2011年11月22日星期二

避鍾嘉欣簽Paco做一姐陳法拉氹掂老公泵水

FACE週刊第235期

老公萬歲

避鍾嘉欣　簽 Paco做一姐　陳法拉氹掂老公泵水

2011年11月23日

今年視后之爭，明顯係皇后胡杏兒大戰madam Jo陳法拉，時間緊迫，搞到自稱低調的法拉，終於都要拉埋Neway大少老公薛世恆出活動，公開關係兼造勢。

其實，薛世恆一向錫住老婆，有傳去年法拉簽約的星煥國際都係由薛世恆暗中科水，可惜簽約一年，法拉碟都冇出過，上週五星煥仲隆重宣布鍾嘉欣加盟。據知當法拉得悉鍾嘉欣「踩地盤」，即出招叫老公「做嘢」，除提早解約外，更叫老公再泵水開新公司，又氹掂大少搵金牌經理人Paco（黃柏高）出山揸莊新公司，誓要捧法拉做一姐。

真空搶視后
法拉話晒都係視后熱門之一，當然露背賀台慶。
今次一定出到碟！真實對白

去年七月，陳法拉在公司高層樂易玲撐場下，簽約兩年星煥做歌手，一年死約已過，眼見同期加盟星煥的新女吳若希、鄭欣宜都已先後推出個人專輯，反而一早講明要競逐今年女新人獎的陳法拉，就一隻歌都冇派過台，話晒都係老闆娘，仲要多埋個花旦鍾嘉欣，為免惡鬥，法拉暗中在今個月提前解約，鋪路過Paco新公司印印腳等做一姐。

公開關係
為咗幫法拉視后拉票，薛世恆上週四（17日）首次帶老婆出席Giorgio Armani造勢。《蘋果日報》圖片

嘉欣轉會撐
當年何哲圖（左）一手提攜鍾嘉欣入Neway，如今伯樂過檔星煥揸fit，鍾嘉欣都轉會力撐。

皇后鬥Madam
今年視后胡杏兒（左）同法拉（右）之爭，暫時杏兒被睇高一線，不過法拉做唔成視后，都有老公捧佢出碟。

新label玩晒

知情人士透露︰「只要幫到法拉，Daniel（薛世恆）好肯使錢，星煥幫唔到，加上簽埋鍾嘉欣，所以咪搞多一間公司捧囉，一年死約過咗就算，橫掂都唔係好多人記得佢係星煥歌手。」

星煥幕後老闆係Neway大薛公子已是公開秘密，據知他與黃柏高識於微時，而且Paco下年同金牌正式完結所有合約，連1年「冷河期」都過埋，終可再捲土重來，第一個任務，就是負責捧紅大嫂陳法拉。知情人士續說︰「Paco捧歌星不嬲掂，Daniel會揼本畀佢搞，仲有一隊港版AKB。」

記者致電Paco，佢未肯公開明年的復出大計，但就承認同薛世恆好老友，Paco說︰「同薛世恆識咗好耐㗎喇，一直都有合作，我只可以講，法拉係一位好有潛質嘅全面藝人。」上週六（19日），穿上大露背晚裝嘅法拉風騷現台慶，仲話下年一定出到碟，「同Paco係認識㗎喇，至於同星煥嘅合約年期，我真係唔記得，總之下年一定出到唱片。」有老公加金牌經理人睇住，今次實得啦！

'10首簽
舊年法拉簽約星煥係威係勢，結果連碟都冇得出。《蘋果日報》圖片

《蘋果日報》圖片

一歌花旦
舊年幫無綫劇《誘情轉駁》唱主題曲〈愛情轉駁〉，法拉仲以為食住個勢出碟，連日來出show（左）、登台都唱紅呢首歌，點知空歡喜一場。

硬膠面疑雲

臨近頒獎禮，法拉自爆近日因疲勞過度同壓力所致，覺得臉部有麻痺僵硬感覺，醫生話佢三叉神經出現問題，有臉癱危險而辭演新劇《名媛望族》赴美求醫。遠睇法拉都唔覺唔自然，但近睇又的確有啲硬膠，唔係打botox打到咁嘛?

法拉拍埋新劇《東西宮略》後，就返美醫病，近日法拉左面出現麻痺，搞到個招牌笑容都硬晒。

演員靠樣搵食！真實對白

出山捧新人

仲有個幾月，Paco就正式同金牌大風結束關係，翻身在即，Paco已急不及待加盟「太陽娛樂文化」，話就話做監製，仲出產過幾套電影《撲克王》、《戀夏戀夏戀戀下》，但Paco對音樂點會死心，今次仲有薛世恆以銀彈支持，仲唔有咁大搞咁大咩！不過，Paco向來捧完啲歌手，紅咗就拍拍籮抽走人，更不會隨Paco轉會（見下表），但Paco好豁達咁話︰「我會搵番佢哋拍戲㗎，好似小方同Stephy啱啱先拍完。」