非常劇集
保怡撞車死 陳豪俾佘捅 爆《天與地》破格結局
2011年11月30日
無綫新劇《天與地》因題材敏感及血腥被無綫高層河蟹，冇份入選今年最佳劇集，更被安排在炮灰檔播映。編審周旭明喺微博開火，怨《天與地》成為無綫高層鬥爭犧牲品。高層唔識貨，不過唔少網友封《天》劇為cult劇，劇中場景情節，幾乎日日洗版。
頭5集已經咁爆，原來結局都cult過人，除Ronnie（黃德斌飾）變盲仔、黑仔（陳豪飾）會被阿佘插一刀、鼓佬（林保怡飾）被車撞死外，最爆係結局將出現一段5分鐘MV，類似《那些年》一樣，採用平衡時空手法，假設家明冇死，同佘詩曼繼續拍拖，食人3兄弟亦變番做好人。《天》劇兩年前拍落，唔好再話無記抄人喇！
阿佘怒插陳豪
梓恩（佘詩曼飾）及後發現家明被三人所吃，但三人卻否認，最後四人相聚中，黑仔（陳豪飾）終承認食咗家明，梓恩一怒之下一刀插黑仔，不過黑仔冇死，之後更轉性做番好人。
下週一（5日）台慶頒獎禮，最佳劇集離不開《潛行狙擊》及《萬凰之王》，不過網民最近熱烈討論的並不是以上兩套劇，而係被無綫當係草的《天與地》。網民讚《天》劇唔當觀眾白癡，拍攝手法又創新，不同於一般師奶劇。
鼓佬（林保怡飾）之後會同Brenda（金燕玲飾）發展忘年戀，Brenda更因撞車而死，而保怡最後亦為救人而被車撞死。
保怡救人車死
戀上金燕玲
編審谷到爆
《天與地》題材破格，令無綫一眾高層唔敢力谷，封倉兩年，令到金牌編審周旭明都忍唔住於微博發火鬧爆無綫。「因為公司的政治鬥爭，兩年了，劇集還是無理地被某些高層擱置……。」編審着晒火，但監製戚其義就相對平靜，上週六（26日）出席宣傳時話：「我諗旭明因為套劇出，所以心情激動咗啫，大家唔好亂諗喇，我要講嘅兩年前已經講咗，家套劇終於出街啦！」
監製戚其義
周旭明最近喺微博向無綫開火，鬧高層鬥爭連累《天》劇變倉底貨。
編審周旭明
德斌踎監
Ronnie（黃德斌飾）因被喚醒食人記憶，接受不到現實，除咗變盲，佢仲認罪踎監。
查食人案
4人原本關係轉好，但之後因為飾警察嘅鄭子誠（小圖）發現家明唔係凍死，而係被三人食咗，令4人關係變差。
叫好居多
《天與地》有金牌監製戚其義和編審周旭明坐鎮。《金枝慾孽》、《珠光寶氣》和《創世紀》等長劇就係出自佢哋手筆。不過二人鍾意玩創新，多數贏口碑輸收視，更有唔少師奶唔識睇《天》劇，不過監製就話：「唔好話我哋趕走師奶呀，今次係拍攝手法唔同啲啫，嚟緊我套《4 in love》愛情故仔，好易明！」
平均收視
'04《金枝慾孽》32.5
'06《火舞黄沙》32.3
'08《珠光寶氣》29.6
'10《飛女正傳》32.2
04年《金》劇結局平均收視40點，剛播完嘅《法證》亦係40點，師奶劇係好收視啲嘅！
熱追9幕
《天與地》播映1星期收視唔算高，不過網民就力撐，只要該場戲拍得唔師奶，網民即刻cap圖力谷，其中以第一集阿佘於雨中透過幻想見回已死去的家明討論得最多，仲有以第二集林保怡剁肉餅，2分幾鐘冇對白，亦令《天》劇成為「cult」劇。不過監製就話：「其實我都係試吓其他方法拍啫，冇乜特別！」咁謙呀！
徐榮除褲
第一集演阿佘情夫嘅徐榮，近乎全裸出鏡，原來當日徐榮着咗條肉色三角褲，阿佘就着肚兜上陣，第一場戲已經同平時睇開嘅師奶劇唔同。
走景收音
第一集講阿佘去收集海豚音嗰場戲，原來去咗好多地方取景，先去鹿頸，再去烏蛟騰，之後再去大帽山。用咗幾晚通宵拍，好認真！
重回那些年
第一集最cult一幕，阿佘幻想重遇家明。該場戲用咗好多好細緻嘅情節及道具，話畀觀眾知阿佘回到重前，包括地鐵嘅logo，女皇頭一蚊銀，橙色電話亭等！
結局似 MV
難得無綫唔播師奶劇，可惜《天》劇由於失去一班師奶觀眾，首週收視平均26點，最高30點，玩cult都算有交代。最cult一幕要數第二集林保怡2分幾鐘冇對白剁肉餅，連保怡都話：「我好欣賞公司肯嘗試呢種拍攝手法，其實觀眾會明㗎！」
保怡剁肉
第二集第一場戲幾乎3分鐘冇對白，只係見到林保怡點樣整肉餅，王家衞feel嘅拍攝手法。好多師奶話悶到轉台，不過後生仔個個like！
據知結局會好似《那些年》結局一幕，平衡時空方式拍攝。假設家明冇死會改寫一切，食人3兄弟變好人，家明與阿佘繼續拍拖。該場戲將以一個MV模式拍攝，更一共拍了38場戲。咁破格，真係無綫第一次，不過監製就話：「我未睇《那些年》呀，不過我哋都係講一啲大家對過去嘅情懷啫！」
威吔MJ
陳豪，邵美琪喺8號風球談情，兩個好似MJ上身晒。原來該場戲喺鯉景灣拍，要等餐廳收鋪先可以拍。陳豪同邵美琪各被拉住威吔，再利用風扇及水車營造颱風效果。當日拍到深夜鄰居更報警，陳豪同邵美琪要同街坊講sorry！
冰雪廠景
劇集重頭戲雪山食人，全程喺廠拍攝，除咗後期加工之外，據知當日亦安排了大量食鹽營造大風雪效果。
陳豪紋身
陳豪為演好黑仔呢個角色要減50磅，再爆肌，背脊嘅十字架紋身仲係監製加上去，佢話：「因為想佢有好重罪疚感，所以加呢個紋身畀佢！」
實景拍攝
《天與地》一反TVB慳皮廠景弊病，實景拍攝場口較多，更以灣仔服務式住宅為陳豪屋企，第5集結婚場口亦去到機場富豪酒店Ballroom拍攝，認真好多。
Babyin Car
第5集Gina（陳芷菁飾）發現老公（林保怡飾）本地圖，除咗有mark低已前拍過拖嘅地方，仲有張「Baby in Car」貼紙。網民都想知究竟佢兩個係咪有過BB，保怡上週六（26日）出席活動就話：「原本打算有，但之後冇！」
家明係主持
幾位一線小生花旦當然搶，不過被三兄弟食咗嘅家明（張景淳）亦開始彈起。今年30歲嘅佢，03年以歌唱組合Cheers出道，07年透過TVpeople入行，入行後做過TVB8及東張西望主持，2年前被監製戚其義中。家明說：「面試嗰陣有叫我唱歌，我本身對結他、bass同鼓有啲認識。好記得第一次拍外景就係對住阿佘，真係好驚，但佢好nice，叫我放鬆啲！」無綫好戲花旦小生買少見少，係時候發掘優質新人喇！
上週六（26日）《天》劇宣傳，飾演家明嘅張景淳，同少年版阿佘嘅蔣家旻都有現身，監製戚其義話揀張景淳因為佢有音樂感，而蔣家旻就因為佢個樣後生，又做慣主角童年。
張景淳除識唱歌，亦鍾意打籃球，上週五（25日）同埋一班藝員朋友到尖沙咀打籃球，30歲嘅佢仲有少年味道，唔怪得戚監製睇中佢啦。
嫩版家明與阿Yan彈出
30歲張景淳03年以組合Cheers出道，出過一隻EP《十年約會》，之後因合約問題返加拿大，07年透過Tvbeople入無綫，08年仲簽埋經理人合約。
22歲蔣家旻同張景淳一齊由Tvbeople入行，蔣家旻拍劇冇停手，先有《造王者》，最近拍《護花危情》，下年再去橫店拍《大太監》。
結局平衡時空
結局採用平衡時空拍攝，少年保怡同少年芷菁嘅骨肉得以重生，其餘3人亦因為家明冇死變回好人。
捧起新血
TVB成日被人話冇「人」，來來去去嗰幾個花旦小生。不過今次《天》劇戚監製起用咗幾位TVB 80後演員，演幾位主角少年版。雖然幾位未至於一望就叫得出名，但勝在劇接劇，慢慢上。
羅鈞滿 27歲
除咗《點解阿sir係阿sir》嘅K4之外，今次喺《天與地》做少年林保怡亦搶鏡，現忙拍《結．分謊情式》，之後再《護花危情》。
梁証嘉 23歲
第20期訓練班，現忙拍《造王者》，之後開《名媛望族》。
楊潮凱 26歲
第23期訓練班，城大創意媒體系畢業，現忙拍《造王者》，之後開《護花危情》。
Orignal From: 保怡撞車死 陳豪俾佘捅 爆《天與地》破格結局
沒有留言:
發佈留言