2011年11月23日星期三

梁家駒法醫串《法證先鋒》

壹週刊第1133期

好男好女

梁家駒法醫串《法證》

2011年11月24日

在劇集《法證先鋒III》中，有個「肥佬」飾演齒科法醫，雖然出鏡不多，但就好搶戲。原來現實生活中，他是一名真真正正的法醫，他叫梁家駒。

梁家駒的名字雖然普通，但其實他的背景一點也不簡單，他是首位華人齒科法醫、是前律政司司長梁愛詩的契姪仔、家族經營的是有一百五十多年的壽衣公司「梁津煥記」。背景猛料，拍劇又冇錢收，連續客串三輯，究竟為乜？「我想多啲人認識齒科法醫。」

雖是齒科法醫，工作時要頭腦冷靜，私底下的梁家駒卻性格樂觀，訪問期間不時講笑，亦不介意扮鬼扮馬拍照。

甘草演員

梁家駒很忙，《法》劇出街時，想約他做訪問，他剛好在公幹。回港後，訪問要分兩次做，一次在他的午飯時間，第二次是趕在他開診前的早上完成，訪問出街之時，劇集剛好播完大結局。三輯的《法證先鋒》，主角都已面目全非，但梁家駒就仍然有得留低，「導演同我講：『梁醫生，你係唯一一個三個season都出現，已經轉晒人㗎啦。』哈哈，即係我已經做咗甘草演員。」除了幕前演出，梁家駒亦有份參與編劇的工作，「啲人會問拍嘢同真實有冇分別？當然係有少少戲劇化咗，但編劇部同事好認真，我哋一齊做好多資料搜集。」其實○三年沙士後的婦女節目《都市閒情》，才是他在無綫的處男演出，節目中他教煮餸，「嗰次之後青姐（梅小青）問我：『梁醫生，有冇興趣幕前演出呀？』我話試吓啦。」

他先在《法證II》與佘詩曼、鄭嘉穎和林文龍（右圖）合作，又在剛播完的《法證III》飾演張可頤的師父。

面對傳媒，梁家駒駕輕就熟，事關每逢有大案，他都會以專業知識去講解，《警訊》是他拍得最多的節目，但拍劇卻是另一回事，「初頭真係以為好簡單，點知原來咁難拍，譬如要講好多句說話，忽然間食螺絲NG，全組人要嚟多次，壓力好大，我要一句一句咁讀，然後剪接。有次我要望演員講對白，演員就攞張貓紙喺鏡頭後，我就扮望住個演員，其實係望住張貓紙。」除了客串拍劇，他亦上過不少無綫節目，如《兄弟幫》、《正識第一》，不過原來梁家駒最想拍的是飲食旅遊節目，「我個樣似阿韜嘛，又鍾意食嘢，哈哈，但個個都以為我講笑囉，如果有人叫我，即刻飯應！」

無綫出名人工奀，酬勞點計？他說：「淨係《正識第一》有封利是當車馬費，又送咗TVbuddy公仔俾我，我冇乜所謂。我覺得有需要向大眾解釋乜嘢叫法庭科學，既然有一個咁好嘅平台，可以做到教育大眾，我好樂意去做呢樣嘢。」

國際舞台

為了令大眾對齒科法醫有更深認知，他經常到本地中、小學及大學講talk，亦會受邀到海外教書。牙齒、指模、DNA是國際公認辨認死者的三種方法，在澳洲墨爾本考獲齒科法醫專業資格，但他並沒有加入政府的法證事務部，「我唔係政府人員，唔係受政府人工去做齒科法醫。」

齒科法醫似乎仍不被香港政府重視，是以梁家駒所參與的海外工作，如南亞海嘯、峇里島爆炸案等，都並非受香港政府委託，他坦言最初確實有不開心，但現在懂得放輕鬆，「香港政府唔明白唔緊要，我字眼要小心啲，唔可以話香港政府係『井底之蛙』呢個詞語，哈哈。好多年前已經睇通睇化㗎啦，我教我嘅徒弟、學生幫到人就得，唔好計較任何嘢。」再者，他現在的位置已經超出香港範圍，跳進國際組織，「喺各人嘅認知，中國人齒科法醫，第一個就知道係梁家駒，無論遠至國際刑警、國際紅十字會，我冇諗過可以坐喺呢啲組織入面嘅委員會去俾一啲advice。」

家族從事殯儀行業已有一百五十多年，雖然他不是指定繼承人，但有空仍會回店幫手。

梁家駒（後右一）和大哥梁家強（後左二），與契姑姐梁愛詩（前右三）、香港殯儀館創辦人蕭明的太太（前右二）和前警隊一哥李君夏（前左二）在○六年梁家新居入伙時合照。

他除了是齒科法醫，亦是執業牙醫。

阿嫲話事

梁家駒在一個傳統的家庭長大，他的爺爺、父親分別在他兩歲及廿二歲時過身，嫲嫲梁伍少梅便成家中的最高領導人，他當上齒科法醫，有部分是受嫲嫲影響，「細個已經安排好，家族生意由阿哥（梁家強）繼承，家姐做律師，阿嫲想我做醫生，一啲做警察嘅uncle問我知唔知法醫入面有齒科法醫，我做吓資料搜集，發覺原來幾interesting。」碰巧港大牙醫學院有個齒科法醫小組，所以梁家駒就決定選讀，「畢業後自己過咗澳洲讀齒科法醫。」

由於嫲嫲是生意人，加上是保良局第一代女總理，因此梁家駒自小認識不少城中的達官貴人，「嫲嫲喺律師樓見到梁愛詩，覺得佢乖巧聰明，於是收佢做契女。」雖然梁伍少梅人緣甚好，但對自己的孫仔孫女就管教嚴厲，就算當梁家駒大學畢業，擁有自己的社交圈子，仍然要每晚十時半前回家，否則冇門口入。當時仍是單身的梁家駒，多次因為嫲嫲與女友分手，「好多都頂唔順我屋企人囉，尤其是喺外國讀書返嚟嘅女仔，佢哋覺得成三十歲仔都咁怕屋企，梗係會擔心。」當然，最終他都能成家立室，還一再強調：「我屋企好幸福。」