其實一個節目成功，主持的功勞雖未必是最大，但遊戲節目講求是氣氛，祥仔和伍姑娘被稱為「美女與野獸」的主持組合，絕對做得稱職。能夠這樣合拍，除了因為已相識十多年外，還加上他們對不少事物的看法，竟然超級一致。
訪問當天記者是分開跟祥仔和伍姑娘傾談，但赫然發覺很多答案都相似，譬如大家都渴望再有合作機會、大家都不打算生育，甚至「變性」後想做政客等，看來他們真是天生一對，能夠成為好拍檔，絕對有跡可尋。採訪：杜淑霞
髮型：Hair（伍詠薇）、Eddy Kwong（阮兆祥）
化妝：Make up forever
（伍詠薇）
《變身男女Chok Chok Chok》成功，祥仔和伍姑娘都認為香港電視上從未有過類似節目，所以新鮮感絕對是一大因素。他們合拍的表現，二人認為只是一個連貫氣氛的作用，但不忘互笠高帽。祥仔說：「首先伍姑娘夠靚先，再加上佢大情大性，好投入嘅表現，絕對令節目生色不少。」伍姑娘說：「祥仔係一個唔自私嘅拍檔，大家都睇唔到佢成日幫我執漏，節目能夠咁流暢好彩有佢咋！」
祥仔和伍姑娘既然合作愉快，當然希望完成了18集節目後再次合作，但伍姑娘11月約滿無綫，不過祥仔深信將來會再合作，「如果佢真係走，咪等佢返嚟囉！我相信一定有下次，我會等佢！」伍姑娘聽到祥仔的答案後，即爽快話：「多謝佢！但如果監製話再開，拍檔又係祥仔，唔使問都會返嚟，祥仔放心，唔使等！」
不打算生育
祥仔和伍姑娘雖然合拍，合作亦有火花，但卻怎樣也不會擦出愛火花，因為他們早已心有所屬。44歲的祥仔坦言跟拍拖12年的圈外女友Crystal打風打唔甩，母親和姐姐早已視Crystal為家人，但為何還未肯結婚，他解釋說：「結婚為咩先？除非係有小朋友啦！唔係根本冇呢個需要。（打算幾時生？）我唔得……閒呀！哈！我如果有小朋友會想陪住佢成長，到時可能會停產一年，但係依家根本冇可能，好在我同女朋友有共識，媽咪亦從來唔會畀壓力我，所以暫時都唔會諗住。」
42歲伍姑娘跟丈夫練海棠結婚12年，她坦言曾有過生育衝動，但近期都決定放棄，「以前會因為見到朋友啲小朋友得意，好想生BB，但依家應該唔會諗啦！我同老公都比較自私，鍾意可以突然飛去歐洲旅行浪漫吓，但係有咗小朋友就唔可能咁樣。依家得閒有個契仔魔童陪我玩，玩完可以塞返畀阿靚幾好呀！況且我冇諗過放棄演戲，亦要兼顧美容產品生意，將來希望可以搞埋上巿，咁忙根本冇可能照顧到小朋友。」
變身做政客
談到變身男或女，想不到祥仔和伍姑娘再度表現合拍，大家都不約而同，幻想以另一個性別一嘗做政客滋味。祥仔認真想一想說：「做女人嘅話我希望可以做社會領袖，咁樣就可以改變世界，令社會變得更加好，女人從政有個好處，就係可以軟硬兼施，因應情況用兩種態度，說服力都會大啲，好似陳方安生咁都唔錯，可惜佢已經退出前線。」
伍姑娘想到變身做男人，即時想也不想便說：「我要做奧巴馬，佢唔係靚仔，但係好有政治魅力，尤其係企喺台上演講時，真係好有吸引力㗎！不過如果我要變做佢，首先唔可以再用伍詠薇個腦袋，我嘅料應付唔到咁多嘢，要變到好似佢咁叻先至得。」
後記：不提陳山聰
伍姑娘接受訪問時，契細佬陳山聰剛公開跟賭王千金何超雲的戀情，伍姑娘當時表現得處處維護，還力撐當時陳山聰只是因家事請假，並非逃工去拍拖歐遊，她說：「只係有啲傳媒想做佢，但係大家應該留意返佢工作，佢演戲係好出色，我會永遠支持佢，一班兄弟姊妹都係。」
想不到近日因陳山聰一句戲言，在電話中要求跟伍姑娘絕交，兩人真的成為陌路。再問到伍姑娘有關陳山聰的一切，她都不肯再回應，只說：「我覺得件事已經完結咗，唔想永無止境咁講，希望《Chok》完咗，呢個話題亦都可以完結。」
Orignal From: 祥仔等伍姑娘回巢再Chok
沒有留言:
發佈留言