淚眼肥妹飛唔起 楊秀惠爭配角獎

淚眼肥妹飛唔起
楊秀惠爛面爭配角獎

【萬千星輝頒獎典禮 2011】無綫萬千星輝頒獎禮已進入倒數階段，每個獎項都競爭激烈，楊秀惠憑《仁心解碼》扮演肥妹孫家碧首度入圍最佳女配角，一向予人感覺喜歡賣弄風情、只顧拍拖的她，揚言今次要好好博一鋪，望能以半冷姿態奪獎。日前秀惠到中環試台慶晚裝，懶理閒言繼續酥胸半露，她一臉自信說：「網友話我升級做偶像實力派，攞唔到獎都當自己贏咗！」

已有幾年在萬千星輝頒獎禮沒任何提名的楊秀惠，今次憑《仁心解碼》獲提名最佳女配角，她直言感意外：「部劇 09年拍完之後賣埠去馬來西亞，到今年先攞番出嚟播，雖然係遲咗，但估唔到年初播仲有人記得。」

楊秀惠擁有 34C豐滿上圍，台慶頒獎禮當晚亦不會吝嗇身材，將最美一面表露人前。

胡杏兒 06年拍《肥田囍事》極速增肥 40磅，雖未有得獎，但專業精神令人敬佩。劇照



秀惠能升呢提名最佳女配角，笑言攞不到獎都當自己贏了。

升做偶像實力派

在《仁心解碼》中秀惠雖不用增肥，但每次要花幾小時化妝、落妝，令她身心俱疲。劇照

秀惠坦言原以為只獲提名飛躍進步女藝人，如今可以升呢提名女配角，她興奮地說：「可能年紀大咗，飛唔起，但家有得提名女配角仲開心，有好多網友話我升級做『偶像實力派』，能夠入圍亦證明我嘅努力冇白費，雖然唔會抱住必勝之心，但入圍已經當自己贏咗。」雖然對奪獎沒百分百把握，但秀惠仍不敢怠慢，日前到中環一間婚紗店揀選台慶晚裝，她表示不介意健康性感，揀選了一條象牙白色拖尾晚裝和一條銀灰色超低胸晚裝，盡騷 34C豐滿上圍。



秀惠（左）在《讀心神探》的一場喊戲，獲男友媽咪激讚，讓她重拾信心。劇照

現年 27歲的楊秀惠在 04年參加華裔小姐晉身娛樂圈，由當初的黃毛丫頭，到現在全身散發熟女味，每次登場都會讓人有驚艷的感覺。不過，美麗外表卻往往掩蓋背後的苦功，秀惠直言有段時間好迷失：「我係個好悲觀嘅人，有諗過點解自己不停做，但焦點總係落喺其他嘢上，例如今日着得幾低胸，仲有好多花邊緋聞，令自己心灰意冷，擔心係咪有人真係睇到我演技？好彩男友媽咪有次畀咗我好大鼓勵，佢話睇到我演《讀心神探》一幕喊戲，佢話『你係識得做戲嘅演員，有啲天份，畀心機繼續演。』呢番話令我好感動，扶咗我一把。家諗通咗，知道無論幾有實力嘅演員，都應該畀最靚一面人哋睇，唔係觀眾點會留意你？」

拍《仁心》情緒差

 

胡杏兒 06年拍《肥田囍事》極速增肥 40磅，雖未有得獎，但專業精神令人敬佩，而秀惠今次在《仁心解碼》演的肥妹孫家碧，雖然不用增肥，但每日要花四、五小時化妝和兩小時落妝，亦令她心情變得低落，要搵心理醫生求助，她解釋：「因為化妝用嘅膠水會令皮膚敏感，令我每次未入化妝間已經想縮沙唔拍，好辛苦捱完全日，每次落妝又要三個化妝師慢慢搣啲假皮落嚟，真係到想用手爛佢。」慶幸最艱苦的日子已經捱過，她直言好值得：「拍攝期間珍姐（製作部總監曾勵珍）嚟探班，佢見到我嘅演出後話我做得好好，好鍾意我嘅表現，聽到珍姐讚我，開心到飛起。」
採訪：林妃、何慧斯
攝影：葉君海
服裝及場地： ANAISS

---

Orignal From: 淚眼肥妹飛唔起 楊秀惠爭配角獎