好多傳聞話拍劇換獎、簽約換獎，照我所知係冇呢樣嘢，呢啲只係外面嘅人想增加頒獎禮嘅趣味性，祥仔、雯女佢哋都唔係攞咗獎之後就簽ＴＶＢ啦，結果第二年都係畀佢哋架！第一年你唔簽ＴＶＢ，第二年你仲畀？證明咗係冇換獎呢樣嘢。可能大家會覺得頒獎禮係一個娛樂性嘅遊戲，我就覺得結果都係睇民意嘅，唔可能夾硬畀獎，對嗰個人亦未必係好事呀，所以我覺得都係順應民意。
自成功演繹「Law霸」一角後，嘉穎亦不知不覺地變得如角色般幽默風趣。
鄭嘉穎在《怒火街頭》中一洗斯文形象，演出備受讚賞。
06年彈出：我冇得揀
如果真係有換獎呢樣嘢，我唔會接受，因為個獎已經冇咗價值，點解我會想攞個獎呢？都係想得到觀眾認同，如果我搵第二樣嘢嚟換呢個獎，我都得唔到人認同啦。我都攞過架啦，我唔係為咗嗰舊嘢（指獎座），係為咗個獎嘅代表性，等於觀眾對我嘅認同，我續約同你換（獎），咪又係冇咗個認同？我唔要換獎，我要你真係畀我！如果真係屬於我，希望你畀我，如果唔屬於我就唔屬於我啦。
事實上06年憑《天幕下的戀人》攞「視帝」係認受性唔夠嘅，但無奈好多嘢我冇得揀，如果嗰次唔係憑一套愛情劇《天幕下的戀人》攞獎，舉個例係之後嘅《與敵同行》，可能啲人嘅聲音又唔會咁大。好老實講《天幕下的戀人》沈朗呢個角色唔係難演，佢嘅難度真係唔高。以觀眾嘅角度去睇，個角色都唔難演嘅，點架？求其畀架？我好明白觀眾嘅心態，但係當年真係冇乜邊部劇或者係邊個角色係特別彈出，形勢唔似今年。公司畀你係咪可以話唔攞呢？唔得架嘛，嗰年就係咁嘅情況下得獎。有邊個唔想得到大家嘅認同呢？唔係做演員咁辛苦為乜！
同行看好：非常開心
今年嘅情況唔同，之前公司記者會公布今年台慶頒獎禮嘅候選名單，小弟喺同事之間嘅「視帝」投票率最高，令我好開心！因為同行都係演戲嘅，所以知道演繹角色嘅難度有幾高，有咩角色難做，有咩角色易做，知道你係咪做得好……所以得到同行認同非常開心，亦非常難得！對我係好大嘅鼓勵，信心愈嚟愈大。信心唔係自己畀自己，係人哋畀我嘅！由網上投票開始票數最多，去到喺街上觀眾嘅支持、畀我嘅反應……有好多人同我講「今年你應該攞」……信心係一路累積返嚟，如果我冇信心，又點對得住支持我嘅人？
你問我點睇謝天華，我知《潛行狙擊》收視口碑都好，但播出嘅時候我唔喺香港，冇親眼睇過，所以畀唔到自己意見。大家做演員好明白大家嘅心態，亦好明白天華好想攞（視帝），雖然立場唔同，希望大家一齊努力啦！
Profile
身高：1米78
生日：1969年8月15日
簡歷：16歲參加《新秀歌唱大賽》後赴海外升學，及至93年才回港出碟，惟因與經理人戴思聰意見不合而流放台灣，一直星途浮沉。其後獲無綫賞識簽約為「親生仔」，擔正多套劇集，06年終憑《天幕下的戀人》初封視帝，今年《怒火街頭》中「Law霸」一角再度爭視帝。
口述：鄭嘉穎
筆錄：影視組
攝影：吳文聰
場地：Hair Corner
服裝：Beauty & Youth United Arrows
執四攤？多謝晒！
拍到《怒火街頭》要好多謝唐基明（無綫前監製），雖然我唔係佢第一選擇，仲要係第四選擇，但係最後佢都選擇咗我，角色唔係寫畀我，收到劇本已經有7、8集，係其他人啲期唔得，但係我唔介意。我好感激佢，呢個唔係問題，最後機會喺我手上，過程唔重要，好多謝佢肯畀我呢個結果、機會。反而好感激呢套劇唔係為我而寫，為我而寫未必可以寫到咁激，好多謝冇就住嚟寫，先至有Law霸嘅「誕生」。
「勁敵」有嘢講
今年視帝之爭愈趨熱烈，鄭嘉穎、謝天華和黎耀祥成三國鼎立之勢，作為「勁敵」，謝天華和黎耀祥又如何評價嘉穎的得獎機會？
黎耀祥
黎耀祥：「我睇好鄭嘉穎o架，佢係一個好好嘅對手，外間對佢嘅評價亦都好好。我自己都已經攞過兩年喇，今年嘅壓力就冇咁大。」
謝天華
謝天華：「印象中無同鄭嘉穎合作過，不過早前同佢去加拿大登台，同佢相處得最耐，大家好多嘢講，乜都講得。佢今年成績好好，喺香港《怒火街頭》好受歡迎，內地又有部《步步驚心》好勁。佢有咁好成績應得嘅！佢喺《怒》劇入面露股我都有睇，係『優質股』。」
台慶爭獎事件簿
每年視帝視后寶座競爭激烈，除了賽前一輪口水戰外，賽後亦因「有人歡喜有人愁」而屢爆是非罵戰，可謂鑊鑊新鮮鑊鑊甘！
陳豪 Vs 夏雨
07年，陳豪、夏雨憑《溏心風暴》雙雙提名「最佳男主角」及「我最喜愛的電視男角色」，豈料陳豪獨攬兩獎，加上夏雨專誠着妻兒返港等捧獎，有指他因而怒極缺席慶功宴。
郭可盈 Vs 張可頤
張可頤03年憑《九五至尊》開齋封后，但其後接受訪問時卻寸勁敵郭可盈欠缺代表作，又在佘詩曼說話時嘴藐藐，因而在慶功宴被杯葛，慘變「獨孤精」。
胡杏兒 Vs 佘詩曼
胡杏兒06年為《肥田囍事》增肥40磅，雖然同時提名「最佳女主角」及「我最喜愛的電視女角色」，但最終佘詩曼憑《鳳凰四重奏》起孖，有傳杏兒因而向無綫詐型。
Orignal From: 鄭嘉穎：我唔接受換獎
沒有留言:
發佈留言