無綫金牌監製離巢 劉家豪、梅小青引佘過now

之前有傳無綫金牌監製劉家豪、梅小青被王維基高薪挖角去佢嘅新免費電視台，但據馮仁昭收到嘅可靠消息，家豪哥同小青姐月前已經向無綫辭職，出年三、四月正式過檔 now，做新開設嘅戲劇組話事人，之後佢哋會即刻大展拳腳招兵買馬搵幕後人才，而嚟緊 now會主力同內地電視台包括湖南電視台合作拍劇，家豪哥同小青姐仲諗住搵番佘詩曼、黎耀祥呢啲班底合作。

梅小青愛將佘詩曼曾經喺韓國攞香港區人氣明星獎。　資料圖片

陳志雲挽留不果

劉家豪、梅小青夫妻同心，一齊離開無綫外闖。　資料圖片

家豪哥同小青姐喺無綫監製過唔少高收視嘅劇集，包括《溏心風暴》系列、《宮心計》同《法證先鋒》系列等，套套都係收視保證，亦喺台慶攞過唔少獎，聽聞無綫已經出動到總經理陳志雲親自挽留佢兩個，但最後都係無功而還，敵唔過 now嘅高薪同做戲劇組揸 fit人嘅吸引力。

對於過檔 now嘅消息，家豪哥冇正面否認，佢話啱啱至幫無綫開新劇《護花危情》，私人嘢唔講得住，到咗適當嘅時候至講，而剛剛拍完《當旺爸爸》、正做緊後期工作嘅小青姐，聽到馮仁昭話肯定佢過檔，就笑笑口話想唔講住，都係想喺適當嘅時候至講，咁其實答案都已經呼之欲出啦！

---

Orignal From: 無綫金牌監製離巢 劉家豪、梅小青引佘過now