開讚我做得好。」

擺埋兩年的倉底劇《天與地》最近出街，戲中飾演佘詩曼老公的黃智賢戲份雖只得一集半集，但一樣被網友大讚。「其實我係因為呢個角色先接呢齣戲，我啲戲集中喺第一集，戲好少，但好出，我拍得好開心。」