面對面
高海拔之戀 王祖藍
2011年11月09日
管它喜瑪拉雅定還是青藏高原，男女主角是古天樂和鄭秀文，我就覺得，男的俊女的型，撻着理所當然，有甚麼好歌頌？
換着 5呎 4吋的馬鞍山土產諧星追到 5呎 9吋的溫哥華回流選美冠軍，才真的是跨種族跨地域拋開世俗成見人望高處的高海拔之戀，讓我對坐在眼前的王祖藍肅然起敬。
上次訪問 31歲的王祖藍是 4年前，當時他是《同事三分親》裏的鐘點工樓華、《東方之珠》裏郭晉安的幕後代唱，才剛起步。短短 4年，主演過電影、推出過兩張唱片、做過 one man show開過演唱會，還是無綫台柱笑將「福祿壽」之一，事業在不同領域都能獨當一面，連愛情的種子都能在高海拔開花結果，難道人紅，在女孩子面前都能變得高大起來？
「唔係喎，喺女朋友面前，我鍾意做番小朋友……呢幾年去到邊都要備戰狀態，唔可以講真話、唔夠膽表達自己，真係需要有個地方，畀我扭吓計做番自己，下下要扮大人真係好辛苦。」
不是只有高原上才需要氧氣筒，人爬到高處，空氣同樣稀薄。
等住使嗰 6千蚊
4年前單拖一個來做訪問， 4年後，王祖藍身邊多了個自資聘請的女助手。剛在影樓準備化妝的空檔，助手像電視劇裏的女秘書一樣，準備了一疊文件、支票請老闆簽名過目，其中一份是政府派錢的登記表格。
「聽講出年先登記有多 2百蚊……唔等出年啦！我真係等住嗰 6千蚊使……家支出多好多，出糧畀助手、畀家用、梳化雜項、 social、請食飯、封利是，仲想儲錢買樓呢……不過呢個價位買唔起，咪睇定啲，當再儲多排錢先囉。」
《荃加福祿壽探案》剛播完，王祖藍還推出了第二張個人專輯《 All About Loving You》，在此之前還有電影《勁抽福祿壽》、《荃加福祿壽》，嚟緊台慶、剛過去的港姐，還有《勁歌金曲》以及大大小小電視台綜藝慈善騷，人紅，就是疲勞轟炸去到邊都係佢。
去到邊，人人都想我搞吓笑，買碗豆腐花，賣嗰個都話我唔搞笑唔賣畀我。
今年暑假，王祖藍在伊館舉辦 one man show，還自擺女友李亞男上「台」：「我想做好啲，其他工作太多，搞到我剩番兩個星期準備，但有冇心做，大家有眼睇。」
「觀眾喜歡鋤強扶弱，以前出得幾秒最多一陣，個個都話我好笑、讚我得意，家周不時會聽到人話，唔好笑、睇到我厭……過度曝光、有啲笑位連自己嗰關都過唔到，我唔係唔知。以前真係容易好多，爛命一條，大把時間，工作只會愈嚟愈多、愈嚟愈好。得閒起上嚟，返吓教會、掃吓電話簿，睇吓邊個好耐冇見約出嚟聚吓。家，無綫經理人一份期表、唱片公司又一份期表，時間分配本來就被動。中國人好得意，鍾意講人情。以前好多人幫過我，我想盡可能報恩還人情，於是兒童組、綜藝組、科教組、戲劇組個個監製搵到都唔想推，一個月期話咁易就爆，曝光係好易過度，其實我真係知。但你知呢行，唔推得人，一推就怕得罪人，怕人講『紅啦！唔識人啦！』，永遠都顧住人 哋感受，最容易係忽略自己。啱啱個九月，我一早同電視台同唱片公司講過，一定絕對唔開工，我點都要留番啲時間畀自己。嗰個月，我跟咗教會去傳道，又去咗紐約睇百老匯。你知唔知，坐喺度睇第一場《吉屋出租》，激動到喊咗出嚟……以前冇錢去，家冇時間去，一個十幾年嘅心願終於等到。」
陪笑餿米肉粒飯
王祖藍說，要不是十年前父親因病過世要加入電視台幫補家用，他早就是個背囊客走遍歐美劇場：「演藝學院班同學中，個個覺得我最唔會入電視台，因為我份人最舞台劇，冇可能離開舞台劇。我開頭目標係黎耀祥……講緊係嗰陣時嘅黎耀祥，唔係視帝黎耀祥喎……但求有劇開，有條配角線畀我就得……」結果卻名利雙收，不知道這算不算是事與願違？
人紅是非多是真的，王祖藍走紅以後，我不只聽到一個人說：「佢家巴閉啦，見到人超假、超浮誇囉……」
「唔只我聽到，阿媽都聽得多。以前喺街度撞到，見唔到咪就係見唔到囉，家見唔到會俾人話：『勁啦，唔識人啦……』師奶話佢：『巴閉啦、星媽啦，唔得閒同人食飯啦……』邊個話唔得閒啫，你叫我咪出嚟囉……我阿媽完全明我處境，因為實際上得佢會見到我黑面，我淨係返屋企至夠膽黑面。出街唔笑話我黑面、笑咗又話我假，我好努力對住每個人都保持笑容，但我唔排除有時攰，有時以為自己笑緊，原來笑咗仲衰過唔笑……」
這就是一個諧星的悲歌：「我係諧星，我責任同使命就係搞笑，但有時攰起上嚟又點帶歡笑畀人呢？去到邊，人人都想我搞吓笑，買碗豆腐花，賣嗰個都話我唔搞笑唔賣畀我。喺街遇到合照啦，淨係笑都唔得，佢哋會話：『你唔好咁啦，整個搞笑樣嚟睇吓！』」
話口未完，王祖藍說剛從飯堂叫來的粟米肉粒飯味道有點餿，外賣阿姐下樓來換飯：「唔好意思呀，我叫師傅小心啲……祖藍呀，你可唔可以笑一次畀我聽，你笑得好得意呀！」
「 Huh— Huh— Huh—」王祖藍一邊聽話獻上招牌重鼻音誇張笑聲、一邊看着我說：「係唔係呢…… Huh— Huh— Huh— Huh— Huh—」笑中有淚，還帶着肉粒飯裏的餿味。
與阮兆祥、李思捷組成的「福錄壽」，從 4年前台慶上的單元節目一鳴驚人，延伸至有電影、綜藝節目到剛播完的電視劇《荃加福祿壽探案》的台柱笑將。
去年 12月，福祿壽在灣仔會展舉行演唱會，場場爆滿還有天后鄭秀文做嘉賓：「我哋真正係打死不離福祿壽。」《壹週刊》圖片
去年初，王祖藍與友人合資開糖水鋪：「我唔會一世做幕前，當然亦唔會靠糖水鋪養老，最想係退出幕前搞劇團。」
06年已經有份出席樂小姐壽宴的王祖藍說：「前排王維基搞電視風雲，我收唔到短訊。我唔會離開 TVB，因為冇地方夠佢多演出機會。」《忽然 1周》圖片
追高妹講勝算
拍拖年半，王祖藍說與教友女友李亞男感情穩定，並堅稱遵守教條禁慾：「呢個問題我點答你哋都唔信，我只可以話，我好虔誠。」
人仔細細，王祖藍說起話來充滿野心：「入電視台係佢（上帝）安排，佢想我做幾耐我就做幾耐，我最終理想都喺舞台劇。有個馬來西亞牧師話我聽，要堅持理想，就要每日打碎自己理想，我哋有時太理想，唔明白現實殘酷，嗰啲唔係理想，係空想。好似余秋雨，佢做上海戲劇學院院長成日抱怨，佢想搞戲劇，點解要做埋行政搞埋籌款？好似《跳躍大搜查線》個男主角，成日話現實不公又黑暗，身邊個老差骨每次都會同佢講：『想做到要做嘅嘢，就要上高位！』我要做到有影響力嘅舞台劇演員、要有自己嘅團、做團長，就要有附帶條件，搞好人際關係、曝光足夠。」
有野心的王祖藍，瞬間人也變得高大起來。我納悶，難道人紅能力強，所以身高 5呎 4吋也信心過人夠膽追求高妹，所以在 5呎 9吋高的女朋友李亞男面前，形象卻是高大威猛的？
「咁又唔係喎，喺出邊做人太辛苦，喺佢面前我鍾意扮小朋友，對我嚟講，一段感情係可以畀我放鬆吓、扭吓計。喺呢行咁多年，我都試過信心問題、身形問題唔敢出手去追人。好多時男仔追女仔唔係講條件、唔係講身高，係講勝算，以前我試過怕失敗，講都唔敢講，但老老實實，我追呢個女仔（李亞男），其實一啲勝算都冇，不過對佢，我唔介意失敗，淨係講一次，都抵！」
扮女人扮上位後累全家被跟蹤，妹妹（右）還被嘲笑似女裝王祖藍：「阿媽同阿妹比我睇得開，我係俾佢鬧咗幾句『你呀，累我俾人影，請食飯呀！』」
《忽然 1周》圖片
變變變變生命力
被不少人評價，走紅以後誇咗又假咗，王祖藍說：「我唔可以期望人人都明白，我呢個係時間同空間嘅問題，我冇咁多時間同個個解釋，你唔係我，冇同我相處過，亦永遠唔會明白我處境。」
這話是真的，電視上看起來浮誇爆，其實 4年以後坐在同一個影樓裏同一個座位上，王祖藍其實還是王祖藍，每一個問題都答的誠懇，也不是每一刻都皮笑肉不笑。
「我學緊表達意願而令人聽得舒服，同時間人哋當面對我講嘅說話，我都唔會當真。比如話，首映後一個二個行埋嚟話：『好好笑呀！好好睇呀！』不過好有可能，我變咗，但自己都唔知……」
王祖藍扮女人還好笑嗎？不管你笑沒笑，反正我是笑了。
撰文：朱小博
攝影：范仲良
形象： Bryan@ the Flaming
服裝： Another FCK
Orignal From: 高海拔之戀 王祖藍
沒有留言:
發佈留言