2011年11月29日星期二

楊千嬅丁子高造人成功　楊千嬅終於懷孕

龍 B來了

急換大肚裙　試齊「體位」擊中　楊千嬅終於有咗

2011年11月30日

楊千嬅自 09年同丁子高拉埋後，一直恨做母親，狂食補藥兼做運動之餘，早前更有傳捉老公去驗精，實行做足功課催促小生命。

一輪密集攻勢後，據知 37歲千嬅終於造人成功，上週千嬅在 Star Hall開演唱會，除突然翻脹外，更在開騷前一星期急換大肚衫，台上件件鬆身孕婦 look。為養胎，千嬅實行停出埠兼推戲，養肥自己等生龍 B。

千嬅有心有力，恭喜晒呀！

Tomas Chan設計：楊千嬅於開騷前5天，才將原先整批歌衫更換，疑似大肚的千嬅於演唱會中更經常赤腳上陣，大咗肚着高踭鞋唔方便嘛！

丁子高早前自爆正研究授孕體位，準備同千嬅生個龍仔龍女，估唔到咁快就擊中。其實開騷前，一班歌迷已經在網上討論，覺得千嬅綵排時有異樣，千嬅在做騷期間又似足孕婦不時拍打背脊和伸懶腰，未見肚先做定熱身。

推戲停飛

千嬅密友透露︰「以往千嬅開騷，每日都起碼做三個鐘運動，今次係減少咗，佢話老公唔畀喎，而且每日要瞓足九粒鐘。」

千嬅上週四起一連五場《 Minor Classics Concert》大唱 side-cut歌，雖然唔係紅館大騷，但千嬅都好緊張，又喺台上話︰「搞埋呢個騷就真係無憾，係完成咗我事業嘅一個階段，下次唔知幾時再開騷。」臨近年尾，歌手例牌忙住四圍飛吸金搵錢，反而千嬅猛推 job，要出埠更加免問。千嬅密友續說︰「 11月頭台灣有個首飾活動，千嬅好早前已經接咗，而且佢又係代言人，先唔飛唔得。」據知本來曾志偉為邵氏開拍賀歲片《我愛香港 2》（暫名），點名找千嬅做女主角，但結果都推咗，益咗同公司嘅何韻詩攝位。

跑步操 fit
老公丁子高向來愛運動，嫁入丁家後楊千嬅亦經常跟老公一齊跑步， keep fit身體等生 B。

推賀歲片
盛傳懷孕的楊千嬅，最近已推掉曾志偉監製的賀歲片《我愛香港 2》（暫名），並改由何韻詩執死雞頂上。

唔賀細叔
上月丁子高堂弟丁子峻（左）於杭州大婚，但千嬅並冇前往祝賀，只得丈夫丁子高（右）單拖赴會。有指丁子高怕大住肚的老婆坐飛機危險，禁千嬅出席。

「最緊要休息！」

推定 job閉關，據知千嬅為免於演唱會上微凸小腹曝光，專登於臨開騷前 5天全批歌衫換掉。唱片公司宣傳人員解釋︰「因為有批衫出咗意外，運唔切返香港，開騷五日前先造過批新衫。」週日（ 27日）本刊問千嬅有冇喜訊宣布，千嬅懶神秘︰「我有預感好快㗎喇，最緊要休息，所以完成年底的工作，我已經同公司有默契說想放假，主要是心情要輕鬆。」終於恨到啦！