面對面
人間喜劇 《盛女》 Bonnie繆婉嫻
2012年05月02日
巴爾扎克的作品集《人間喜劇》，以 2,400多個人物，側寫出 19世紀的法國面貌。而今月中，無綫 10集真人騷節目《盛女愛作戰》， 5位恨嫁女士，加上一群人生教練與導師，眾人之八卦醜聞不但娛樂了大家兩個星期；另再度挑起港男港女相互傾軋的積怨。現實中的喜劇，誠然往往源自悲哀的眾生相。
而盛女之一、 29歲的 Bonnie（繆婉嫻），個性豪邁，更因長相而被網友封為「女版錢嘉樂」；在這齣鬧劇中一夜成名之餘，更獲商台 CEO陳志雲欽點，上週一（ 23日）起在新節目《大龍鳳》中開咪，成了另一齣山雞變鳳凰的故事。
首次接受專訪的 Bonnie，已答得頭頭是道：「其實呢兩個星期所有嘢發生得好快，我到家都仲係摸索緊，你問我適唔適應到，我都未知成件事係點，所以都唔知，只係覺得好 攰。……紅得快，忘記得快，係香港傳媒嘅生態，家既然有機會在商台發展，我要做好呢份工。」小盛女逐鹿名利場，延續繽紛喜劇，又有何不可呢？
三十歲前的女人
曾任職傳媒行業的 Bonnie，一直是眾人中被爆料最少的人之一，「因為我以前做過 online media嘅 Corporate Communications，所以自己知道要點樣保護自己嘅嘢……而傳媒朋友搵到嘅嘢，好坦白講，有啲我係意外，但有啲係我分享出嚟，都唔會特別介意。」難怪在訪問之初，當我問到她就讀哪所中學，她也小心對答：「我覺得要保障番我身邊嘅朋友，因為怕大家去摷校刊呀。」如此熟悉圈中運作，入行似乎並不意外。「我唔抗拒，本來都唔係想入娛樂圈，或者影視圈，只不過我覺得有一個機會去擴闊自己嘅眼界。當然今日嘅機會我好珍惜，亦都完全意外。」
最後她只肯透露曾在東區就讀官立中學，「從來冇諗過自己要做到啲咩嘢，所以讀書時候都幾迷惘，但因為讀理科出身，咁覺得從事 health science，可以在健康同醫護方面幫到人……自己係一個鍾意同人相處嘅人，都希望將來嘅職業同人有關，就係唔想做 engineering同 accounting呢啲職業」。但後來高考成績僅僅合格，被家人安排往澳洲升學。「佢哋想畀個機會我讀大學、又畀我自己獨立生活，同見識吓外國嘅世界係點樣。」在留澳 8年，在科廷大學修讀護理學，只欠修讀一個學期便可畢業，「因為有啲私，嗯……一半私人理由、一半屋企原因，我就返咗香港，差一個 semester就可以畢業，係好可惜，但因為唔係我可以控制，所以冇辦法啦！」
09年 Bonnie回港工作，而家人則移居澳洲，現時自己獨居父母所留下的公屋。「當呢個機會嚟（《盛女》招募）嘅時候，我冇同任何人講過、討論過，好任性就決定咗報名。我覺得在過去 29年，我聽太多身邊人嘅意見，好似冇一件事係我曾經決定過，譬如去澳洲讀書都係屋企人嘅決定。……我父母唔在港，於是自己豁出去做一啲嘢。」
性格「男仔頭」的 Bonnie，在節目中經常爆出金句，現在開咪做主持要學習收斂，「我家都係 honest㗎，不過唔會完全唔經大腦講出嚟囉。」
Bonnie在陳志雲邀請下，聯同林曉峰及導師 Eva主持《大龍鳳》，「家暫定做一季 13個星期，希望自己可以盡快 pick up到一個專業主持嘅水平。」
她自言參加《盛女》，並非自信十足，只是趁「而立」大關前賭一場。「當時覺得自己做咩都做得唔好，學業我又差一個學期未完成；在事業我又好多困難同掣肘，因為學歷問題，事業發展又有局限。愛情方面，同個男朋友差唔多在準備結婚時分咗手，身邊好多朋友結 咗婚同有小朋友。自己覺得年紀愈大，選擇就愈來愈少。加上，同屋企人嘅關係又好疏離，總之自己覺得冇一件事係順利。究竟我有咩問題呢？與其一個人在屋企諗唔掂，咁不如聽吓人哋意見…… 30歲係一個好好嘅總結同修正。如果自己有唔成熟嘅地方，就令自己成長囉。」
我是喜劇演員
為什麼不向身邊朋友問意見，倒要上電視給全港觀眾評頭品足？「自己從來唔會主動問朋友意見，但有時朋友會唔抵得，會講一啲說話畀我聽。坦白講，忠言永遠逆耳。我以為係我令到身邊嘅朋友唔開心，所以佢哋唔鍾意我，冇諗過佢哋其實為我好，於是更加收埋自己嘅嘢。我媽咪教我永遠做最壞打算，於是我永遠向最壞方面諗……可能好小事都會諗到世界末日。譬如今次商台嘅機會，我唔會諗自己可以做到啲咩，而係有幾多人會失望呢？會唔會令到身邊人唔開心，因為佢哋冇呢個機會？或者陳總咁賞識我，會唔會令佢失望呀？」
在《盛女》節目中， Bonnie被形容為「義氣仔女」、喜歡照顧別人，而工作人員也多次向我強調她的熱心。「我覺得見到身邊嘅人開心，我就會開心；如果身邊嘅人唔開心，我都會唔開心，所以我會好努力令佢哋開心，其實都係一個自私嘅出發點。」今年初她更捐骨髓救助一個年紀相若的血癌女病人，「我家算有少少嘅名氣，最想可以帶到一啲正面嘅信息畀觀眾，好想拍一啲慈善嘅廣告，最想幫骨髓資料庫拍廣告。」
10集的《盛女愛作戰》引起全城關注，其中 4位盛女 Bonnie、 Suki（左二）、 Mandy（右二）和 Florence（右一）即被網民起底，而熟知傳媒運作嘅 Bonnie已一早保護好個人資料。《蘋果日報》圖片
一班盛女及導師被邀上陶傑主持的《光明頂》，被聽眾指「騎劫」， Bonnie回應：「我明白《光明頂》嘅路線同我哋好唔同，會令到恆常嘅聽眾唔開心。」
未參加《盛女》節目前的 Bonnie，比較不修邊幅，有自稱舊同學的讀者報料，指 Bonnie在澳洲留學時經常與男同學作伴，但多為其貌不揚的男生。
我唔係一個花瓶嘅角色、無知婦孺。
去年她已在網台「民間電台」主持節目，自前週在陶傑主持的《光明頂》做嘉賓而獲陳志雲賞識，算是平步青雲。「我唔係一個花瓶嘅角色、無知婦孺，（在《光明頂》）有啲評論同題目研究，我都有自己嘅睇法。如果單單講我係一個盛女，我就唔可以上《光明頂》，咁大家只係了解咗我嘅其中一面囉。」現在她跟兩位《盛女》教練 Winnie和 Eva，夥拍林曉峰主持清淡節目《大龍鳳》，算是平了半個 DJ夢。「細細個已經聽阿芝（卓韻芝），由《我有個頭》時已經開始聽，都有追商台啲廣播劇。當時都會諗阿芝都係大我幾年啫，點解佢會做到？點解佢會咁叻？咁我會唔會都做到呢？但真係冇諗過，真係會有呢一日。」
即使她被彈口齒不清，疑似黐脷筋，亦一樣有權發聲。「其實我嘅聽覺唔係好靈敏，聽唔到自己咬字唔正，分唔到輕重音 啫。雖然我黐脷筋，但商台都唔擔心，我做咩要擔心 啫，以後做好啲囉……無論我同商台嘅合作係幾咁長或者好短，只要唔違背我可以認識電台運作（原意），可能唔係商台唔要我，可能係我轉咗去玩其他更加好玩嘅嘢呢。就算一日之後冇咗啲名氣，我唔會唔開心。」
我想嫁得好
Bonnie事業漸露曙光，偏偏剩女身份依舊如影隨形，共有 6次戀愛經驗的她，初戀發生在考會考之時，二人直到往澳洲升學而分開。「第一個男朋友好錫我，令我有錯誤期望，以為所有男人應該好錫女朋友。」她甚至兩度成為第三者而不自知：「男朋友話唔係（已婚），我就會信 㗎喇！」
「其實我寧願嫁得好，都唔想做女強人。我冇咩事業心又冇咩大志，暗地裏我嘅志願係做一個好太太。經營一個屋企同經營一間公司，一樣唔簡單，一樣咁多變幻……家借少少嘅名氣，自己可以去到唔同嘅社交場合，可能會識到更多唔同嘅人，可能佢哋未必會介意我係咪一個名人出身。」
因為想認識上流人士？「其實係一個誤解，在（《盛女》）節目內我講過『凡去蘭桂坊嘅（人）都想識個 banker、識飲紅酒、咖啡，打 golf，而唔係食雲吞麵』，我嘅意思係指擴闊生活圈子，唔只係向上，而可以向橫同向下擴闊，我唔介意認識任何階層嘅人。好似我除咗對商台、對電視有興趣，我對鑽地都有興趣㗎！只要我唔識嘅嘢我都有興趣，甚至個男朋友係整魚蛋粉，我都覺得有專長嘅男人好有吸引力，我想今我有一樣崇拜佢嘅本領。我嘅大志係好小女人，就係想成為一個賢內助，例如我老公係個 programmer，我就學吓電腦囉；如果佢係個魚蛋粉佬，我就學吓點樣搓靚啲魚蛋粉囉。」
Bonnie在澳洲生活 8年，起初與中國人作伴，後來多與外籍同學一起打波遊玩，「同外國人相處可以開心啲，可以好坦誠咁講，有時有啲擁抱同親吻，我會覺得好窩心。」
為家中長女的 Bonnie，有一個年幼 4歲的弟弟，但她說自己與家人關係比較疏離，「我同媽咪瞓覺係最辛苦，因為我一定黐喺床嘅另一邊，會覺得掂到對方嘅感覺好奇怪、唔自然。」
去年 Bonnie與 Santino徒弟 Pierce一起主持「民間電台」的《盛女再作戰》節目，至今天 Bonnie到商台開咪， Pierce亦一直陪伴她接受訪問，打點甩漏。
留給最親的說話
從來 Bonnie的賣點是說話直率，在熒幕前先有「靚女都會撩鼻屎」金句，鏡頭後則直斥 45度達人 Santino「好心你唔好咁 chok！」；初生之犢，有潛質月旦人事，亦難免言多必失會出事。
訪問中，在節目統籌人員和好友兼 Santino徒弟 Pierce護航下，即使 Bonnie偶有說辭不清的時候，二人隨即提點和解釋，步步為營，生怕有誤。「其實家無論開咪定面對傳媒，講真好多掣肘，都唔可以暢所欲言，有好多朋友好衷心同我講，你講嘢要小心啲，既然你都唔識講嘢，就不如唔好講喇！咁我在工作同面對傳媒時惟有謹慎一啲，最真嘅說話真係留番畀最親嘅人囉。」 Bonnie說道。
Orignal From: 人間喜劇 《盛女》Bonnie繆婉嫻
沒有留言:
發佈留言