隨着無綫台慶頒獎禮舉行的日子越來越近，下周將公佈提名名單，胡定欣日前四出物色戰衣，為頒獎禮作準備。
今年是胡定欣入行 10周年，回顧這些年的成績，她說：「呢 10年係一個累積，算係平穩，但未有一個好大嘅起落。以前細個唔識諗，成日覺得點解唔係我，點解我唔會有呢啲機會，加上嗰陣我淨係識得去演戲，但原來唔得㗎！除咗演戲外，仲要做好你嘅 business，如果唔係出去做嘢點樣去 present胡定欣呢？」
胡定欣近年遇到不少可發揮的角色，越戰越勇，網民更視她為最佳女配角不二之選，令她信心大增。
攝影：黃文偉
場地、服裝提供： Harvey Nichols
化妝： Jessica Chan
髮型： Matt Chiu、 Hei@Xenter
胡定欣以往的角色多令人過目即忘，除了 04年的《大唐雙龍傳》婠婠一角，可惜也只是虛火。劇照
胡定欣參演台慶劇《萬凰之王》與胡杏兒、宣萱在劇中鬥耍手段，被她視為挑戰。劇照
曾想走捷徑
正因如此，胡定欣不諱言當年曾因這些不明朗前景，令她感到迷惘：「初初入行嗰陣，我好希望有成績畀人睇，但一路行落嚟，有啲位開始諗唔通，唔知自己嘅價值喺邊，好似演戲方面，我唔識點去調節自己嘅心理狀態，成日覺得做得唔夠好，能力上好似 handle唔到，工作上又唔識得去選擇，究竟我畀到啲乜嘢觀眾？又有幾多觀眾識得我？跟住又會諗或者走去行捷徑，會唔會行得好啲同快啲呢？」她續說：「家諗番我覺得一切得失都有原因，我會同自己講，未到自己可能別人覺得你冇辦法 handle到，或者未係時候，家我會做好自己嘅本份先，相信人哋會睇到。我諗每個人都會有呢啲經歷，我好慶幸，呢個時候身邊有班朋友出現，佢哋好支持同鼓勵我，我覺得有啲位係自己鑽咗牛角尖，呢啲朋友會企出嚟幫我走過呢啲關口，真係好多謝佢哋。」
再冧莊成為「台慶月之星」的胡定欣，主演的劇集《法證先鋒 III》和《萬凰之王》被安排在台慶月播出，她在《法證 III》中飾演大律師 Eva，當中一場法庭戲的表現備受讚賞。
拍《法證先鋒Ⅲ》創了她幾個第一次，而她演的大律師角色也引起網民的迴響。劇照
■ 10年時間，胡定欣學懂做好準備，迎接突如其來的機會。
嘗試玩手段
胡定欣說：「我冇諗過會有咁大迴響，真係好開心，終於擁有一個觀眾會追看嘅角色，將我帶去另一個階段。今次係我首次做律師、太太同媽咪，初初接劇本時都有啲擔心，我諗個造型幫咗我好多，觀眾喺電視上都未見過我咁長頭髮，會畀到觀眾唔同嘅感覺。我唔介意做媽媽同太太嘅角色，最緊要劇本同感情上有呢個需要。」她笑言連父母都打電話給她，指她對劇中的囡囡和老爺太狠心；然後她又談到在《萬凰之王》飾演彩藍一角，她笑說：「今次都係我第一次拍清裝，我之前好驚拍啲勾心鬥角嘅女人戲，我諗拍嘅過程會幾慘，點知拍完又覺得好過癮，我、杏兒同宣萱喺戲入面要各師各法去玩手段，奪取各自想要嘅嘢，我睇完劇本都覺得好心噏。」
雖然能否在台慶頒獎禮中獲獎仍是未知之數，但最近已有不少討論區在進行賽前預測，很多人認為胡定欣是女配角大熱，她說：「見到觀眾咁支持梗係開心，幫我打咗一支強心針，我當然好想民意成真，最好梗係喺呢個 10年，繼《飛躍》之後另一個新開始，有咗呢啲累積咗 10年嘅經驗，希望喺下一個 10年，我可以開始去夢想、創造自己另一個嘅第一次、做第一女主角！」
胡定欣（左） 01年勇奪 TVB Covergirl總冠軍，從此踏上銀色旅途。資料圖片
直至 08年，胡定欣在《舞動奇跡》中有超卓表現，令她的演藝事業添上色彩。資料圖片
踏上轉捩點
每年台慶都是女藝人鬥靚的舞台，胡定欣自然要揀定心水戰衣。
胡定欣於 01年參加 TVB第三屆 Covergirl選舉勇奪全場總冠軍，從此踏上銀色旅途，起步至今 10年，雖仍未坐正第一女主角寶座，卻是她人生的一個轉捩點；成為藝人，一直營營役役努力付出，拍過不少劇集，可是觀眾對她印象模糊，嘗盡失望氣餒，直至 08年她被挑選到湖南參加《舞動奇跡》，分別在不同場次的競賽中獲取好成績，自信的舞技令觀眾眼前一亮，舞出她人生另一個轉捩點，連她的演藝事業也從此不一樣，她說：「《舞動奇跡》後大家都知道原來我跳舞都得，連帶其他工作都引起別人嘅注意，得到嘅角色又有得發揮，好多謝每位搵過我拍劇嘅監製，佢哋信任我嘅能力，令我喺呢二、三年間明顯建立咗一啲自己嘅嘢，以前台慶會諗我都識得跳舞，唔知公司會唔會畀我跳舞呢，家我已經變咗舞蹈組嘅同學，係一定要做，對我嚟講變咗有一個肯定，好開心，證明堅持同我嘅選擇係冇錯。」 10年時間能磨蝕人的壯志，也可以為人做好裝備，胡定欣選擇後者，因為她充滿信心，在第二個 10年開始，準備挑戰自己，爭取女主角的冠冕。
Orignal From: 有話兒：胡定欣狙擊女主角
沒有留言:
發佈留言