隨着扭計佘（佘詩曼）、廖碧兒自動放棄，唔做無綫「親生女」（不續經理人合約）後，隨即被胡杏兒、楊怡和陳法拉攝位做王牌花旦，三人鼎足而立，成為今年無綫視后大熱人選，不過，胡杏兒坐享天時、地利、人和的優勢，手執半個盃耳捧走視后，皆因今年無綫《萬千星輝頒獎典禮2011》破天荒安排台慶頒獎禮於周一晚，即12月5日舉行，巧合地，正好放在杏兒主演的無綫熱播劇集《萬凰之王》大結局後翌晚頒獎，更弔詭的是《萬凰之王》除首播日要《法證先鋒3》讓路，好讓可以連播兩集外，更分別在結局篇，即（12月2日）周五及（12月4日）周日晚，每晚同樣連續播兩集，趕住為杏兒谷勢拎獎，唔怪得有「100分」信心封后嘅胡杏兒呢排風騷到暈啦。採訪：方騫平
無綫為胡杏兒度身訂造的《萬凰之王》首日收視高達32點，師奶觀眾晚晚都擔定櫈仔睇胡杏兒呢個皇后點樣奸到出汁，同宣萱、胡定欣點勾心鬥角，一路鬧杏兒，一路追住睇，不知幾過癮。據知，無綫高層開會傾今年視帝、視后人選時，個個都睇高杏兒一線，支持票數比佘詩曼所演的《花花世界花家姐》更多。
造就胡杏兒
「從陳慧珊到佘詩曼，演技派花旦逐一離開（唔續經理人約），公司梗係要諗辦法去留人啦。胡杏兒自99年出道，一直出名夠博唔會say no，又冇異心，06年接拍《肥田囍事》仲增肥 三十磅添，雖然曾被網民狂插演技差做『胡囧囧』，但近年演技進步唔少，所以今年年頭，高層開過一個內部會議，點名要幫胡杏兒造勢拎視后，除咗度身訂造《萬凰之王》外，仲擔正拍新劇《怒火街頭II》，又度期放佢拍杜琪峰執導電影《奪命金》去增加人氣！明年仲會安排佢拍《衝上雲霄2》，擺明捧佢上位，最爆係，今年台慶頒獎禮都要遷就埋《萬凰之王》播映日期，待該劇於周日(12月4日)急急播完後，打鐵趁熱翌晚頒獎，亦係破天荒安排周一晚舉行，居然肯放棄周五至周日，揀閒日舉行台慶頒獎禮，無綫做連串大龍鳳，你話今年視后點會唔係佢拎呀？」知情者說。
萬劇監製幫出口
啱啱升為經理嘅《萬凰之王》監製莊偉健證實了播映安排，但唔評論係咪為杏兒度身訂造，他說：「公司係咪天時、地利、人和方面造就杏兒拎視后？其實我覺得佢做得唔錯喎，雖然外間有批評，話佢未夠鄧萃雯咁奸，我想幫佢解釋，只係大家認定奸皇后就係雯女嗰種模式啫，其實劇情話杏兒本身係善良嘅，只係受母親陳秀珠唆使，要力保皇后地位先至有連串奸計，而性情最大改變，係話佢一念之仁為救宣萱，搞到害人終害己小產，最後先至奸到出汁。我畀杏兒演技有八十分㗎。當年杏兒《肥田》輸畀阿佘嘅《鳳凰四重奏》，如果今年惡鬥下，杏兒得到獎，阿佘咪還番個獎畀佢咯。」
據知，無綫高層在會議上獻計，建議讓黃宗澤(Bosco)和胡杏兒以情侶姿態奪取今年的視帝、視后去增加噱頭：「開會時某高層力sell Bosco宜古宜今，且可忠可奸，演戲層面比祥仔同陳豪更闊，所以分分鐘今年黃宗澤以黑馬姿態壓倒鄭嘉穎、黎耀祥跑出。」知情者爆料說。
絕密劇情率先睇
胡杏兒、宣萱被皇上陳錦鴻寵幸同懷龍種，杏兒受母親陳秀珠唆擺下設計令宣萱跌落樓梯滑胎，在危急關頭，杏兒一念之仁救回宣萱，卻意外令自己小產，陳秀珠唯有教唆杏兒向舊情人陳山聰借種，最後被皇上揭發姦情，憤然將杏兒打入冷宮，並殺掉陳秀珠，令杏兒奸到不能自拔。直至最後借種所生的兒子差點沒命，感於有愧皇上，後段才由奸變忠，反觀宣萱在杏兒和升任妃子的胡定欣夾擊下，愈變愈奸，新仇舊恨作出大鬥法。
Orignal From: 獲高層撐腰造勢 胡杏兒做硬「視后」
沒有留言:
發佈留言