2011年11月4日星期五

無綫內定胡杏兒攞視后爆《萬凰之王》絕密劇情

忽然1周第849期

娛一叮

爆無綫高層開會　內定胡杏兒攞視后

2011年11月04日

佘詩曼離巢後，無綫視后是胡杏兒與陳法拉之爭，但論演技論資歷，胡杏兒佔優。據知三星期前，無綫一班高層開會，傾視后人選時，胡杏兒不但獲樂易玲力撐，梁乃鵬亦力讚她演技出眾，所以就算陳志雲幫口撐法拉，亦未能力挽狂瀾。

為了令胡杏兒攞視后攞得實至名歸，一班高層力谷新劇《萬凰之王》，結果，首播收視達32點，比法拉孭飛的《潛行狙擊》首播時29點更高。今年視后，胡杏兒成竹在胸，難怪她信心十足話︰「公司落足本打造呢個劇，唔可以令大家失望。」

我有信心攞！（真實對白）
預知賽果，胡杏兒對記者亦零舍風騷，有問必答，當被記者讚贏面大時，她就說：「你講㗎咋！咁你記住要咁寫喎！」

繼《金枝慾孽》及《宮心計》後，無綫都捉到路，知道觀眾口味，宮廷勾心鬥角劇是收視保證，而無綫為胡杏兒度身訂做的《萬凰之王》，亦是幫胡杏兒摘下視后的階梯。

《潛行狙擊》收視最高有42點，直接提高陳法拉和徐子珊奪視后的呼聲，不過現時卻被趕尾班車的胡杏兒跑出。難怪記者問及此事時，陳法拉顯得酸溜溜，徐子珊直情打定輸數。

胡杏兒加入無綫後，一直對樂易玲忠心不二。難怪在蜀中無大將的情況下，樂易玲第一個捧上位的便是胡杏兒。

樂易玲六嬸硬撐

據知，三星期前，一班高層開會，包括六嬸、梁乃鵬、李寶安、陳志雲、曾勵珍、梁家樹及莊偉建等，會中提到今年視后名單，《萬凰之王》莊偉建監製當時力sell胡杏兒。知情者話︰「阿莊力讚杏兒嘅內心戲好，令成個劇好有張力，而梁乃鵬亦大讚胡杏兒進步唔少，花旦中睇高一線。樂易玲則力撐杏兒夠搏，佢提番起當年（06）杏兒為演《肥田》增肥30磅，六嬸聽完後亦點頭贊同。

「陳總則力薦法拉較有觀眾緣，不過，大部分嘅人都覺得法拉嘅演技嫩啲，如果攞視后，怕遭人非議。而席間睇過《萬凰》嘅高層，都一致投杏兒票，咁嘅形勢，杏兒點止贏一個馬鼻。」周二（1日）在節目巡禮上，罕有低胸的胡杏兒勁風騷，被問到高層欽點攞視后，她說︰「唔敢講呀（攞視后），套戲同角色都好犀利，但都要交俾觀眾去決定。個角色好有爭議性，唔係一個討好角色，不過我有信心攞。公司落足本打造呢個劇，我唔可以令大家失望。（有傳開會內定俾你喎！）嗱！你講㗎咋！（續約換獎？）我續咗約好耐啦，都唔關事！」

低胸任影

胡杏兒在周二（1日）晚出席無綫節目巡禮，就罕有以超低胸晚裝示人，更樂意做人肉布景板陪貴客影相，一姐當然風騷過人。

指揮宣萱

論資排輩，宣萱始終稍勝胡杏兒，但周一（10月31日），胡杏兒吹雞搞的首播飯局上，就越級指揮宣萱坐低。

助手擔遮

周一（10月31日），無綫為《萬》劇舉行擊鼓造勢大會，胡杏兒除企在正中位置外，綵排時更有助手全程擔遮，甚有一姐待遇。

監製斟茶

周日（10月30日），胡杏兒以皇后造型到珍寶海鮮舫宣傳《萬》劇，監製莊偉建錫她錫出面，主動斟茶遞水，杏兒亦欣然受落。

法拉死撐有信心

至於本來大熱的法拉，初時有無綫新老闆陳國強撐，但她近日亦收到風，心知形勢不妙。談到攞視后，陳法拉死撐話：「有，有得提名，梗係要對自己有信心。」不過提到《萬凰之王》走勢凌厲，她酸溜溜話︰「佢收得咪好囉，好事嚟嘅！（咁你俾自己幾多分呀？）唔知呢！俾自己80分囉！」

至於陪跑的徐子珊就擺明隔岸觀火：「今年嘅目標係入到五強，有機會上台已經滿足，我負責坐响度觀戰囉！（睇好邊個？）我當然撐杏兒啦！不過法拉都好好！」其實自阿佘離巢後，無綫蜀中無大將，惟有急急捧二線花旦如胡杏兒、徐子珊及陳法拉等接班。早在去年初，胡杏兒與無綫談續約時，無綫就講明會開行turbo，為她度身訂做劇本，為來年（2011年）視后鋪路。天時地利下，杏兒亦搏到盡配合，今年她孭三齣劇，套套高收。

知情者話︰「其實阿佘去年遲遲唔肯傾續約，無綫都知佢有離心，阿佘好姊妹楊怡，亦隨時跟佢轉會。當時樂易玲已經部署好，要搵有突破嘅角色俾杏兒，又特登搵唔係風眼嘅宣萱拍佢，就算杏兒做奸，都唔怕被搶風頭。」有高層撐腰，胡囧攞視后易如反掌。