《潛行狙擊》「跛Co」呢個角色係我呢幾年最鍾意，可以話係我嘅代表作，花咗好多心思，好似造型上留鬚、潦倒初期戴冷帽都係我向監製提議。飾演反派冇擔心過，最擔心係戲入面食煙驚觀眾投訴，但後來一個投訴都冇，證明合情理就唔會有投訴。
一口氣推掉十個內地劇，黃宗澤雖然見財化水肉痛，但亦證明自己有價有市。
爭視帝有機會
外界反應都話今年「視帝」我係黑馬，其實有份角逐都係「跛Co」帶畀我，但老實講對攞「視帝」又唔敢話好有信心，老土啲講攞獎係要天時、地利、人和，套劇又要收得，角色又要受歡迎，觀眾呼聲又要高，人氣又要好夠，夾夾埋埋先攞到。有得攞就梗係開心，攞唔到又冇乜嘢，好似以前恨攞「飛躍進步」獎，05年攞完又覺得冇乜嘢呀，都係咁，反而有人讚演技進步仲開心過攞「視帝」。今年「視帝」邊個攞真係好難講，撐就梗係撐自己套劇嘅天華啦，但師傅（黎耀祥）又好強喎，兩個都有個勢。
黃宗澤有機會同謝天華拗手瓜爭視帝。
「跛Co」不但是黃宗澤的代表作，還為他贏來名利。
黃宗澤認為演技獲讚比攞視帝更有滿足感。
挖角潮促進步
同TVB仲有幾年合約，所以挖角潮好似又唔係好關我事，坦白講有競爭先有進步，衰啲去講演員都係打工仔，當然想人工高，聽到鄭嘉穎十六萬一集戥佢開心，我仲差佢少少啦，哈哈，但係都好滿意。隨住知名度上升，真係好多報價，價錢就交畀經理人去傾，「跛Co」之後，坦白講年底呢個檔期，起碼推咗十部大陸電視劇，但係要拍《LAUGHING GOR之潛罪犯》，跟住就開公司劇，又唔可以話可惜，唔可以只係諗大陸工作，香港就失蹤，不過，檔期就係得咁多，冇可能拍晒十部，但計吓條數一部二、三百萬……十部就……問心都肉赤架，哈哈。
值得一提的是一直都好感謝志偉哥，其實同佢只係合作過兩部賀歲片，唔知點解，或者真係緣分，佢好錫我，拍完第一套賀歲片，佢已經同我傾有個《江湖２》劇本，覺得好啱我做，嗰陣仲未有「跛Co」，佢對《江湖２》劇本要求好高，改完再改，要改到最好。
Orignal From: 跛Co帶旺 片約急增 黃宗澤肉赤：唔見幾千萬
沒有留言:
發佈留言