2011年11月19日
《萬千星輝頒獎典禮》將於下月5日假無綫將軍澳電視廣播城舉行，本報收到絕密消息，經高層連日來召開秘密會議，於最高話事人六嬸的審批下，最後敲定今年視帝、視后分別落在「Laughing Sir」謝天華及奸皇后胡杏兒手上。兩人獲得最後勝利，除了演技了得外，無綫更藉此表揚兩人對公司夠忠誠。鄭嘉穎同陳法拉大熱倒灶都唔使愁，無綫會頒番「我最喜愛電視男、女角色」畀佢哋，點都執番個豬肉獎！擸硬視帝的謝天華連日來心情大靚，日前更高調拖埋老婆Chok住「落區」巡視，準視帝Laughing在前，途人個個都驚喜地跟他打招呼！謝天華贏晒民意，紅到爆，確係今時唔同往日。
今年台慶頒獎禮賽果眾望所歸，從絕密消息中得知，謝天華將憑《潛行狙擊》成功封視帝；胡杏兒則憑《萬凰之王》奸皇后得視后；至於其他賽果請看附表。
黃宗澤鍾嘉欣食白果
「今年視帝同視后競爭得好激烈㗎，鄭嘉穎籮霸角色係近年做得好嘅，但佢冇乜人緣；所以投票時輸咗個馬鼻；志雲幫陳法拉冇咗陳總撐腰，咁就輸咗畀聽教聽話嘅胡杏兒，公司覺得杏兒五年前增肥拍《肥田囍事》爭輸咗，而家係時候畀個鼓勵佢！為咗安撫陳法拉，唯有退而求其次畀番個《我最喜愛電視女角色》獎佢，鍾嘉欣咁就成為咗犧牲品，同「跛Co」黃宗澤齊齊食白果！」
「視帝」遊街受歡迎
「因為王維基大軍殺到，所以今年公司都肯頒獎畀實力派藝人，好似黃智賢及江美儀咁，佢哋好低調咁演咗幾十年戲，論演技真係一流，有佢哋嘅存在，先至可以帶起一眾小生、公司希望頒獎畀佢哋，等佢哋唔好有離心啦！」知情者爆料說。
將「升呢」做視帝，謝天華變得容光煥發，日前「Laughing Sir」就拖住老婆Tina（李天恩）高調遊街視察民意。兩公婆先去時代廣場行超市，再巡遊去正值做感謝周年大減價、逼爆人的Sogo，本報記者所見，謝天華沿途大受歡迎，甚至有人驚叫：「嘩！Laughing哥呀！」謝天華風騷到暈，Chok住打招呼，爭取更多支持票數。
率先爆賽果 《潛行狙擊》成為大贏家
最佳男主角：謝天華《潛行狙擊》
最佳女主角：胡杏兒《萬凰之王》
我最喜愛電視男角色：鄭嘉穎《怒火街頭》
我最喜愛電視女角色：陳法拉《潛行狙擊》
最佳男配角：黃智賢《潛行狙擊》
最佳女配角：江美儀《潛行狙擊》
飛躍進步男藝員：林子善《怒火街頭》
飛躍進步女藝員：樂瞳《點解阿Sir係阿Sir》
最佳節目主持：馬浚偉《大廚出馬》
最佳劇集：《潛行狙擊》
Orignal From: 率先爆賽果 《潛行狙擊》成為大贏家
沒有留言:
發佈留言